இலங்கை போக்குவரத்துச் சபையின் 70 சதவீத பேருந்துகள் மட்டுமே சேவைக்கு தகுதி!
இலங்கை போக்குவரத்துச் சபையின் (SLTB) கீழ் பதிவு செய்யப்பட்டுள்ள 7,130 பேருந்துகளில் சுமார் 5,000 பேருந்துகள் மட்டுமே தற்போது சேவையில் ஈடுபடுத்துவதற்குத் தகுதியான நிலையில் உள்ளதாக போக்குவரத்து மற்றும் நெடுஞ்சாலைகள் பிரதி அமைச்சர் டொக்டர் பிரசன்ன குணசேன தெரிவித்துள்ளார்.
நாடாளுமன்றத்தில் இன்று (நவம்பர் 5) நாடாளுமன்ற உறுப்பினர் ரோஹித அபேகுணவர்தன எழுப்பிய கேள்விக்குப் பதிலளிக்கும்போதே அவர் இதனைக் குறிப்பிட்டுள்ளார்.
இலங்கை போக்குவரத்துச் சபையின் பேருந்துக் குழாமில் 6,987 சாதாரண பேருந்துகளும், 143 சொகுசுப் பேருந்துகளும் உள்ளடங்குவதாகத் தெரிவித்த பிரதி அமைச்சர், அவற்றில் 2,000-க்கும் மேற்பட்ட பேருந்துகள் சேவையில் ஈடுபடுத்த முடியாத நிலையில் இருப்பதாகவும் சுட்டிக்காட்டியுள்ளார்.
இதேவேளை, நாடளாவிய ரீதியில் சேவையில் ஈடுபடும் தனியார் பேருந்துகளின் எண்ணிக்கை தொடர்பான விபரங்களையும் அவர் நாடாளுமன்றத்தில் வெளியிட்டுள்ளார்.
இதற்கமைய, மேல் மாகாணத்தில் 5,524 தனியார் பேருந்துகளும், மத்திய மாகாணத்தில் 2,433 பேருந்துகளும், சபரகமுவ மாகாணத்தில் 1,866 பேருந்துகளும், தென் மாகாணத்தில் 1,326 பேருந்துகளும், வடமேல் மாகாணத்தில் 1,324 பேருந்துகளும் சேவையில் ஈடுபடுகின்றன.
மேலும், ஊவா மாகாணத்தில் 1,043 பேருந்துகளும், வடக்கு மாகாணத்தில் 976 பேருந்துகளும், கிழக்கு மாகாணத்தில் 520 பேருந்துகளும், வடமத்திய மாகாணத்தில் 509 பேருந்துகளும் சேவையில் உள்ளதாக அவர் தெரிவித்துள்ளார்.
அத்துடன், ஒக்டோபர் முதலாம் திகதி நிலவரப்படி, தேசிய போக்குவரத்து ஆணைக்குழுவினால் 2,966 தனியார் பேருந்துகளுக்கு அனுமதிப்பத்திரங்கள் வழங்கப்பட்டுள்ளதாகவும் பிரதி அமைச்சர் குறிப்பிட்டுள்ளார்.
அவற்றில் 1,826 சாதாரண சேவைகளுக்கான பேருந்துகளும், 651 சொகுசுப் பேருந்துகளும், 257 அரைச் சொகுசுப் பேருந்துகளும், 232 அதிசொகுசுப் பேருந்துகளும் உள்ளடங்குவதாக அவர் மேலும் தெரிவித்துள்ளார்.
