இலங்கையில் ஐந்து நாட்களுக்குள் வணிகப் பெயர்களைப் பதிவு செய்யும் புதிய முறை அறிமுகம்!

இலங்கையில் 108 ஆண்டுகள் பழமையான வணிகப் பெயர் பதிவுச் செயன்முறையை எளிமைப்படுத்தும் நோக்கில், ஐந்து நாட்களுக்குள் வணிகப் பெயர்களைப் பதிவு செய்யக்கூடிய புதிய முன்னோடித் திட்டம் அறிமுகப்படுத்தப்பட்டுள்ளது.

கைத்தொழில் மற்றும் தொழில்முயற்சி அபிவிருத்தி பிரதி அமைச்சர் சதுரங்க அபேசிங்க இதனைத் தெரிவித்துள்ளார்.

எளிமைப்படுத்தப்பட்ட மற்றும் ஒருங்கிணைக்கப்பட்ட வணிகப் பெயர் பதிவு (Simplified and Unified Business Name Registration – BNR) என்ற இந்த முன்னோடித் திட்டம், செவ்வாய்க்கிழமை (10) அநுராதபுரத்தில் உத்தியோகபூர்வமாக ஆரம்பித்து வைக்கப்பட்டுள்ளது.

கைத்தொழில் மற்றும் தொழில்முயற்சி அபிவிருத்தி அமைச்சு, Chrysalis நிறுவனம் மற்றும் மாகாண சபைகள் இணைந்து இந்தத் திட்டத்தை முன்னெடுக்கின்றன.

தனிநபர் உரிமையிலான வணிகங்கள் மற்றும் பங்குடைமை வணிகங்களைப் பதிவு செய்வதை எளிமைப்படுத்துவதுடன், நாடு முழுவதும் ஒரே மாதிரியான வணிகப் பதிவுக் கட்டமைப்பை உருவாக்குவதும் இதன் முக்கிய நோக்கமாகும்.

புதிய முறையின் கீழ், தனிநபர் அடையாளம் மற்றும் வதிவிடத்தை உறுதிப்படுத்தும் அடிப்படை ஆவணங்களைச் சமர்ப்பிப்பதன் மூலம் ஐந்து நாட்களுக்குள் வணிகப் பெயர்களைப் பதிவு செய்ய முடியும் என பிரதி அமைச்சர் குறிப்பிட்டுள்ளார்.

1918ஆம் ஆண்டு முதல் நடைமுறையில் இருந்த சட்டக் கட்டமைப்பின் கீழ் காணப்பட்ட சிக்கலான நிர்வாக நடைமுறைகளுக்குத் தீர்வுகாணும் வகையில் இந்தச் சீர்திருத்தம் முன்னெடுக்கப்பட்டுள்ளது.

இதற்கு முன்னர், வணிகப் பெயர்களைப் பதிவு செய்வதற்காக காணி உரிமை தொடர்பான ஆவணங்களைச் சமர்ப்பிக்க வேண்டியிருந்ததுடன், பல்வேறு நிறுவனங்களிடமிருந்தும் அனுமதிகளைப் பெற வேண்டிய நிலை காணப்பட்டது. இதனால் குறிப்பாக சிறிய மற்றும் நடுத்தர தொழில்முயற்சியாளர்கள் காலதாமதத்தையும் மேலதிக செலவுகளையும் எதிர்கொள்ள வேண்டியிருந்தது.

எனினும், புதிய முறையின் கீழ் வணிகப் பெயரைப் பதிவு செய்யும் செயன்முறையும், வணிகத்தை நடத்துவதற்குத் தேவையான ஏனைய உரிமங்கள் மற்றும் அனுமதிகளைப் பெறும் செயன்முறையும் தனித்தனியாகப் பிரிக்கப்படவுள்ளன.

இந்த முன்னோடித் திட்டம் மூன்று மாதங்களுக்கு நடைமுறைப்படுத்தப்படவுள்ளதுடன், மத்திய, வடக்கு, வடமத்திய மற்றும் வடமேல் மாகாணங்களில் தெரிவுசெய்யப்பட்ட 20 பிரதேச செயலகங்கள் ஊடாக முன்னெடுக்கப்படவுள்ளது.

இதன் மூலம் புதிய பதிவுச் செயன்முறையின் வினைத்திறன் மதிப்பீடு செய்யப்படுவதுடன், நடைமுறையில் எதிர்கொள்ளப்படும் சவால்கள் அடையாளம் காணப்பட்டு, தேவையான திருத்தங்களும் மேற்கொள்ளப்படவுள்ளன.

முன்னோடித் திட்டத்தின் பெறுபேறுகளை அடிப்படையாகக் கொண்டு, இந்த முறையை நாடு முழுவதும் விரிவுபடுத்தத் திட்டமிடப்பட்டுள்ளது.

மேலும், எதிர்வரும் ஆண்டுகளில் வணிகப் பதிவுச் செயன்முறையை முழுமையாக டிஜிட்டல் மயப்படுத்துவதற்கான நடவடிக்கைகளும் முன்னெடுக்கப்பட்டு வருவதாக பிரதி அமைச்சர் தெரிவித்துள்ளார்.

இந்தப் புதிய திட்டம் நாட்டில் புதிய தொழில்முயற்சிகளை ஊக்குவிப்பதுடன், சிறிய மற்றும் நடுத்தர தொழில்முயற்சியாளர்களுக்கு ஆதரவளித்து, அவர்களை உத்தியோகபூர்வ பொருளாதாரக் கட்டமைப்புக்குள் கொண்டுவருவதற்கும் உதவும் என எதிர்பார்க்கப்படுகிறது.