மூன்று மாதக் குழந்தைக்கு ‘விஜய்’ எனப் பெயர் சூட்டிய முதல்வர் விஜய் – நெகிழ்ச்சியில் தாய்
தமிழக முதல்வர் விஜய், மூன்று மாத ஆண் குழந்தைக்கு ‘விஜய்’ எனப் பெயர் சூட்டி, தங்க மோதிரம் அணிவித்து மகிழ்வித்த சம்பவம் நெகிழ்ச்சியை ஏற்படுத்தியுள்ளது.
ஈரோடு மாவட்டம் பெருந்துறையில் நலத்திட்ட உதவிகளை வழங்குவதற்காக, தமிழக முதல்வர் விஜய் கோவையிலிருந்து சாலை மார்க்கமாகச் சென்றுள்ளார். இதன்போது, விஜயமங்கலம் சுங்கச்சாவடி அருகே சேலத்தைச் சேர்ந்த பூஜா ஸ்ரீ என்ற பெண், தனது மூன்று மாதக் குழந்தையுடன் முதல்வரைச் சந்திப்பதற்காக நீண்ட நேரமாகக் காத்திருந்துள்ளார்.
எனினும், முதல்வர் தன்னைச் சந்திக்காமல் சென்றதால் ஏமாற்றமடைந்த பூஜா ஸ்ரீ, கண்ணீர் மல்க தனது வருத்தத்தைத் தெரிவித்திருந்தார். மேலும், தனது குழந்தைக்கு இதுவரை பெயர் சூட்டவில்லை என்றும், முதல்வர் விஜய்யின் கைகளால் குழந்தைக்குப் பெயர் சூட்ட வேண்டும் என்பதே தனது விருப்பம் என்றும் கூறியிருந்தார்.
காலையிலிருந்தே முதல்வருக்காகக் காத்திருந்ததாகவும், செயற்குழு உறுப்பினர் சுலோச்சனாவின் உதவியுடன் அங்கு வந்ததாகவும் அவர் தெரிவித்திருந்தார்.
இந்நிலையில், பெருந்துறையில் நலத்திட்ட உதவிகளை வழங்கிய பின்னர் கோவைக்குச் சென்ற முதல்வர் விஜய், அங்குள்ள காவல் நிலையத்தில் ஆய்வு மேற்கொண்டார். இதனைத் தொடர்ந்து பூஜா ஸ்ரீயையும் அவரது குழந்தையையும் சந்தித்தார்.
அப்போது, முதல்வரைக் கண்ட மகிழ்ச்சியில் பூஜா ஸ்ரீ ஆனந்தக் கண்ணீர் வடித்துள்ளார். இதனை அவதானித்த முதல்வர், அவரிடம் கண்ணீரைத் துடைக்குமாறு கூறியுள்ளார்.
தொடர்ந்து, குழந்தையைத் தனது கைகளில் ஏந்திக் கொஞ்சிய முதல்வர் விஜய், குழந்தையின் காதில் மூன்று முறை 'விஜய்... விஜய்... விஜய்...' எனக் கூறி, குழந்தைக்கு 'விஜய்' எனப் பெயர் சூட்டினார். அத்துடன், தாய் மாமன் ஸ்தானத்தில் இருந்து குழந்தைக்குத் தங்க மோதிரத்தையும் அணிவித்தார்.
பின்னர், குழந்தையின் தாய் பூஜா ஸ்ரீயிடம் அன்பாகப் பேசிய முதல்வர், அவரை அரவணைத்துக் கொண்டார். குழந்தையின் கைகளைப் பிடித்து விளையாடியதுடன், குழந்தையுடன் சிறிது நேரம் மகிழ்ச்சியாகப் பொழுதைக் கழித்தார்.
இந்த நெகிழ்ச்சியான தருணத்தை முதல்வருடன் இருந்த அமைச்சர்களான என். ஆனந்த், செங்கோட்டையன் உள்ளிட்டோர் புன்னகையுடன் ரசித்தனர். குறிப்பாக, அமைச்சர் என். ஆனந்த் உள்ளிட்டோர் முதல்வரின் இந்தச் செயல்பாட்டைக் கண்டு மகிழ்ச்சியடைந்தனர்.
இதனிடையே, பின்னர் செய்தியாளர்களிடம் பேசிய பூஜா ஸ்ரீ, இவ்வளவு தொலைவிலிருந்து ஆபத்தைப் பொருட்படுத்தாமல் ஏன் வந்தீர்கள் என முதல்வர் தன்னிடம் கேட்டதாகவும், அவரைப் பார்ப்பதற்காக எவ்வளவு தொலைவிலிருந்தும் வரத் தயாராக இருப்பதாகத் தான் பதிலளித்ததாகவும் தெரிவித்தார்.
மேலும், தனக்குச் சகோதரர்கள் யாரும் இல்லை என்றும், தாங்கள் மூவரும் பெண் குழந்தைகள் என்றும் குறிப்பிட்ட அவர், தனக்கு அண்ணனாகவும் தந்தையாகவும் முதல்வர் விஜய் விளங்குவதாக நெகிழ்ச்சியுடன் கூறினார்.
பூஜா ஸ்ரீயின் தாயாரும், தனது மகளுக்கு சிறு வயது முதலே விஜய் என்றால் மிகவும் பிடிக்கும் எனத் தெரிவித்துள்ளார். இந்நிலையில், தனது ஆண் குழந்தைக்கு முதல்வர் விஜய்யே 'விஜய்' எனப் பெயர் சூட்டியிருப்பது மிகுந்த மகிழ்ச்சியளிப்பதாக பூஜா ஸ்ரீ தெரிவித்துள்ளார்.
