ஹேமாஸ் ஹோல்டிங்ஸ் நிறுவனத்தின் முதல் அரையாண்டு வருமானம் 9.5% அதிகரிப்பு – ரூ.66.6 பில்லியனாகப் பதிவு

இலங்கையின் முன்னணி நிறுவனங்களில் ஒன்றான ஹேமாஸ் ஹோல்டிங்ஸ் பிஎல்சி (Hemas Holdings PLC), 2026/2027 நிதியாண்டின் முதல் ஆறு மாதங்களில் தனது குழுமத்தின் மொத்த வருமானத்தை 9.5 சதவீதத்தால் அதிகரித்து 66.56 பில்லியன் ரூபாவாகப் பதிவு செய்துள்ளது.

நிறுவனத்தின் நான்கு முக்கிய வணிகப் பிரிவுகளிலும் இரண்டாவது காலாண்டில் பதிவான வளர்ச்சியே இந்த வருமான அதிகரிப்புக்குப் பிரதான காரணமாக அமைந்துள்ளது.

நிறுவனம் வெளியிட்டுள்ள அண்மைய நிதி அறிக்கையின்படி, கடந்த ஆண்டின் இதே காலப்பகுதியுடன் ஒப்பிடுகையில், இரண்டாவது காலாண்டில் குழுமத்தின் வருமானம் 17 சதவீதத்தால் அதிகரித்து 37.79 பில்லியன் ரூபாவாக உயர்ந்துள்ளது.

இக்காலாண்டில் வட்டி, வரி, தேய்மானம் மற்றும் கடன்தீர்வு முன்பான வருமானம் (EBITDA) 10.5 சதவீதத்தால் அதிகரித்து 4.50 பில்லியன் ரூபாவாகப் பதிவாகியுள்ளது. எனினும், குழுமத்தின் இலாபம் 3 சதவீதத்தால் குறைந்து 2 பில்லியன் ரூபாவாக அமைந்துள்ளது.

இருப்பினும், முதல் காலாண்டுடன் ஒப்பிடுகையில் இரண்டாவது காலாண்டின் இலாபம் 113.4 சதவீதத்தால் அதிகரித்துள்ளது.

முதல் ஆறு மாதங்களுக்கான EBITDA வருமானம் 0.9 சதவீதத்தால் அதிகரித்து 6.76 பில்லியன் ரூபாவாகப் பதிவான நிலையில், மொத்த இலாபம் 9.7 சதவீதத்தால் குறைந்து 2.94 பில்லியன் ரூபாவாக அமைந்துள்ளது.

நுகர்வோர் வர்த்தகப் பிரிவில் வளர்ச்சி

ஹேமாஸ் நிறுவனத்தின் நுகர்வோர் வர்த்தகப் பிரிவு (Consumer Brands), இரண்டாவது காலாண்டில் 18.3 சதவீத வருமான வளர்ச்சியைப் பதிவு செய்துள்ளது. இதன்படி, இப்பிரிவின் வருமானம் 15.57 பில்லியன் ரூபாவாக அதிகரித்துள்ளது.

அழகுசாதனப் பொருட்கள், வீட்டு உபயோகப் பொருட்கள் மற்றும் குழந்தைகளுக்கான பராமரிப்புப் பொருட்கள் ஆகிய பிரிவுகளில் இரட்டை இலக்க வளர்ச்சி பதிவாகியுள்ளது.

எனினும், அதிகரித்த செயற்பாட்டுச் செலவுகள் மற்றும் இலாப விகிதத்தின் மீதான அழுத்தம் காரணமாக இப்பிரிவின் இலாபம் 30.6 சதவீதத்தால் குறைந்து 1.11 பில்லியன் ரூபாவாகப் பதிவாகியுள்ளது.

சவாலான பொருளாதாரச் சூழலுக்கு மத்தியிலும் பங்களாதேஷ் நடவடிக்கைகளில் ஒற்றை இலக்க வருமான வளர்ச்சி பதிவாகியுள்ளதுடன், ஆண்களுக்கான சவரப் பராமரிப்புப் பொருட்கள் பிரிவில் சுமார் 50 சதவீத வளர்ச்சியும் ஏற்பட்டுள்ளதாக நிறுவனம் தெரிவித்துள்ளது.

வாழ்வியல் விஞ்ஞானப் பிரிவின் வருமானம் 16.2% அதிகரிப்பு

வாழ்வியல் விஞ்ஞானப் பிரிவின் (Life Sciences) இரண்டாவது காலாண்டு வருமானம் 16.2 சதவீதத்தால் அதிகரித்து 18.37 பில்லியன் ரூபாவாகப் பதிவாகியுள்ளது.

எனினும், இப்பிரிவின் இலாபம் 26.8 சதவீதத்தால் குறைந்து 623 மில்லியன் ரூபாவாக அமைந்துள்ளது.

ஹேமாஸ் மருந்துப் பொருட்கள் பிரிவு சந்தையில் தனது முன்னணி நிலையைத் தொடர்ந்து தக்கவைத்துள்ளதுடன், குறித்த காலாண்டில் ஆறு புதிய மருந்துப் பொருட்களுக்கான பதிவுகளையும் பெற்றுள்ளது.

மருந்துப் பொருட்களின் விலைக் கட்டுப்பாடுகள் மற்றும் இலங்கை ரூபாவின் பெறுமதி வீழ்ச்சி ஆகியவை இலாபத்தைக் குறைத்துள்ளதாக நிறுவனம் சுட்டிக்காட்டியுள்ளது.

அதேவேளை, மொரிசன் (Morison) நிறுவனத்தின் சொந்த வர்த்தகநாம மருந்துப் பொருட்களின் விற்பனை அளவு 23 சதவீதத்தால் அதிகரித்துள்ளது.

மருத்துவமனைப் பிரிவில் அதிக வளர்ச்சி

குழுமத்தின் நான்கு வணிகப் பிரிவுகளிலும் அதிகளவிலான வருமான வளர்ச்சியை மருத்துவமனைப் பிரிவு (Hospitals) பதிவு செய்துள்ளது.

இதன்படி, இப்பிரிவின் வருமானம் 19.3 சதவீதத்தால் அதிகரித்து 3.21 பில்லியன் ரூபாவாக உயர்ந்துள்ளது. இலாபமும் 26.9 சதவீதத்தால் அதிகரித்து 265 மில்லியன் ரூபாவாகப் பதிவாகியுள்ளது.

இதற்கிடையில், போக்குவரத்து மற்றும் சரக்குக் கையாளுதல் பிரிவின் (Mobility) வருமானம் 3.7 சதவீதத்தால் அதிகரித்து 646 மில்லியன் ரூபாவாகப் பதிவாகியுள்ளது.

அத்துடன், சரக்குப் போக்குவரத்துக் கட்டணங்களின் அதிகரிப்பு காரணமாக இப்பிரிவின் இலாபம் 23.7 சதவீதத்தால் உயர்ந்து 307 மில்லியன் ரூபாவாக அமைந்துள்ளது.

அதிகரித்த செலவுகளால் இலாப விகிதத்தில் பாதிப்பு

மத்திய கிழக்கு மோதல் நிலைமையுடன் தொடர்புடைய மூலப்பொருட்கள், எரிசக்தி மற்றும் சரக்குப் போக்குவரத்துச் செலவுகளின் அதிகரிப்பு நிறுவனத்தின் இலாப விகிதத்தில் தாக்கத்தை ஏற்படுத்தியுள்ளதாக ஹேமாஸ் நிறுவனம் தெரிவித்துள்ளது.

நுகர்வோருக்கான பொருட்களின் விலைகளை கட்டுப்படுத்தி விற்பனை அளவைப் பேணும் நோக்கில், அதிகரித்த செலவுகளின் பெரும்பகுதியை நிறுவனம் தானே ஏற்றுக்கொண்டுள்ளது.

இதன் காரணமாக, குழுமத்தின் மொத்த இலாப விகிதம் 3.1 சதவீதப் புள்ளிகளால் குறைந்து 29.7 சதவீதமாகப் பதிவாகியுள்ளது.

மேலும், அதிகரித்த நிதிச் செலவுகள் மற்றும் வரி விதிப்புகளும் ஒட்டுமொத்த இலாபத்தில் தாக்கத்தை ஏற்படுத்தியுள்ளன.

கிழக்கு ஆபிரிக்காவிலும் வர்த்தக விரிவாக்கம்

இதேவேளை, தனது சர்வதேச வர்த்தக விரிவாக்கத்தின் ஒரு பகுதியாக, கிழக்கு ஆபிரிக்காவின் முன்னணி எழுதுபொருள் உற்பத்தி மற்றும் ஏற்றுமதி நிறுவனமான ட்விகா ஸ்டேஷனர்ஸ் அன்ட் பிரிண்டர்ஸ் லிமிடெட் (Twiga Stationers & Printers Limited) நிறுவனத்தின் 75 சதவீத பங்குகளை ஹேமாஸ் ஹோல்டிங்ஸ் கைப்பற்றியுள்ளது.

இது நிறுவனத்தின் முதலாவது சர்வதேச கையகப்படுத்தல் நடவடிக்கையாகும். இந்த முதலீடு, கிழக்கு ஆபிரிக்கப் பிராந்தியத்தில் நீண்டகால வர்த்தக விரிவாக்கத்துக்கான அடித்தளத்தை ஏற்படுத்தும் என நிறுவனம் நம்பிக்கை வெளியிட்டுள்ளது.

எதிர்கால வளர்ச்சியைப் பொறுத்தவரையில், மருந்துப் பொருட்களின் விலைத் திருத்தங்கள், செலவுகளைக் கட்டுப்படுத்தும் நடவடிக்கைகள் மற்றும் 2027ஆம் ஆண்டில் அரச துறை ஊழியர்களுக்கான சம்பளத் திருத்தங்களின் மூன்றாம் கட்டம் ஆகியவை சாதகமான தாக்கத்தை ஏற்படுத்தும் என நிறுவனம் எதிர்பார்க்கிறது.

மேலும், புதிய வளர்ச்சி வாய்ப்புகளைப் பயன்படுத்திக் கொள்வதற்காக 100 மில்லியன் அமெரிக்க டொலர்களுக்கும் அதிகமான தொகையை முதலீடு செய்ய நிறுவனம் திட்டமிட்டுள்ளது.

2029/2030 நிதியாண்டுக்குள் தனது மொத்த வருமானத்தில் 15 சதவீதத்தை சர்வதேச சந்தைகளிலிருந்து ஈட்டுவதையும் ஹேமாஸ் ஹோல்டிங்ஸ் இலக்காகக் கொண்டுள்ளது.