பறக்கும் திறன் கொண்ட புதிய டெஸ்லா ரோட்ஸ்டரை அறிமுகப்படுத்திய எலான் மஸ்க்!

உலகப் புகழ்பெற்ற தொழில்நுட்பத் தொழிலதிபர் எலான் மஸ்க், டெஸ்லா நிறுவனத்தின் நீண்டகாலமாக எதிர்பார்க்கப்பட்ட புதிய மின்சாரக் காரான டெஸ்லா ரோட்ஸ்டரை (Tesla Roadster) அறிமுகப்படுத்தி, அதன் வியக்கத்தக்க செயல்திறனை நேரடி நிகழ்வில் காட்சிப்படுத்தியுள்ளார்.

வியாழக்கிழமை இரவு நேரலையாக ஒளிபரப்பப்பட்ட நிகழ்வில், பார்வையாளர்கள் முன்னிலையில் புதிய ரோட்ஸ்டர் காரின் சிறப்பம்சங்களை எலான் மஸ்க் எடுத்துரைத்தார்.

இந்தக் கார் செயற்கை நுண்ணறிவுத் தொழில்நுட்பத்தால் உருவாக்கப்பட்ட காட்சியல்ல என்பதை உறுதிப்படுத்தவே நேரடி பார்வையாளர்கள் அழைக்கப்பட்டதாகத் தெரிவித்த அவர், தாங்கள் நேரில் பார்த்ததை மற்றவர்களிடம் தெரிவிக்குமாறும் குறிப்பிட்டார்.

தலைகீழாகச் சென்று வானில் பறந்த கார்!

நிகழ்வின் முக்கிய அம்சமாக, ரோட்ஸ்டர் கார் உயரமான வளைவுப் பாதையில் வேகமாகச் சென்று, தலைகீழாகத் திரும்பிய நிலையில் பயணித்த பின்னர், பாதையின் முடிவிலிருந்து காற்றில் பாய்ந்து, அந்தரத்தில் சுழன்று மீண்டும் பாதுகாப்பாகத் தரையிறங்கியது. இதனைப் பார்த்த பார்வையாளர்கள் உற்சாகக் குரல் எழுப்பினர்.

இதையடுத்து, “சரி, இது வேலை செய்துவிட்டது” என எலான் மஸ்க் நகைச்சுவையாகக் குறிப்பிட்டார்.

டெஸ்லா நிறுவனத்தின் வாகனப் பொறியியல் பிரிவின் துணைத் தலைவர் லார்ஸ் மொராவி, இந்தக் காரின் அடிப்பகுதியில் பொருத்தப்பட்டுள்ள விசேட காற்றுறிஞ்சும் அமைப்பு, காரைத் தலைகீழாகச் செலுத்துவதற்குத் தேவையான விசையை உருவாக்குவதாக விளக்கினார்.

மேலும், ஸ்பேஸ்எக்ஸ் (SpaceX) நிறுவனத்தின் சில தொழில்நுட்பங்களும் இந்தக் காரில் பயன்படுத்தப்பட்டுள்ளதாக அவர் தெரிவித்தார்.

ரொக்கெட் போன்று பறக்கும் திறன்!

ரோட்ஸ்டர் காரில் உயரத்தைக் கட்டுப்படுத்தும் உந்துவிசை அமைப்புகளும், பின்புறத்தில் பிரதான உந்துவிசை அமைப்புகளும் உள்ளதாக எலான் மஸ்க் தெரிவித்தார். இதன் மூலம், இந்தக் காரை ரொக்கெட் போன்று பறக்கச் செய்ய முடியும் என்றும் அவர் கூறினார்.

மேலும், அந்தரத்தில் சுழல்வது உள்ளிட்ட பல்வேறு சாகச அசைவுகளையும் இந்தக் கார் மேற்கொள்ளும் என அவர் குறிப்பிட்டார். அதேவேளை, இது பாதுகாப்பை முதன்மையாகக் கொண்டு வடிவமைக்கப்பட்ட கார் அல்ல என்றும் நகைச்சுவையாகத் தெரிவித்தார்.

மற்றொரு சாகசக் காட்சியில், வரிசையாக நிறுத்தப்பட்டிருந்த டெஸ்லா கார்களை நோக்கிச் சென்ற ரோட்ஸ்டர், திடீரெனக் காற்றில் பாய்ந்து அவற்றுக்கு மேலாகச் சுழன்று கடந்து சென்றது.

அத்துடன், இந்தக் கார் மணிக்கு பூஜ்ஜியத்திலிருந்து 60 மைல் வேகத்தை ஒரு விநாடிக்கும் குறைவான நேரத்தில் எட்டும் திறனைக் கொண்டிருப்பதாகவும் நிகழ்வில் காட்சிப்படுத்தப்பட்டது.

மூன்று வகைகளில் முன்பதிவு

டெஸ்லா நிறுவனத்தின் இணையத்தளத் தகவலின்படி, புதிய ரோட்ஸ்டர் காருக்கு தற்போது முன்பதிவுகள் ஏற்றுக்கொள்ளப்படுகின்றன. இந்தக் கார் Performance, Thrust மற்றும் Rocket என மூன்று வகைகளில் அறிமுகப்படுத்தப்பட்டுள்ளது. இதில் Rocket வகையைப் பெறுவதற்கு நிறுவனத்தின் அழைப்பு அவசியம் எனக் குறிப்பிடப்பட்டுள்ளது.

டெஸ்லா வெளியிட்டுள்ள தகவலின்படி, இந்தக் கார் ஒருமுறை முழுமையாக மின்னேற்றம் செய்யப்பட்டால் 300 மைல்களுக்கும் அதிகமான தூரம் பயணிக்கக்கூடியது. Rocket வகையின் அதிகபட்ச வேகம் மணிக்கு 230 மைல்களுக்கும் அதிகமாக இருக்கும் எனவும் தெரிவிக்கப்பட்டுள்ளது.

பறக்கும் திறன், அதிவேகம் மற்றும் விண்வெளித் தொழில்நுட்பங்களை அடிப்படையாகக் கொண்ட இந்தக் கார், எதிர்கால மின்சார வாகனத் துறையில் புதிய எதிர்பார்ப்புகளை ஏற்படுத்தியுள்ளது.