டிக்டொக் காணொளி படப்பிடிப்பின்போது வனவிலங்கு தாக்கி 19 வயது இளைஞர் உயிரிழப்பு – பாகிஸ்தானில் இருவர் கைது
பாகிஸ்தானின் லாகூரில், டிக்டொக் காணொளி ஒன்றைப் பதிவு செய்வதற்கான ஏற்பாடுகளின்போது பெரிய ரக வனவிலங்கு ஒன்று தாக்கியதில் 19 வயதுடைய இளைஞர் ஒருவர் உயிரிழந்துள்ளார்.
இந்தச் சம்பவம் தொடர்பில் சமூக ஊடகப் பிரபலமான நௌமான் ஹசன் மற்றும் தனியார் பண்ணையின் உரிமையாளர் ஃபயாஸ் ஆகிய இருவர் பொலிஸாரால் கைது செய்யப்பட்டுள்ளனர்.
கஹ்னா பகுதியில் அமைந்துள்ள வனவிலங்கு இனப்பெருக்கப் பண்ணையில் பணியாற்றி வந்த தல்ஹா என்ற இளைஞரே இவ்வாறு உயிரிழந்துள்ளார்.
பொலிஸாரின் தகவலின்படி, குறித்த பண்ணைக்கு வந்த டிக்டொக் பிரபலமான நௌமான் ஹசன், வனவிலங்கைப் பயன்படுத்தி சமூக ஊடகக் காணொளியொன்றைப் பதிவு செய்யத் திட்டமிட்டுள்ளார்.
இதற்கான தயாரிப்புகள் இடம்பெற்றுக்கொண்டிருந்தபோது கட்டுப்பாட்டை இழந்த வனவிலங்கு, அங்கிருந்த இளைஞரைத் தாக்கியுள்ளது.
இதில் பலத்த காயமடைந்த தல்ஹா உடனடியாகத் தனியார் வைத்தியசாலையில் அனுமதிக்கப்பட்ட போதிலும், சிகிச்சை பலனின்றி உயிரிழந்துள்ளார்.
இந்நிலையில், இளைஞரின் மரணத்திற்கான உண்மையான காரணத்தை மறைப்பதற்கு முயற்சி மேற்கொள்ளப்பட்டுள்ளதாகவும் விசாரணைகளில் தெரியவந்துள்ளது.
அதாவது, விலங்கின் தாக்குதலுக்குப் பதிலாக நாய் கடித்ததாலேயே இளைஞருக்குக் காயம் ஏற்பட்டதாகக் கூறி சம்பவத்தைத் திசைதிருப்ப முயற்சி செய்யப்பட்டதாகப் பொலிஸார் தெரிவித்துள்ளனர்.
எனினும், பொலிஸ் விசாரணைகளில் பெரிய ரக வனவிலங்கின் தாக்குதலே மரணத்திற்குக் காரணம் என்பது உறுதிப்படுத்தப்பட்டுள்ளது.
இதனையடுத்து, குறித்த விலங்கு பஞ்சாப் வனவிலங்கு திணைக்களத்தினால் பொறுப்பேற்கப்பட்டுள்ளது.
மேலும், அந்தப் பண்ணையில் வனவிலங்கை வைத்திருப்பதற்கான உரிய அனுமதிகள் பெறப்பட்டிருந்தனவா, போதிய பாதுகாப்பு ஏற்பாடுகள் செய்யப்பட்டிருந்தனவா என்பது தொடர்பிலும் அதிகாரிகள் விசாரணைகளை முன்னெடுத்து வருகின்றனர்.
இந்தச் சம்பவத்தில் கவனக்குறைவு இடம்பெற்றுள்ளதா மற்றும் மரணத்திற்கான உண்மையான காரணத்தை மறைக்க முயற்சி செய்யப்பட்டதா என்பதும் விசாரணைக்கு உட்படுத்தப்பட்டுள்ளது.
இது தொடர்பில் கருத்துத் தெரிவித்த லாகூர் பொலிஸ் நடவடிக்கைப் பிரிவின் பிரதி பொலிஸ் மா அதிபர் பைசல் கம்ரான், பொழுதுபோக்கு அல்லது சமூக ஊடகக் காணொளிகளுக்காக மனித உயிர்களை ஆபத்தில் ஆழ்த்த முடியாது எனத் தெரிவித்துள்ளார்.
சம்பவம் தொடர்பில் குற்றவியல் வழக்குப் பதிவு செய்யப்பட்டுள்ளதுடன், உயிரிழந்த இளைஞரின் சடலம் பிரேதப் பரிசோதனைக்காக அனுப்பி வைக்கப்பட்டுள்ளது.
இந்தச் சம்பவம், சமூக ஊடகக் காணொளிகளை உருவாக்குவதற்காக ஆபத்தான வனவிலங்குகளைப் பயன்படுத்துவது மற்றும் தனியார் வனவிலங்கு பண்ணைகளில் பணியாற்றுவோரின் பாதுகாப்பு தொடர்பில் பாகிஸ்தானில் மீண்டும் கவலையை ஏற்படுத்தியுள்ளது.
