இலங்கை
மன்னாரில் வெள்ளம்: 70 குடும்பங்களைச் சேர்ந்த 163 பேர் பாதுகாப்பாக வெளியேற்றம்!
மன்னார் மாவட்டத்தின் கூரைப் பகுதியில் வெள்ளநீர் அதிகரித்ததைத் தொடர்ந்து, பாதிக்கப்பட்ட 70 குடும்பங்களைச் சேர்ந்த 163 பேரை இலங்கை இராணுவத்தினர் பாதுகாப்பாக வெளியேற்றியுள்ளனர்.
வெள்ளத்தால் பாதிக்கப்பட்ட மக்களின் பாதுகாப்பை உறுதிப்படுத்தும் நோக்கில், மாந்தை மேற்கு பிரதேச செயலகப் பிரிவின் கூரை கிராம அலுவலர் பிரிவில் இராணுவத்தினர் நிவாரணப் பணிகளை முன்னெடுத்ததாக இலங்கை இராணுவம் தெரிவித்துள்ளது.
இதன்போது, பாதிக்கப்பட்ட மக்கள் இளுப்பைக்கடவை அரச பாடசாலையில் அமைக்கப்பட்டுள்ள தற்காலிக பாதுகாப்பு நிலையத்திற்கு அழைத்துச் செல்லப்பட்டுள்ளனர்.
அத்துடன், குறித்த பாதுகாப்பு நிலையத்தில் தங்கவைக்கப்பட்டுள்ள மக்களுக்கு கடந்த திங்கட்கிழமை (26) சமைத்த உணவுகளும் வழங்கப்பட்டதாக இராணுவம் மேலும் தெரிவித்துள்ளது.
