இந்தியத் திரைத்துறையின் சிரேஷ்ட நடிகரான நானா படேக்கர் மாரடைப்பால் காலமானார்

இந்தியத் திரைப்படத்துறையின் புகழ்பெற்ற மூத்த நடிகரும் இயக்குநருமான நானா படேக்கர் (Nana Patekar - 75), கோவாவிலுள்ள (Goa) அவரது இல்லத்தில் ஏற்பட்ட திடீர் மாரடைப்பு காரணமாக வியாழக்கிழமை (அக்டோபர் 08) காலமானதாக இந்திய ஊடகங்கள் செய்தி வெளியிட்டுள்ளன.

கோவா, தோனா பவுலாவிலுள்ள அவரது வீட்டில் சுயநினைவற்ற நிலையில் கண்டெடுக்கப்பட்ட படேக்கர், உடனடியாக மணிப்பால் மருத்துவமனைக்குக் கொண்டு செல்லப்பட்டார். அங்கு அவருக்குச் தீவிர சிகிச்சை அளிக்கப்பட்டு, சுமார் 45 நிமிடங்கள் வரை அவரை மீண்டும் சுயநினைவுக்குக் கொண்டுவர மருத்துவர்கள் முயன்றனர்.

எனினும், தொடர்ச்சியான இதய நுரையீரல் புத்துயிரூட்டல் சிகிச்சைகள் அளிக்கப்பட்ட போதிலும், அதிகாலை 5:20 மணியளவில் அவர் உயிரிழந்துவிட்டதாக மருத்துவமனையின் புற்றுநோயியல் துறைத் தலைவர் டாக்டர் சேகர் சல்கார் உறுதிப்படுத்தினார்.

இச்சம்பவம் தொடர்பில் சட்டப்பூர்வ மருத்துவ வழக்கு பதிவு செய்யப்பட்டுள்ளதாகவும், பிரேதப் பரிசோதனை நடத்தப்படும் என்றும் மருத்துவமனை நிர்வாகம் தெரிவித்துள்ளது.

தனது தந்தையின் மறைவை உறுதிப்படுத்திய அவரது மகன் மல்ஹார் படேக்கர் (Malhar Patekar), புனேவில் (Pune) இருந்து கோவாவுக்குப் பயணித்துக்கொண்டிருப்பதாகவும், விரைவில் இது குறித்த விரிவான அறிக்கையை வெளியிடவுள்ளதாகவும் 'தி இந்தியன் எக்ஸ்பிரஸ்' நாளிதழுக்குத் தெரிவித்தார்.

ஹிந்தி மற்றும் மராத்தி திரையுலகில் தனது தனித்துவமான வசன உச்சரிப்பாலும், சக்திவாய்ந்த நடிப்பாலும் இந்திய அளவில் பெருமதிப்பைப் பெற்ற நடிகர்களில் நானா படேக்கரும் ஒருவர்.

நான்கு தசாப்தங்களுக்கும் மேலாக நீடித்த இவரது திரையுலகப் பயணத்தில், பரிந்தா, கிராந்திவீர் , அக்னி சாட்சி , அப் தக் சப்பன, வெல்கம் மற்றும் நட்சம்ராட் உள்ளிட்ட திரைப்படங்கள் குறிப்பிடத்தக்கவை. மேலும், 'பிரஹார்: தி பைனல் அட்டாக்' என்ற விமர்சன ரீதியாகப் பாராட்டு பெற்ற திரைப்படத்தையும் இவர் இயக்கியுள்ளார்.

தனது திரைச் சேவைக்காக மூன்று தேசிய திரைப்பட விருதுகள் உட்படப் பல மதிப்புமிக்க விருதுகளைப் பெற்றுள்ள இவர், 2013 ஆம் ஆண்டு இந்தியாவின் நான்காவது உயரிய சிவிலியன் விருதான பத்மஸ்ரீ விருதைப்பெற்று கௌரவிக்கப்பட்டார்.

திரைத்துறையைத் தாண்டி, மகாராஷ்டிராவில் உள்ள விவசாயிகள் மற்றும் கிராமப்புற சமூகங்களுக்கு ஆதரவளிக்கும் பல்வேறு தொண்டு நடவடிக்கைகளிலும் இவர் தீவிரமாக ஈடுபட்டு வந்தார்.

இவரது மறைவு இந்தியத் திரைத்துறைக்கு ஈடுசெய்ய முடியாத பெரும் இழப்பாகக் கருதப்படுகிறது.