கடுகண்ணாவையில் மீண்டும் திறக்கப்பட்டது கொழும்பு – கண்டி பிரதான வீதி!

மண்சரிவு மற்றும் பாறைகள் சரிந்து விழும் அபாயம் காரணமாக தற்காலிகமாக மூடப்பட்டிருந்த கொழும்பு – கண்டி பிரதான வீதி, இன்று (11) காலை 6 மணி முதல் மீண்டும் போக்குவரத்துக்காகத் திறக்கப்பட்டுள்ளது.

கடும் மழை காரணமாக பாறைகள் சரிந்து விழுதல், மண்சரிவு மற்றும் மண்சரிவு அபாயம் ஏற்பட்டதைத் தொடர்ந்து, கடுகண்ணாவை பொலிஸ் பிரிவுக்குட்பட்ட டோசன் கோபுரம் (Dawson Tower) அருகிலும், மாவனெல்லை பொலிஸ் பிரிவுக்குட்பட்ட கணேத்தென்ன சந்திப் பகுதியிலும் நேற்று இரவு குறித்த வீதி தற்காலிகமாக மூடப்பட்டது.

இதற்கிடையில், கண்டி மாவட்டச் செயலாளர் இந்திக உடவத்த, கடுகண்ணாவை – கணேத்தென்ன வீதிப் பகுதியில் ஒரு வழிப்பாதையை மாத்திரம் போக்குவரத்துக்காகத் திறந்து வைக்கத் தீர்மானிக்கப்பட்டுள்ளதாகத் தெரிவித்துள்ளார்.

குறித்த வீதியில் பாறைகள் சரிந்து விழுதல் மற்றும் மண்சரிவு ஏற்படுவதற்கான அபாயங்கள் தொடர்பாக நேரடி கள ஆய்வுகள் மேற்கொள்ளப்பட்ட பின்னரே இந்தத் தீர்மானம் எடுக்கப்பட்டதாக அவர் குறிப்பிட்டுள்ளார்.

மேலும், தொடர்ந்து மழை பெய்யும் பட்சத்தில் நிலவும் பாதுகாப்பு அபாயங்களைக் கருத்திற்கொண்டு, இரவு நேரங்களில் குறித்த வீதியை மீண்டும் மூட நடவடிக்கை எடுக்கப்படும் என்றும் மாவட்டச் செயலாளர் தெரிவித்துள்ளார்.

எனவே, பாதிக்கப்பட்ட வீதிப் பகுதியூடாகப் பயணிக்கும் சாரதிகள், ஏற்படக்கூடிய ஆபத்துகளைத் தவிர்க்க முடிந்தவரை மாற்று வீதிகளைப் பயன்படுத்துமாறும் அறிவுறுத்தப்பட்டுள்ளனர்.