41 பில்லியன் ரூபா எரிபொருள் மானியம் – 29.2 பில்லியன் ரூபா இலாபம் ஈட்டிய இலங்கை பெற்றோலியக் கூட்டுத்தாபனம்!

இலங்கை பெற்றோலியக் கூட்டுத்தாபனம் (CPC), 2026ஆம் ஆண்டின் முதல் ஆறு மாதங்களில் 29.2 பில்லியன் ரூபா நிகர இலாபத்தைப் பதிவு செய்துள்ளதாக நிதி அமைச்சின் அறிக்கையில் தெரிவிக்கப்பட்டுள்ளது.

எனினும், ஏப்ரல் முதல் ஜூன் வரையான காலப்பகுதியில் அரசாங்கத்தினால் வழங்கப்பட்ட 41 பில்லியன் ரூபா எரிபொருள் மானியத்தின் பின்னணியிலேயே இந்த இலாப அதிகரிப்பு ஏற்பட்டுள்ளது.

நிதி அமைச்சின் 2026ஆம் ஆண்டுக்கான அரையாண்டு நிதிநிலை அறிக்கையின்படி, 2025ஆம் ஆண்டின் இதே காலப்பகுதியில் பதிவான 17 பில்லியன் ரூபா நிகர இலாபத்துடன் ஒப்பிடுகையில், இவ்வாண்டு நிகர இலாபம் 71.8 சதவீதத்தால் அதிகரித்துள்ளது.

இருப்பினும், கூட்டுத்தாபனத்தின் மொத்த இலாபம் குறிப்பிடத்தக்க அளவில் வீழ்ச்சியடைந்துள்ளது. அதன்படி, கடந்த ஆண்டு முதல் ஆறு மாதங்களில் 32.8 பில்லியன் ரூபாவாகக் காணப்பட்ட மொத்த இலாபம், இவ்வாண்டு 72.9 சதவீதத்தால் குறைந்து 8.9 பில்லியன் ரூபாவாகப் பதிவாகியுள்ளது.

அதேவேளை, 2025ஆம் ஆண்டின் முதல் ஆறு மாதங்களில் 11.1 பில்லியன் ரூபாவாகக் காணப்பட்ட செயற்பாட்டு இலாபம், இவ்வாண்டு 23.9 பில்லியன் ரூபாவாக அதிகரித்துள்ளது. ஏப்ரல் முதல் ஜூன் வரையான காலப்பகுதியில் திறைசேரியிடமிருந்து கிடைத்த மானியமே இதற்கு முக்கிய காரணமாக அமைந்துள்ளதாக நிதி அமைச்சு சுட்டிக்காட்டியுள்ளது.

2026ஆம் ஆண்டின் இரண்டாவது காலாண்டில் உள்நாட்டு எரிபொருள் சந்தையில் ஈடுபட்டுள்ள நிறுவனங்களுக்கு அரசாங்கம் சுமார் 57 பில்லியன் ரூபா எரிபொருள் மானியத்தை வழங்கியுள்ளது. இதில் 41 பில்லியன் ரூபா இலங்கை பெற்றோலியக் கூட்டுத்தாபனத்திற்கு ஒதுக்கப்பட்டுள்ளது.

மத்திய கிழக்கு மோதல் தீவிரமடைந்ததைத் தொடர்ந்து, சர்வதேச சந்தையில் எரிபொருள் விலைகள் அதிகரித்ததால் ஏற்பட்ட தாக்கத்தை குறைக்கும் நோக்கிலேயே இந்த நிதியுதவி வழங்கப்பட்டுள்ளது.

இதற்கிடையில், 2026 ஜனவரி முதல் ஜூன் வரையான காலப்பகுதியில் கூட்டுத்தாபனத்தின் நிகர விற்பனை வருமானம் 40.4 சதவீதத்தால் அதிகரித்து 576.6 பில்லியன் ரூபாவாகப் பதிவாகியுள்ளது. கடந்த ஆண்டு இதே காலப்பகுதியில் இந்த வருமானம் 410.7 பில்லியன் ரூபாவாகக் காணப்பட்டது.

உலகளாவிய எரிசக்தி விநியோகத்தில் ஏற்பட்ட தடைகளைத் தொடர்ந்து உள்நாட்டில் எரிபொருள் விலைகள் அதிகரித்தமையே வருமான உயர்வுக்கு முக்கிய காரணமாக அமைந்துள்ளதாக நிதி அமைச்சு தெரிவித்துள்ளது.

மேலும், 2025ஆம் ஆண்டின் முதல் ஆறு மாதங்களில் சுமார் ஒரு பில்லியன் அமெரிக்க டொலராகக் காணப்பட்ட பெற்றோலியப் பொருட்களின் இறக்குமதிச் செலவு, இவ்வாண்டு 73.8 சதவீதத்தால் அதிகரித்து 1.74 பில்லியன் அமெரிக்க டொலராக உயர்ந்துள்ளது.

இதன் காரணமாக, விற்பனைக்கான செலவும் 50.2 சதவீதத்தால் அதிகரித்து 567.6 பில்லியன் ரூபாவாகப் பதிவாகியுள்ளது. கடந்த ஆண்டு இதே காலப்பகுதியில் இந்தச் செலவு 377.9 பில்லியன் ரூபாவாக இருந்தது.

அத்துடன், வெளிநாட்டு நாணய மாற்று விகித ஏற்ற இறக்கங்களால் ஏற்பட்ட 7.2 பில்லியன் ரூபா நனவாகாத அந்நியச் செலாவணி இலாபத்தையும் கூட்டுத்தாபனம் பதிவு செய்துள்ளது. 2025ஆம் ஆண்டின் இதே காலப்பகுதியில் இந்த இலாபம் 3.5 பில்லியன் ரூபாவாகக் காணப்பட்டது.

உள்நாட்டு பெற்றோலியத் துறையை நிலைப்படுத்துவதுடன், மத்திய கிழக்கு மோதலால் நுகர்வோர் மற்றும் நாட்டின் ஒட்டுமொத்த பொருளாதாரத்திற்கு ஏற்படும் பாதிப்புகளைக் குறைப்பதுமே அரசாங்கம் இந்த மானியங்களை வழங்கியதன் நோக்கம் என நிதி அமைச்சு தெரிவித்துள்ளது.