இந்தியாவில் கரையைக் கடந்த ‘முரசு’ புயல்; கடற்பகுதிகளில் பலத்த காற்று மற்றும் கடல் கொந்தளிப்புக்கான எச்சரிக்கை

இந்தியாவில் ‘முரசு’ (Murasu) புயல் கரையைக் கடந்துள்ள நிலையில், வங்காள விரிகுடாவின் சில கடற்பகுதிகளில் பலத்த காற்று மற்றும் கடல் கொந்தளிப்பு ஏற்படக்கூடும் என இலங்கை வளிமண்டலவியல் திணைக்களம் எச்சரிக்கை விடுத்துள்ளது.

இயற்கை அனர்த்தங்கள் தொடர்பான முன்னெச்சரிக்கை நிலையத்தின் தகவலின்படி, இந்தியாவில் கரையைக் கடந்துள்ள குறித்த புயல், வடக்கு - வடமேற்கு திசையை நோக்கி நகர்வதுடன், படிப்படியாக வலுவிழக்கும் என எதிர்பார்க்கப்படுகிறது.

இதன்படி, இன்று (03) காலை 11.30 மணியளவில் புயலின் தீவிரம் குறையத் தொடங்கியுள்ளதுடன், இன்று இரவு 11.30 மணியளவில் அது ஆழ்ந்த காற்றழுத்தத் தாழ்வு மண்டலமாக வலுவிழக்கும் என எதிர்பார்க்கப்படுகிறது.

பாதிக்கப்பட்ட கடற்பகுதிகளில் காற்றின் வேகம் மணித்தியாலத்திற்கு 65 முதல் 75 கிலோமீற்றர் வரை அதிகரிக்கக்கூடும் எனவும், இடியுடன் கூடிய கனமழை மற்றும் மிகவும் கொந்தளிப்பான கடல் நிலைமை காணப்படலாம் எனவும் வளிமண்டலவியல் திணைக்களம் தெரிவித்துள்ளது.

இதனால், வங்காள விரிகுடாவின் ஆழ்கடல் பகுதிகளில் பயணிக்கும் கடற்படையினர் மற்றும் மீனவர்கள், குறிப்பாக பலநாள் மீன்பிடிப் படகுகளில் தொழிலில் ஈடுபடுவோர் மிகுந்த அவதானத்துடன் செயற்படுமாறு அறிவுறுத்தப்பட்டுள்ளனர்.

மேலும், இன்று இரவு 11.30 மணியளவில் குறித்த புயல் காற்றழுத்தத் தாழ்வு மண்டலமாகவும், நாளை (04) அதிகாலை 5.30 மணியளவில் மேலும் வலுவிழந்து தெளிவான குறைந்த காற்றழுத்தப் பிரதேசமாகவும் மாறும் என எதிர்வுகூறப்பட்டுள்ளது.

இன்று காலை 10.30 மணிக்கு வெளியிடப்பட்ட இந்த எச்சரிக்கை அறிவிப்பு அடுத்த 24 மணித்தியாலங்களுக்கு அமுலில் இருக்கும் என வளிமண்டலவியல் திணைக்களம் தெரிவித்துள்ளது.