கோவை கருமத்தம்பட்டி காவல் நிலையத்தில் முதல்வர் விஜய் திடீர் ஆய்வு!
கோவை மாவட்டம் கருமத்தம்பட்டி காவல் நிலையத்தில் தமிழக முதல்வர் விஜய் இன்று (நவம்பர் 3) திடீர் ஆய்வு மேற்கொண்டார்.
ஈரோடு மாவட்டம் பெருந்துறையில் நடைபெற்ற அரசு விழாவில் பங்கேற்ற பின்னர், முதல்வர் விஜய் சாலை மார்க்கமாக கோவை விமான நிலையத்துக்குப் புறப்பட்டுச் சென்றார்.
இதன்போது, கோவை மாவட்ட எல்லைக்குள் நுழைந்து அவிநாசி சாலை வழியாகச் சென்றுகொண்டிருந்தபோது, கருமத்தம்பட்டி அருகே தனது வாகனத்தை காவல் நிலையத்துக்குத் திருப்புமாறு முதல்வர் அறிவுறுத்தினார்.
இதையடுத்து, கருமத்தம்பட்டி காவல் நிலையத்துக்குச் சென்ற முதல்வர் விஜய், அங்கு திடீர் ஆய்வு மேற்கொண்டார். முதல்வரின் எதிர்பாராத வருகையால் அங்கிருந்த காவல் ஆய்வாளர் நவநீத கிருஷ்ணன் உள்ளிட்ட காவலர்கள் ஆச்சரியமடைந்தனர்.
காவல் நிலையத்துக்குள் சென்ற முதல்வர், அங்குள்ள பல்வேறு அறைகளைப் பார்வையிட்டதுடன், காவல் ஆய்வாளர் அறையிலும் ஆய்வு செய்தார். இதன்போது, காவல் ஆய்வாளரின் மேசைக்கு எதிரே உள்ள இருக்கையில் முதல்வர் அமர்ந்தார்.
இந்த ஆய்வின்போது, சட்டம் ஒழுங்கு கூடுதல் பொலிஸ் மா அதிபர் அன்பு, மேற்கு மண்டல பொலிஸ் மா அதிபர் ஆர்.வி. ரம்யாபாரதி மற்றும் மாவட்ட பொலிஸ் கண்காணிப்பாளர் பவன்குமார் ரெட்டி ஆகியோரும் உடனிருந்தனர்.
தொடர்ந்து, காவல் ஆய்வாளர் நவநீத கிருஷ்ணனிடம் காவல் நிலையத்தின் செயல்பாடுகள் குறித்து முதல்வர் கேட்டறிந்தார். குறிப்பாக, காவல் நிலையத்தின் அதிகார எல்லைக்கு உட்பட்ட பகுதிகள், முக்கிய கிராமங்கள், சட்டம் ஒழுங்கு நிலவரம் மற்றும் பதிவாகியுள்ள வழக்குகள் தொடர்பாக எடுக்கப்பட்டு வரும் நடவடிக்கைகள் குறித்து விவரங்களைக் கேட்டுப் பெற்றார்.
மேலும், பொதுமக்களின் பாதுகாப்பை உறுதிப்படுத்துவதுடன், சட்டம் ஒழுங்கைப் பேணுவதற்குத் தேவையான அறிவுறுத்தல்களையும் காவல் ஆய்வாளருக்கு வழங்கிய பின்னர் முதல்வர் விஜய் அங்கிருந்து புறப்பட்டுச் சென்றார்.
