சாலை வசதியில்லை: கர்ப்பிணியை 8 கி.மீ. தூளியில் சுமந்து சென்ற உறவினர்கள்!
ஆந்திரப் பிரதேசத்தில் சாலை வசதியற்ற மலைக்கிராமத்தைச் சேர்ந்த கர்ப்பிணித் தாய் ஒருவர், உறவினர்களால் தூளியில் வைத்து 8 கிலோமீற்றர் தூரம் சுமந்து செல்லப்பட்டு மருத்துவமனையில் அனுமதிக்கப்பட்ட சம்பவம் பெரும் பரபரப்பை ஏற்படுத்தியுள்ளது.
ஆந்திரப் மாநிலத்தின் அல்லூரி சீதாராம ராஜு மாவட்டத்தின் தடகபல்லி எனும் தொலைதூர மலைக்கிராமத்தைச் சேர்ந்த மங்கராஜு என்பவரின் மனைவி தாமினி (27) என்பவருக்கே இந்நிலை ஏற்பட்டுள்ளது.
ஒன்பது மாத கர்ப்பிணியான தாமினிக்குக் கடந்த வியாழக்கிழமை திடீரெனக் கடும் பிரசவ வலி ஏற்பட்டது. எனினும், அக்கிராமத்திலிருந்து 8 கிலோமீற்றர் தொலைவில் உள்ள ஆரம்ப சுகாதார மையத்தை அடைவதற்கு முறையான பாதை வசதிகள் எதுவுமில்லை. அத்துடன், அடர்ந்த காடுகள், மலைப் பாதைகள் மற்றும் நீர்நிலைகளைக் கடந்து செல்வதுடன், அண்மையில் பெய்த கனமழை காரணமாகப் பாதைகள் முற்றிலும் சேதமடைந்திருந்தன.
இதன் காரணமாக, ஆபத்தான நிலையிலிருந்த கர்ப்பிணியைக் காப்பாற்றும் நோக்கில், உறவினர்கள் அவரைத் துணியால் செய்யப்பட்ட தூளி ஒன்றில் அமரவைத்து, கரடுமுரடான மலைப்பாதை வழியாக 8 கிலோமீற்றர் தூரத்திற்குச் சுமந்து சென்றனர்.
அதன்பின்னர், சாமகட்டா எனும் பகுதியை அடைந்ததும் அங்கிருந்து ஜீப் (Jeep) வாகனம் மூலம் சிந்தபல்லி பகுதியில் அமைந்துள்ள பிராந்திய மருத்துவமனைக்கு அவர் கொண்டு செல்லப்பட்டார்.
மருத்துவமனையில் அனுமதிக்கப்பட்ட தாமினிக்கு உடனடியாக அவசர சிகிச்சைகள் வழங்கப்பட்டதை அடுத்து, அவர் அழகான பெண் குழந்தையொன்றைப் பெற்றெடுத்துள்ளார். தற்போது தாயும் சேயும் ஆரோக்கியமாக இருப்பதாகப் பரிசோதனைகளை மேற்கொண்ட மருத்துவர்கள் உறுதிப்படுத்தியுள்ளனர்.
அடிப்படைச் சாலை வசதிகளோ மின்விளக்கு வசதிகளோ இன்றித் தாம் அன்றாடம் பெரும் அசௌகரியங்களைச் சந்தித்து வருவதாகச் சுட்டிக்காட்டியுள்ள அப்பகுதி மலைவாழ் மக்கள், தடகபல்லி கிராமத்திலிருந்து சாமகட்டா வரையிலான வீதிகளை உடனடியாகப் புனரமைத்துத் தருமாறு அதிகாரிகளுக்குக் கோரிக்கை விடுத்துள்ளனர்.
