இலங்கை - தாய்லாந்து: தொழிலாளர் ஒத்துழைப்பு மற்றும் விசா விலக்கு பேச்சுவார்த்தைகளில் முன்னேற்றம்

இலங்கையும் தாய்லாந்தும் தங்களுக்கு இடையேயான இருதரப்பு உறவுகளை மேலும் வலுப்படுத்தும் நோக்கில், தொழிலாளர் ஒத்துழைப்பு ஒப்பந்தம் மற்றும் விசா விலக்கு தொடர்பான பேச்சுவார்த்தைகளில் குறிப்பிடத்தக்க முன்னேற்றங்களை எட்டியுள்ளன.

பங்க்காக் நகரில் நடைபெற்ற இரு தரப்பு சந்திப்பின் போது, இலங்கையின் வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித்த ஹேரத் மற்றும் தாய்லாந்தின் வெளிநாட்டலுவல்கள் துணை அமைச்சர் சரூன் சரோன்சுவான் ஆகியோர் கலந்துகொண்டு முக்கிய ஆலோசனைகளை மேற்கொண்டனர்.

தொழிலாளர் ஒத்துழைப்பு மற்றும் பாதுகாப்பு

இலங்கை மற்றும் தாய்லாந்துக்கு இடையேயான தொழிலாளர் ஒத்துழைப்பு புரிந்துணர்வு ஒப்பந்தம் மற்றும் தாய்லாந்தில் இலங்கைத் தொழிலாளர்களை வேலைக்கு அமர்த்துவது தொடர்பான உடன்படிக்கை ஆகியவற்றை விரைவில் இறுதி செய்வதன் அவசியத்தை இரு தலைவர்களும் வலியுறுத்தினர்.

நேற்று (15) நடைபெற்ற இந்தச் சந்திப்பின் போது, இலங்கைத் தொழிலாளர்களின் பாதுகாப்பு , உரிமைகள் மற்றும் நலன்களை உறுதிசெய்துகொண்டு அவர்களைத் திறம்பட வரவேற்கத் தயாராக இருப்பதாகத் தாய்லாந்து தரப்பு உறுதியளித்துள்ளது. இலங்கையின் பங்க்காக் தூதரகம் இந்தத் தகவலை வெளியிட்டுள்ளது.

விசா விலக்கு மற்றும் மக்கள் இடையேயான பரிமாற்றங்கள்

இரு நாடுகளுக்கும் இடையே சாதாரண கடவுச்சீட்டு வைத்திருப்பவர்களுக்கு விசா விலக்கு அளிப்பது குறித்த பேச்சுவார்த்தைகளை விரைவுபடுத்துவதற்கும் இரு நாடுகளும் சம்மதித்துள்ளன. இது பயணங்களை எளிதாக்குவதோடு, இரு நாடுகளின் குடிமக்களுக்கு இடையேயான பரிமாற்றங்களை மேலும் வலுப்படுத்தும் என எதிர்பார்க்கப்படுகிறது.

பொருளாதார மற்றும் வர்த்தக மேம்பாடு

நீண்டகால நண்பர்களாக விளங்கும் இரு நாடுகளும், தங்களுக்கு இடையேயான பொதுவான பௌத்த பாரம்பரியம் மற்றும் நெருங்கிய கலாச்சார உறவுகளின் அடிப்படையில் இருதரப்பு உறவுகளை ஆழப்படுத்தத் தங்கள் உறுதியான அர்ப்பணிப்பை வெளிப்படுத்தின.

குறிப்பாக வர்த்தகம், முதலீடு மற்றும் சுற்றுலாத்துறைகளில் பொருளாதார ஒத்துழைப்பை மேம்படுத்துவது குறித்து ஆழமாக விவாதிக்கப்பட்டது. இலங்கையில் தாய்லாந்து நாட்டு முதலீடுகளை விரிவுபடுத்துவதற்கும், இருவழி சுற்றுலாப் பயணிகள் வருகையை அதிகரிப்பதற்கும் முன்னுரிமை அளிக்கப்படும் எனத் தெரிவிக்கப்பட்டது.

குற்றத் தடுப்பு மற்றும் பிற துறைகள்

சர்வதேசக் குற்றத் தடுப்பு: மனிதக் கடத்தல் மற்றும் இணையக் குற்றங்கள் உள்ளிட்ட எல்லை கடந்த குற்றங்களை எதிர்த்துப் போராடுவதில் ஒருங்கிணைந்து செயற்பட உடன்பாடு எட்டப்பட்டுள்ளது.

யானைகள் பாதுகாப்பு: யானைகள் தொடர்பான கூட்டுப் பணிக்குழு மூலமான ஒத்துழைப்பு மீண்டும் உறுதிப்படுத்தப்பட்டது. இலங்கையில் உள்ள தாய்லாந்து யானைகளின் நலன்களைப் பாதுகாப்பதில் இலங்கை தொடர்ந்து காட்டிவரும் ஈடுபாட்டை தாய்லாந்து பாராட்டியது.

பேரிடர் மற்றும் மனிதாபிமான உதவி: 'டித்வா' (Ditwah) புயலால் ஏற்பட்ட பேரிடர் மீட்புப் பணிகளுக்காக தாய்லாந்து வழங்கிய நிதி உதவி மற்றும் மியான்மரில் கடத்தல் வலையிலிருந்து மீட்கப்பட்ட இலங்கையர்களைப் பாதுகாப்பாக தாயகம் அழைத்து வருவதில் வழங்கிய ஒத்துழைப்புக்கு அமைச்சர் விஜித்த ஹேரத் நன்றியைத் தெரிவித்தார்.

நிலையான வளர்ச்சி, கல்வி, கடல்சார் பாதுகாப்பு மற்றும் கலாச்சாரப் பரிமாற்றங்கள் உள்ளிட்ட பல்வேறு துறைகளிலும் ஒத்துழைப்பை வளர்ப்பது குறித்துக் கலந்தாலோசிக்கப்பட்டது. குறிப்பாக, ஆசியான் அமைப்பில் (ASEAN) இலங்கை துறைசார் உரையாடல் பங்காளராக மாறுவதற்கான இலங்கையின் விருப்பத்திற்குத் தொடர்ந்து ஒருங்கிணைந்து செயற்படவுள்ளதாக இரு தரப்பும் உறுதிப்படுத்தின.

இச்சந்திப்பில் தாய்லாந்திற்கான இலங்கையின் தூதுவர் விஜயந்தி எதிரிசிங்க, இரு நாட்டு வெளிநாட்டலுவல்கள் அமைச்சsகங்களின் உயர் அதிகாரிகள் மற்றும் தனியார் துறைத் தலைவர்கள் பலர் கலந்துகொண்டனர். அமைச்சர் விஜித்த ஹேரத் மற்றும் அவரது தூதுவப்புக் குழுவினரைச் சிறப்பிக்கும் வகையில் துணை அமைச்சர் சரூன் சரோன்சுவான் மதிய விருந்து ஒன்றையும் அளித்துச் சிறப்பு செய்தார்.