பயங்கரவாத எதிர்ப்புச் சட்டங்கள் மற்றும் ஒழுங்கமைக்கப்பட்ட குற்றத் தடுப்புச் சட்டம்: அரசாங்கத்துக்கு FCEJ கடும் எதிர்ப்பு!

தேசிய மக்கள் சக்தி (NPP) அரசாங்கத்தினால் முன்மொழியப்பட்டுள்ள பயங்கரவாத எதிர்ப்புச் சட்டம் மற்றும் ஒழுங்கமைக்கப்பட்ட குற்றத் தடுப்புச் சட்டம் ஆகியவை அடிப்படை உரிமைகளைப் பாதிக்கக்கூடும் எனத் தெரிவித்துள்ள பொருளாதார நீதிக்கான பெண்ணியக் கூட்டமைப்பு (FCEJ), அரசாங்கத்தின் சட்ட மற்றும் பொருளாதாரக் கொள்கைகளுக்குக் கடும் எதிர்ப்பை வெளியிட்டுள்ளது.

கடந்த செவ்வாய்க்கிழமை (20) வெளியிட்ட அறிக்கையில், இந்தச் சட்டங்கள் பொதுமக்களின் எதிர்ப்புக் குரல்களைக் கட்டுப்படுத்தவும், அரசாங்கத்தின் அதிகாரங்களை விரிவுபடுத்தவும் வழிவகுக்கும் என அந்த அமைப்பு எச்சரித்துள்ளது.

குறிப்பாக, பயங்கரவாதத்திலிருந்து அரசைப் பாதுகாக்கும் சட்டமூலம் (Protection of the State from Terrorism Bill – PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் ஆகியவற்றின் ஏற்பாடுகள் தொடர்பில் FCEJ கவலை வெளியிட்டுள்ளது.

இந்தச் சட்டமூலங்கள் பொலிஸாருக்கு விரிவான அதிகாரங்களை வழங்குவதுடன், நீதித்துறை மேற்பார்வையைப் பலவீனப்படுத்தி, முறையான போராட்டங்கள் மற்றும் அரசியல் எதிர்ப்புச் செயற்பாடுகளைக்கூட குற்றமாகக் கருதுவதற்கான வாய்ப்பை ஏற்படுத்தக்கூடும் என அந்த அமைப்பு சுட்டிக்காட்டியுள்ளது.

பொருளாதாரக் கொள்கைகளுக்கும் எதிர்ப்பு

அரசாங்கத்தின் சிக்கன நடவடிக்கைகள், அத்தியாவசிய சேவைகளைத் தனியார்மயமாக்கும் முயற்சிகள் மற்றும் வெளிநாட்டு முதலீடுகளை ஊக்குவிக்கும் திட்டங்கள் குறித்தும் FCEJ விமர்சனங்களை முன்வைத்துள்ளது.

இந்தக் கொள்கைகள் குறைந்த வருமானம் பெறும் குடும்பங்கள், தொழிலாளர்கள் மற்றும் சமூகத்தில் பாதிக்கப்படக்கூடிய பிரிவினரின் பொருளாதார நெருக்கடிகளை மேலும் அதிகரிப்பதாக அந்த அமைப்பு தெரிவித்துள்ளது.

குறைந்த ஊதியம், வாழ்க்கைச் செலவு அதிகரிப்பு, தொழிலாளர்களுக்கான ஊதியக் கொடுப்பனவுகளில் இடம்பெறும் முறைகேடுகள் மற்றும் குடும்பக் கடன் சுமை அதிகரிப்பு போன்ற பிரச்சினைகள் பொதுமக்களைப் பாதித்து வருவதாகவும் அறிக்கையில் குறிப்பிடப்பட்டுள்ளது.

மேலும், முறைசாராத் தொழில்துறையின் விரிவாக்கம் காரணமாகத் தொழிலாளர்கள் பணியிடங்களில் சுரண்டலுக்கும் துன்புறுத்தல்களுக்கும் உள்ளாகும் அபாயம் அதிகரித்துள்ளதாகவும் FCEJ தெரிவித்துள்ளது.

காலநிலை மாற்றத்தினால் விவசாயம், மீன்பிடி மற்றும் பெருந்தோட்டத் தொழில்கள் பாதிக்கப்படுவதும் குடும்பங்களின் பொருளாதாரச் சுமையை அதிகரிப்பதாக அந்த அமைப்பு சுட்டிக்காட்டியுள்ளது.

பயங்கரவாத எதிர்ப்புச் சட்டமூலம் தொடர்பில் கவலை

1979ஆம் ஆண்டின் பயங்கரவாதத் தடுப்புச் சட்டத்தை நீக்கி, அதற்குப் பதிலாகப் புதிய சட்டத்தை அறிமுகப்படுத்தும் நோக்கில் முன்வைக்கப்பட்டுள்ள PSTA சட்டமூலத்தில், பயங்கரவாதம் என்பதற்கான வரைவிலக்கணம் விரிவுபடுத்தப்பட்டுள்ளதாக FCEJ தெரிவித்துள்ளது.

இதன் காரணமாக, அரசியல் எதிர்ப்புகள், பேரணிகள் மற்றும் போராட்டங்கள் உள்ளிட்ட சில செயற்பாடுகளும் பயங்கரவாத நடவடிக்கைகளாகக் கருதப்படக்கூடிய அபாயம் இருப்பதாக அந்த அமைப்பு எச்சரித்துள்ளது.

மேலும், பொலிஸார், ஆயுதப் படையினர் மற்றும் கடலோரக் காவல்படையினருக்கு விரிவான அதிகாரங்களை வழங்குவதுடன், அமைப்புகளைத் தடைசெய்வது தொடர்பில் ஜனாதிபதிக்கும், வழக்குத் தொடர்வதை ஒத்திவைப்பது தொடர்பில் சட்டமா அதிபருக்கும் கூடுதல் அதிகாரங்கள் வழங்கப்படுவது குறித்தும் கேள்வி எழுப்பியுள்ளது.

கைதுகள் மற்றும் தடுப்புக்காவல் நடவடிக்கைகளில் நீதித்துறை மேற்பார்வை கட்டுப்படுத்தப்படுவதுடன், சட்டம் தன்னிச்சையாக அல்லது தவறாகப் பயன்படுத்தப்படும்போது பாதிக்கப்படுபவர்களுக்குப் போதுமான பாதுகாப்பும் நீதியைப் பெறுவதற்கான வாய்ப்புகளும் உறுதிப்படுத்தப்படவில்லை எனவும் FCEJ குற்றஞ்சாட்டியுள்ளது.

ஒழுங்கமைக்கப்பட்ட குற்றத் தடுப்புச் சட்டமூலத்திலும் சிக்கல்

ஒழுங்கமைக்கப்பட்ட குற்றங்களைத் தடுக்கும் சட்டமூலமும் இதேபோன்ற விரிவான அதிகாரங்களை வழங்குவதாக FCEJ தெரிவித்துள்ளது.

குறிப்பாக, பொலிஸ் அதிகாரிகளிடம் வழங்கப்படும் ஒப்புதல் வாக்குமூலங்களை நீதிமன்றத்தில் சாட்சியமாகப் பயன்படுத்த அனுமதிக்கும் ஏற்பாடு குறித்து அந்த அமைப்பு கவலை வெளியிட்டுள்ளது.

இத்தகைய ஏற்பாடு, கடந்த காலத்தில் பயங்கரவாதத் தடுப்புச் சட்டத்தின் கீழ் ஒப்புதல் வாக்குமூலங்களைப் பெறுவதற்காகக் கைதிகள் சித்திரவதைகளுக்கும் மனிதாபிமானமற்ற நடத்தைகளுக்கும் உள்ளாக்கப்பட்டதாக முன்வைக்கப்பட்ட குற்றச்சாட்டுகளை நினைவூட்டுவதாகவும் அந்த அறிக்கையில் குறிப்பிடப்பட்டுள்ளது.

வெளிநாட்டு பயங்கரவாதப் போராளிகளைத் தடுக்கும் சட்டமூலத்திலும் குற்றங்களுக்கான வரைவிலக்கணங்கள் விரிவாகக் குறிப்பிடப்பட்டுள்ளதால், பயங்கரவாதத்துடன் நேரடித் தொடர்பற்ற சில செயற்பாடுகளும் அதன் கீழ் உள்ளடக்கப்படக்கூடும் என FCEJ சுட்டிக்காட்டியுள்ளது.

அரச சார்பற்ற நிறுவனங்கள் தொடர்பான சட்டமூலத்துக்கும் எதிர்ப்பு

அரச சார்பற்ற நிறுவனங்கள் தொடர்பான முன்மொழியப்பட்ட சட்டமூலம், சமூக நலச் செயற்பாடுகளில் ஈடுபடும் குழுக்களின் சுதந்திரத்தைக் கட்டுப்படுத்தக்கூடும் எனவும் FCEJ தெரிவித்துள்ளது.

ஐந்து அல்லது அதற்கு மேற்பட்டோர் இணைந்து மேற்கொள்ளும் தன்னார்வச் செயற்பாடுகளுக்குக் கட்டாயப் பதிவு, நிதி திரட்டும் நடவடிக்கைகள் தொடர்பில் அறிவித்தல் வழங்குதல் மற்றும் அரசாங்கக் கொள்கைகளுக்கு ஏற்ப செயற்பட வேண்டிய கடப்பாடு உள்ளிட்ட ஏற்பாடுகள் இதில் உள்ளடக்கப்பட்டுள்ளதாக அந்த அமைப்பு குறிப்பிட்டுள்ளது.

மேலும், நிர்வாகத் தவறுகள் அல்லது தகவல்களை வழங்கத் தவறுதல் போன்ற காரணங்களுக்காக அதிகபட்சமாக 10 இலட்சம் ரூபாய் வரை அபராதம் விதிக்கக்கூடிய ஏற்பாடுகளும் முன்மொழியப்பட்டுள்ளதாகத் தெரிவிக்கப்பட்டுள்ளது.

இத்தகைய நடவடிக்கைகள் கருத்துச் சுதந்திரம், ஒன்றுகூடுவதற்கான சுதந்திரம் மற்றும் பொதுமக்களின் பங்கேற்பு ஆகியவற்றைக் கட்டுப்படுத்தக்கூடும் என FCEJ எச்சரித்துள்ளது.

அரசாங்கம் தனது கொள்கைகளை மறுபரிசீலனை செய்ய வேண்டும்

2026ஆம் ஆண்டில் பயங்கரவாத நிதியளிப்பை ஒடுக்குதல், பணமோசடியைத் தடுத்தல் மற்றும் நிதிப் பரிவர்த்தனைகளை அறிக்கையிடுதல் தொடர்பான சட்டத் திருத்தங்கள் உள்ளிட்ட பல சட்டங்கள் அறிமுகப்படுத்தப்பட்டுள்ளதாக FCEJ தனது அறிக்கையில் சுட்டிக்காட்டியுள்ளது.

இவை தனியுரிமையில் அரசின் தலையீட்டையும் கண்காணிப்பு நடவடிக்கைகளையும் அதிகரிக்கக்கூடும் என அந்த அமைப்பு தெரிவித்துள்ளது.

அதேவேளை, சிறுநிதி மற்றும் கடன் ஒழுங்குபடுத்தல் அதிகாரசபைச் சட்டம், கடன் சுமையால் பாதிக்கப்படுபவர்களைப் பாதுகாப்பதற்குப் போதுமான ஏற்பாடுகளைக் கொண்டிருக்கவில்லை என்றும் விமர்சித்துள்ளது.

தேசிய மக்கள் சக்தி அரசாங்கம் ஆட்சிக்கு வந்தபோது சுரண்டல் மற்றும் ஒடுக்குமுறையை முடிவுக்குக் கொண்டுவருவதாக மக்களுக்கு வாக்குறுதி அளித்திருந்தபோதிலும், தற்போது நடைமுறைப்படுத்தப்படும் பொருளாதாரக் கொள்கைகளும் சட்டங்களும் அந்த நோக்கத்திலிருந்து விலகிச் செல்வதாக FCEJ குற்றஞ்சாட்டியுள்ளது.

குறிப்பாக, பொருளாதார ஸ்திரத்தன்மையை முன்னிறுத்தி மேற்கொள்ளப்படும் நடவடிக்கைகள் சாதாரண மக்களின் வாழ்வாதாரத்தைப் பாதிப்பதுடன், உழைக்கும் பெண்கள் உள்ளிட்ட பாதிக்கப்படக்கூடிய சமூகப் பிரிவினரின் சுமைகளையும் அதிகரிப்பதாக அந்த அமைப்பு தெரிவித்துள்ளது.

எனவே, முன்மொழியப்பட்டுள்ள சட்டமூலங்களையும் பொருளாதாரக் கொள்கைகளையும் அரசாங்கம் மறுபரிசீலனை செய்து, பொதுமக்களின் கருத்துகளுக்கும் கவலைகளுக்கும் உரிய முக்கியத்துவம் அளிக்க வேண்டும் என FCEJ வலியுறுத்தியுள்ளது.

பொருளாதார நீதிக்கான பெண்ணியக் கூட்டமைப்பான FCEJ, 2022ஆம் ஆண்டு ஏப்ரல் மாதம் உருவாக்கப்பட்டது. பெண்ணியப் பொருளாதார நிபுணர்கள், கல்வியாளர்கள், செயற்பாட்டாளர்கள், பல்கலைக்கழக மாணவர்கள் மற்றும் சட்டத்தரணிகளை உள்ளடக்கிய இந்த அமைப்பு, இலங்கையின் பொருளாதார நெருக்கடியால் மக்கள் எதிர்கொள்ளும் பிரச்சினைகளை ஆராய்ந்து, அவற்றின் அடிப்படையில் கொள்கை மாற்றங்களுக்கான பரிந்துரைகளை முன்வைத்து வருகின்றமை குறிப்பிடத்தக்கது.