திருநெல்வேலி சிறுவர் இல்ல மாணவன் தலையில் காயம்: ஆசிரியர் மீதான தாக்குதல் குற்றச்சாட்டை விசாரிக்கக் கோரிக்கை
யாழ்ப்பாணம், திருநெல்வேலி சைவ ஆண் சிறுவர் இல்லத்தில் தங்கியுள்ள மாணவன் ஒருவர், அங்கு கற்பிக்க வந்த ஆசிரியர் தாக்கியதாகக் கூறப்படும் சம்பவத்தில் தலையில் காயமடைந்துள்ளார். மாணவன் இணுவிலில் உள்ள தனியார் வைத்தியசாலையில் அனுமதிக்கப்பட்டு சிகிச்சை பெற்றதாகத் தெரிவிக்கப்படுகிறது.
இல்லத்தில் இரவு நேர வகுப்புகளை நடத்துவதற்காக, சைவ வித்தியா விருத்திச் சங்கத்தின் கல்வித் திட்டப் பணிப்பாளரின் பரிந்துரையின் பேரில் குறித்த ஆசிரியர் பணிக்கு அமர்த்தப்பட்டதாகக் கூறப்படுகிறது. இந்த நியமனத்துக்கு இல்லத்தின் முகாமைத்துவச் சபையின் அனுமதி பெறப்படவில்லை என்றும், ஆசிரியரின் நடத்தை குறித்து ஏற்கெனவே முறைப்பாடுகள் முன்வைக்கப்பட்டபோதும் சங்க நிர்வாகம் நடவடிக்கை எடுக்கவில்லை என்றும் குற்றச்சாட்டுகள் முன்வைக்கப்பட்டுள்ளன.
காயமடைந்த மாணவனை அருகிலுள்ள யாழ்ப்பாணம் போதனா வைத்தியசாலையில் அனுமதிக்காமல், இணுவிலில் உள்ள தனியார் வைத்தியசாலைக்கு அழைத்துச் சென்றது சம்பவத்தை மறைக்கும் நோக்கிலேயே எனவும் குற்றம் சாட்டப்பட்டுள்ளது.
சம்பவம் தொடர்பில் சங்க நிர்வாகம் பொலிஸில் முறைப்பாடு செய்யவில்லை என்றும், சிறுவர் நன்னடத்தைப் பிரிவுக்குத் தகவல் தெரிந்திருந்தும் விசாரணை முன்னெடுக்கப்படவில்லை என்றும் குற்றச்சாட்டுகள் எழுந்துள்ளன.
ஆசிரியரின் நியமனம் குறித்தும் மாணவன் மீதான தாக்குதல் குற்றச்சாட்டு குறித்தும் விசாரிக்கக் கோரிய சங்கத்தின் பொதுச்சபைச் செயலாளரை, நிர்வாகத்தைச் சேர்ந்த சிலர் தாக்க முயன்றதாகவும் தெரிவிக்கப்படுகிறது.
சிறுவர் நன்னடத்தைத் திணைக்களம், சிறுவர் நீதிமன்றம் மற்றும் வடக்கு மாகாண ஆளுநர் உள்ளிட்ட தரப்புகள் உரிய விசாரணையை முன்னெடுக்க வேண்டும் எனக் கோரியுள்ள பொதுச்சபைச் செயலாளர், சம்பந்தப்பட்ட தரப்புகளுக்கு எழுத்துமூலம் முறைப்பாடுகளை அனுப்பியுள்ளதாகத் தெரிவித்துள்ளார்.
