ஹுலங்கமுவ, ரணிலின் பொருளாதார ஆலோசகர் அல்ல! – ஹர்ஷாவின் கூற்றுக்கு ரணில் அலுவலகம் மறுப்பு
முன்னாள் ஜனாதிபதி ரணில் விக்கிரமசிங்கவின் ஆட்சிக் காலத்தில் துமிந்த ஹுலங்கமுவ முக்கிய பொருளாதார ஆலோசகராகப் பணியாற்றவில்லை என அவரது அலுவலகம் தெளிவுபடுத்தியுள்ளது.
இது தொடர்பாக நேற்று (22) வெளியிடப்பட்ட அறிக்கையில், ரணில் விக்கிரமசிங்க ஜனாதிபதியாகவும் நிதி அமைச்சராகவும் பதவி வகித்த காலத்தில் அவருக்கு மூன்று முக்கிய பொருளாதார ஆலோசகர்கள் இருந்ததாகக் குறிப்பிடப்பட்டுள்ளது.
அதன்படி, முன்னாள் திறைசேரி செயலாளர் கலாநிதி ஆர். எச். சமரதுங்க, திறைசேரி செயலாளர் மஹிந்த சிறிவர்தன மற்றும் இலங்கை மத்திய வங்கியின் ஆளுநர் கலாநிதி நந்தலால் வீரசிங்க ஆகியோரே அந்த மூவராவர்.
2022ஆம் ஆண்டு இலங்கை கடுமையான பொருளாதார நெருக்கடியை எதிர்கொண்டிருந்த காலத்தில், அந்நெருக்கடிக்குத் தீர்வு காண முடியாது எனப் பலரும் கருத்துத் தெரிவித்திருந்த போதிலும், ரணில் விக்கிரமசிங்க இந்த மூவரையும் நியமித்ததாக அந்த அறிக்கையில் தெரிவிக்கப்பட்டுள்ளது.
சர்வதேச நாணய நிதியம் (IMF) உள்ளிட்ட உள்நாட்டு மற்றும் சர்வதேச முக்கிய நிறுவனங்களுடனான பேச்சுவார்த்தைகளில் இலங்கையைப் பிரதிநிதித்துவப்படுத்தியவர்களும் இவர்களே என முன்னாள் ஜனாதிபதியின் அலுவலகம் குறிப்பிட்டுள்ளது.
மேலும், எதிர்க்கட்சி நாடாளுமன்ற உறுப்பினர் ஹர்ஷ டி சில்வா தலைமையிலான அரசாங்க நிதி தொடர்பான குழுவின் (Committee on Public Finance) முன்னிலையிலும் இந்த அதிகாரிகள் ஆஜராகியிருந்ததாகத் தெரிவிக்கப்பட்டுள்ளது.
இதேவேளை, துமிந்த ஹுலங்கமுவ ரணில் விக்கிரமசிங்கவின் பொருளாதார ஆலோசகராகப் பணியாற்றவில்லை என்றும் அந்த அலுவலகம் திட்டவட்டமாகத் தெரிவித்துள்ளது.
மாறாக, நாட்டின் பொருளாதார வளர்ச்சி மூலோபாயத்துக்குப் பங்களிப்பதற்காக அமைக்கப்பட்ட தற்காலிகக் குழுவில், வர்த்தக சம்மேளனத்தின் பிரதிநிதியாகவே ஹுலங்கமுவ இடம்பெற்றிருந்ததாகவும் விளக்கமளிக்கப்பட்டுள்ளது.
எதிர்க்கட்சி நாடாளுமன்ற உறுப்பினர் ஹர்ஷ டி சில்வா, இந்த வாரம் நாடாளுமன்றத்தில் உரையாற்றியபோது, முன்னாள் ஜனாதிபதி ரணில் விக்கிரமசிங்கவின் பொருளாதார ஆலோசகராகப் பணியாற்றிய துமிந்த ஹுலங்கமுவ, தற்போது ஜனாதிபதி அநுர குமார திஸாநாயக்கவுக்கு ஆலோசனை வழங்கி வருவதாகக் குறிப்பிட்டிருந்தார்.
இந்தக் கூற்றுக்குப் பதிலளிக்கும் வகையிலேயே முன்னாள் ஜனாதிபதியின் அலுவலகம் இந்தத் தெளிவுபடுத்தலை வெளியிட்டுள்ளது.
