செயற்கை நுண்ணறிவு வளர்ச்சியால் கேரளப் பெண்களுக்குப் புதிய வேலைவாய்ப்புகள்!

இந்தியாவில் செயற்கை நுண்ணறிவு (AI - Artificial Intelligence) தொழில்நுட்பம் வேகமாக வளர்ச்சியடைந்து வரும் நிலையில், கேரளாவைச் சேர்ந்த பல பெண்களுக்கு அது புதிய வேலைவாய்ப்புகளை உருவாக்கித் தந்துள்ளது. செயற்கை நுண்ணறிவு அமைப்புகளுக்குப் பயிற்சியளிப்பதற்குத் தேவையான பெருமளவிலான தரவுகளை அடையாளம் கண்டு, அவற்றுக்குக் குறியீடு செய்யும் பணிகளுக்கான தேவை அதிகரித்துள்ளதே இதற்கு முதன்மைக் காரணமாகும்.

கேரளாவைச் சேர்ந்த ரோஷ்னி எம். என்ற பெண்ணுக்கு இந்தத் தரவுக் குறியீட்டுப் பணி, ஒரு வருமான மூலமாக மட்டுமின்றி, அவரது நிதி சார்ந்த சுதந்திரத்தையும் உறுதிப்படுத்தியுள்ளது. தனது தந்தையின் மறைவுக்குப் பிறகு, குடும்பத்திற்கு நிதியுதவி செய்வதற்காக ரோஷ்னி இந்தப் பணியில் சேர்ந்தார். தற்போது செயற்கை நுண்ணறிவு அமைப்புகளுக்குப் பயிற்சியளிக்கும் தரவுகளைச் சேகரித்து குறியீடு செய்யும் 'இன்ஃபோக்ஸ்' (Infolks) என்ற முன்னணித் தொழில்நுட்ப நிறுவனத்தில் பணிபுரியும் நூற்றுக்கணக்கான ஊழியர்களில் அவரும் ஒருவர்.

இது குறித்து கருத்து தெரிவித்த ரோஷ்னி, "இப்போது நான் ஒரு சுயாதீனமான நபர் போல உணர்கிறேன். சொந்தமாகச் சம்பாதிக்கிறேன், பிறரைச் சார்ந்திருக்காமல் எனது சொந்தக் காலில் நிற்கிறேன். நிதி சார்ந்த சுதந்திரம் என்பது ஒரு தனித்துவமான உணர்வை அளிக்கிறது" என மகிழ்ச்சியோடு தெரிவித்தார்.

கடந்த 2016 ஆம் ஆண்டு முஜீப் கொளச்சேரி என்பவரால் தொடங்கப்பட்ட 'இன்ஃபோக்ஸ்' நிறுவனம், கேரளாவின் வளர்ந்து வரும் தொழில்நுட்பத் துறையின் ஒரு முக்கிய அங்கமாகத் திகழ்கிறது. இந்தியாவின் பாரம்பரிய பெருநகர தொழில்நுட்ப மையங்களுக்கு வெளியே, கிராமப்புறப் பகுதிகளிலும் இத்தகைய வேலைவாய்ப்புகள் உருவாக்கப்பட்டு வருகின்றன.

செயற்கை நுண்ணறிவு அமைப்புகளின் வளர்ச்சியில் தரவுக் குறியீட்டுத் துறை மிக முக்கியப் பங்கு வகிக்கிறது. மனிதனைப் போலவே இயந்திரங்களும் சூழல்கள், பொருட்கள் மற்றும் பிற தகவல்களைச் சரியாக அடையாளம் கண்டு வேறுபடுத்தி அறிவதற்கு இதுவே அடிப்படையாகும்.

உதாரணமாக, தானியங்கி வாகனங்கள் வீதிகள், பிற வாகனங்கள், பாதசாரிகள் மற்றும் சுற்றியுள்ள பல்வேறு பொருட்களை அடையாளம் காண வேண்டியுள்ளது. புகைப்படங்கள் மற்றும் தரவுத் தொகுப்புகளில் உள்ள இந்த கூறுகளைக் குறியீடு செய்யும் பணியாளர்கள், செயற்கை நுண்ணறிவு அமைப்புகளுக்கு அவற்றை எவ்வாறு அடையாளம் காண்பது என்பதைக் கற்றுக்கொடுக்கின்றனர்.

தொழில்நுட்பத் துறையில் நுழைவதற்குப் போதிய வாய்ப்புகள் இல்லாத, படித்த பெண்களுக்கு இத்துறை ஒரு சிறந்த நல்வாய்ப்பாக அமைந்துள்ளது. மேலும், முந்தைய தலைமுறையினருடன் ஒப்பிடும்போது பெண்களின் கல்வி மற்றும் வேலைவாய்ப்பு குறித்த மக்களின் மனப்பான்மையில் பெரும் மாற்றம் ஏற்பட்டுள்ளதாக ரோஷ்னி சுட்டிக்காட்டினார்.

"எங்களது தாய்மார்கள் அல்லது உறவினர்கள், தோழிகளின் கதைகளைப் பார்க்கும்போது, அவர்கள் கல்வி கற்பதற்கும் வேலைக்குச் செல்வதற்கும் பெரும் போராட்டங்களைச் சந்தித்துள்ளனர் என்பதை அறிய முடிகிறது. ஆனால், இன்று கட்டமைப்பு வசதிகள் பெருமளவில் மாறியுள்ளன; மக்களின் எண்ண ஓட்டத்திலும் நேர்மறையான மாற்றங்கள் ஏற்பட்டுள்ளன" என்று அவர் மேலும் கூறினார்.

அதேவேளையில், கிராமப்புறங்களில் உள்ள சில பெண்களுக்கு இன்றும் வேலைவாய்ப்புகளும் பணிச்சூழல்களும் வரம்பிற்குட்பட்டதாகவே உள்ளன. மாற்று வேலைவாய்ப்புகள் குறைவாக உள்ள சூழலில், சம்பளம் அல்லது வேலை இடப் பிரச்சினைகள் குறித்துக் குரல் எழுப்பினால் வேலை பறிபோய்விடுமோ என்ற அச்சமும் சில கிராமப்புறப் பெண்களிடையே நிலவி வருகின்றமை குறிப்பிடத்தக்கது.