தவெகவில் இணைந்தார் அதிமுக முன்னாள் அமைச்சர் செம்மலை!
தமிழகத்தின் தாராபுரத்தில் நடைபெற்ற தேர்தல் பிரச்சாரப் பொதுக்கூட்ட மேடையில், அனைத்திந்திய அண்ணா திராவிட முன்னேற்றக் கழகத்தின் (AIADMK) முன்னாள் அமைச்சரான செம்மலை, தமிழக வெற்றிக் கழகத்தின் (TVK) தலைவர் விஜய் முன்னிலையில் இன்று முறைப்படி கட்சியில் இணைந்தார்.
தமிழகத்தின் மதுராந்தகம் மற்றும் தாராபுரம் ஆகிய இரண்டு சட்டமன்றத் தொகுதிகளுக்கான இடைத்தேர்தல் விரைவில் நடைபெறவுள்ளது. ஏற்கனவே இத்தொகுதிகளில் அதிமுக சார்பில் போட்டியிட்டு வெற்றி பெற்ற சட்டமன்ற உறுப்பினர்களான மரகதம் குமரவேல் மற்றும் சத்யபாமா ஆகியோர் தமது பதவிகளை ராஜினாமா செய்துவிட்டு, தவெகவில் இணைந்துள்ளனர். இதனைத் தொடர்ந்து, தற்போதைய இடைத்தேர்தலில் அவர்கள் இருவரும் தமிழக வெற்றிக் கழகத்தின் அதிகாரப்பூர்வ வேட்பாளர்களாகக் களமிறக்கப்பட்டுள்ளனர்.
கடந்த சில நாட்களாக மதுராந்தகத்தில் தீவிர தேர்தல் பிரச்சாரத்தில் ஈடுபட்ட தவெக தலைவர் விஜய், இன்றைய தினம் தாராபுரத்தில் பிரம்மாண்ட பிரச்சாரத்தை மேற்கொண்டார். இந்நிகழ்வின் போதே, அதிமுக தலைமை மீது கடந்த சில நாட்களாக அதிருப்தியில் இருந்துவந்த முன்னாள் அமைச்சர் செம்மலை தவெகவில் இணைந்தார்.
இன்று மாலை பிரச்சாரக் கூட்டத் திடலுக்கு வருகை தந்த தவெக தலைவர் விஜய்யை, கட்சியின் பொன்னாடையுடன் வருகை தந்த செம்மலை நேரில் வரவேற்றார். தொடர்ந்து செம்மலை கொண்டு வந்த கட்சித் துண்டை வாங்கி, அவரின் கழுத்தில் அணிவித்து அவரைத் தவெக தலைவர் விஜய் முறைப்படி கட்சியில் இணைத்துக் கொண்டார்.
முன்னதாக, பிரச்சார மேடைக்கு வருகை தந்திருந்த செம்மலை, தவெகவின் முக்கிய நிர்வாகிகளுடன் கலந்துரையாடலில் ஈடுபட்டிருந்தார். அதனைத் தொடர்ந்து கட்சியின் தலைவர் விஜய் முன்னிலையில் இணைந்தது, வரவிருக்கும் இடைத்தேர்தல் களம் மற்றும் தமிழக அரசியல் சூழலில் பெரும் பரபரப்பை ஏற்படுத்தியுள்ளது.
