ஏர்பஸ் ஒப்பந்தம்: நாமல் ராஜபக்ஷ நாளை ட்ரயல் அட் பார் நீதிமன்றத்தில் முன்னிலை

சர்ச்சைக்குரிய ஏர்பஸ் விமானக் கொள்வனவு ஒப்பந்தம் தொடர்பான வழக்கில் விளக்கமறியலில் வைக்கப்பட்டுள்ள நாடாளுமன்ற உறுப்பினர் நாமல் ராஜபக்ஷவை, நாளை (28) கொழும்பு நிரந்தர மூவரடங்கிய மேல் நீதிமன்றத்தில் முன்னிலைப்படுத்துமாறு உத்தரவிடப்பட்டுள்ளது.

குறித்த வழக்கு இன்று (27) கொழும்பு பிரதம நீதவான் அசங்க எஸ். போதரகம முன்னிலையில் விசாரணைக்கு எடுத்துக்கொள்ளப்பட்டபோது இந்த உத்தரவு பிறப்பிக்கப்பட்டது.

நாமல் ராஜபக்ஷவை நாளை நீதிமன்றத்தில் முன்னிலைப்படுத்தும் வரை விளக்கமறியலில் வைக்குமாறும் நீதவான் உத்தரவிட்டார். அத்துடன், வழக்கு விசாரணை தொடர்பான அறிக்கையை எதிர்வரும் ஒக்டோபர் 30ஆம் திகதி நீதவான் நீதிமன்றத்தில் சமர்ப்பிக்குமாறும் அறிவுறுத்தப்பட்டது.

ஏர்பஸ் ஒப்பந்தத்துடன் தொடர்புடையதாகக் கூறப்படும் பணமோசடி மற்றும் 100 மில்லியன் ரூபா இலஞ்சம் பெற்றமை உள்ளிட்ட குற்றச்சாட்டுகள் தொடர்பில் நாமல் ராஜபக்ஷ உள்ளிட்ட நால்வருக்கு எதிராகக் கொழும்பு நிரந்தர மூவரடங்கிய மேல் நீதிமன்றத்தில் குற்றப்பத்திரிகைகள் தாக்கல் செய்யப்பட்டுள்ளன.

இன்று நடைபெற்ற விசாரணையின்போது, பிரதம சட்டமா அதிபர் சார்பில் முன்னிலையான பிரதி சொலிசிட்டர் ஜெனரல் ஜனக பண்டார, பிரதம நீதியரசரின் அனுமதியுடன் குறித்த குற்றப்பத்திரிகைகள் தாக்கல் செய்யப்பட்டுள்ளதாகக் கொழும்பு பிரதம நீதவான் நீதிமன்றத்துக்கு அறிவித்தார்.

மேலும், குற்றப்பத்திரிகையில் 24 குற்றச்சாட்டுகள் உள்ளடக்கப்பட்டுள்ளதுடன், 59 சாட்சியாளர்களின் பெயர்களும் குறிப்பிடப்பட்டுள்ளதாக அவர் தெரிவித்தார்.

இந்த வழக்கு நிரந்தர மூவரடங்கிய மேல் நீதிமன்றத்துக்கு மாற்றப்பட்டுள்ள நிலையில், கொழும்பு பிரதம நீதவான் நீதிமன்றத்தில் இது தொடர்பான இறுதி விசாரணையாக இன்றைய நடவடிக்கைகள் அமையும் எனவும் பிரதி சொலிசிட்டர் ஜெனரல் குறிப்பிட்டார்.