சம்மாந்துறையில் மயங்கி விழுந்த காட்டு யானைக்கு தீவிர சிகிச்சை!

அம்பாறை மாவட்டம், சம்மாந்துறை பகுதியில் நோய்வாய்ப்பட்டு மயங்கி விழுந்த காட்டு யானையைக் காப்பாற்றுவதற்கான தீவிர சிகிச்சைகள் தொடர்ந்து முன்னெடுக்கப்பட்டு வருகின்றன.

சுமார் 25 முதல் 30 வயதுக்கு இடைப்பட்ட ஆண் யானைக்கு வனவிலங்கு அதிகாரிகள், கால்நடை மருத்துவக் குழுவினர், இலங்கை இராணுவத்தினர் மற்றும் பொலிஸார் இணைந்து சிகிச்சை அளித்து வருகின்றனர்.

சுற்றுச்சூழல் அமைச்சின் தகவலின்படி, குறித்த யானை உடல் வலிமையுடன் காணப்படுவதுடன், வெளிப்புறத்தில் எவ்வித காயங்களும் தென்படவில்லை. எனினும், அதன் வயிறு வழக்கத்திற்கு மாறாக வீங்கிய நிலையில் காணப்படுவதாகத் தெரிவிக்கப்பட்டுள்ளது.

யானையின் இந்த நிலைக்கு நச்சுப் பொருட்களை உட்கொண்டமை அல்லது பொலித்தீன் போன்ற செரிமானமாகாத பொருட்களை உட்கொண்டதால் ஏற்பட்ட குடல் அடைப்பு காரணமாக இருக்கலாம் என கால்நடை மருத்துவர்கள் ஆரம்பகட்டமாகச் சந்தேகிக்கின்றனர்.

கிழக்கு மாகாண வனவிலங்கு கால்நடை மருத்துவப் பிரிவு, அம்பாறை வனவிலங்கு பிராந்திய அலுவலகம் மற்றும் சம்மாந்துறை வனவிலங்கு காவல் அலுவலகம் ஆகியன இணைந்து சிகிச்சை நடவடிக்கைகளை ஒருங்கிணைத்து வருகின்றன.

இதற்கிடையில், கடந்த 22ஆம் திகதி யானைக்கு அத்தியாவசியமான நுண்ணுயிர் எதிர்ப்பு மருந்துகள் வழங்கப்பட்டுள்ளதாக அமைச்சு தெரிவித்துள்ளது. யானையின் உடல்நிலை தொடர்ந்து கண்காணிக்கப்பட்டு வருகின்றது.

அப்பகுதியில் பெய்து வரும் கடும் மழையால் யானை விழுந்துள்ள இடத்தில் வெள்ளம் ஏற்பட்டுள்ளதுடன், இதனால் சிகிச்சை நடவடிக்கைகளை முன்னெடுப்பதில் சிரமங்கள் ஏற்பட்டுள்ளன.

இதனையடுத்து, சிகிச்சையைத் தடையின்றித் தொடரும் வகையில், குறித்த இடத்தில் மணல் பரப்பி நிலத்தைச் சீரமைக்கும் நடவடிக்கைகள் மேற்கொள்ளப்பட்டு வருகின்றன.

வனவிலங்கு பாதுகாப்புத் திணைக்களத்துக்கு உதவுவதற்காக இலங்கை இராணுவத்தின் 10 படையினர் பணியில் ஈடுபடுத்தப்பட்டுள்ளதுடன், பொலிஸாரும் தேவையான ஒத்துழைப்புகளை வழங்கி வருகின்றனர்.

யானையின் பாதுகாப்பை உறுதிப்படுத்தவும், உரிய நேரங்களில் மருந்துகளை வழங்கவும் வனவிலங்கு அதிகாரிகள் குழுவொன்று இரவு பகலாக சம்பவ இடத்தில் தங்கியிருந்து கண்காணிப்புப் பணிகளில் ஈடுபட்டு வருவதாக சுற்றுச்சூழல் அமைச்சு மேலும் தெரிவித்துள்ளது.