2023க்குப் பின்னரான அனைத்து தேர்தல்களையும் ரத்து செய்ய பிரகாஷ் ராஜ் கோரிக்கை
இந்தியாவில் 2023 ஆம் ஆண்டிற்குப் பின்னர் நடாத்தப்பட்ட அனைத்துத் தேர்தல்களையும் ரத்து செய்ய வேண்டும் எனப் பிரபல நடிகரும் சமூக ஆர்வலருமான பிரகாஷ் ராஜ் வலியுறுத்தியுள்ளார்.
சென்னை பத்திரிகையாளர் மன்றத்தில் இடம்பெற்ற ஊடகவியலாளர் சந்திப்பிலேயே அவர் இந்தக் கோரிக்கையை முன்வைத்துள்ளார். அங்கு அவர் மேலும் உரையாற்றுகையில்:
"தீவிர வாக்காளர் பட்டியல் திருத்தப் பணிகளின் ஊடாக வாக்காளர் பட்டியலிலிருந்து சுமார் 13 கோடி மக்களின் பெயர்கள் நீக்கப்பட்டுள்ளன. ஜனநாயக நாட்டில் மக்களுக்கு இருக்கக்கூடிய முதன்மையான உரிமை வாக்குரிமை மட்டுமேயாகும்.
எனினும், தற்பொழுது 13 கோடி மக்களின் அடிப்படை உரிமை பறிக்கப்பட்டுள்ளது. இதனை வெறும் 'வாக்காளர் நீக்கம்' என்ற கோணத்தில் மட்டும் பார்க்க முடியாது. பாரதிய ஜனதா கட்சி (BJP) தலைமையிலான அரசு, தேர்தல் ஆணையரைத் தேர்வு செய்யும் குழுவில் மாற்றங்களை மேற்கொண்டதிலிருந்தே இந்தப் பிரச்சினை ஆரம்பமாகிவிட்டது. அத்துடன், இதனைச் சரியாகக் கண்காணிக்க வேண்டிய உச்ச நீதிமன்றமும் இதற்குத் துணையாக இருந்துள்ளது.
எனவே, தலைமைத் தேர்தல் ஆணையர் ஞானேஷ் குமாரைப் பதவியிலிருந்து நீக்கி, அவர் மீது முறையான விசாரணைகளை நடத்த வேண்டும். அதுமட்டுமன்றி, 2023 ஆம் ஆண்டிற்குப் பின்னர் நடாத்தப்பட்ட அனைத்துத் தேர்தல்களையும் முழுமையாக ரத்து செய்ய வேண்டும். இந்த அநீதிக்கு எதிராக மக்கள் அனைவரும் வீதியில் இறங்கிப் போராட முன்வர வேண்டும்.
ஊடகங்களின் குரலே மக்களின் குரலாகும். இந்தியப் பிரதமர் நரேந்திர மோடி ஊடகவியலாளர்களைச் சந்திப்பதில்லை. இதே கருத்தையே தமிழகத்தின் தமிழக வெற்றிக் கழகத் தலைவர் விஜய் அவர்களுக்கும் நான் கூற விரும்புகிறேன்" எனத் தெரிவித்தார்.
