பயங்கரவாத எதிர்ப்புச் சட்டமூலத்திற்கு ஸ்ரீலங்கா சுதந்திரக் கட்சி எதிர்ப்பு – ஜனநாயக உரிமைகளைப் பாதுகாக்க வலியுறுத்தல்

அரசாங்கத்தினால் முன்மொழியப்பட்டுள்ள பயங்கரவாதத்திலிருந்து அரசைப் பாதுகாக்கும் சட்டமூலத்தின் (PSTA) தற்போதைய வடிவத்திற்கு ஸ்ரீலங்கா சுதந்திரக் கட்சி (SLFP) எதிர்ப்புத் தெரிவித்துள்ளது.

தேசிய பாதுகாப்பை உறுதிப்படுத்தும் சட்டங்கள் ஜனநாயக சுதந்திரங்களையும் அரசியலமைப்பால் உறுதிப்படுத்தப்பட்ட அடிப்படை உரிமைகளையும் பாதிக்கக்கூடாது என முன்னாள் நாடாளுமன்ற உறுப்பினர் உதித் லொக்குபண்டார வலியுறுத்தியுள்ளார்.

ஸ்ரீலங்கா சுதந்திரக் கட்சியின் வெளிவிவகார ஒருங்கிணைப்பாளரும் வன்னி மாவட்டத் தலைவருமான அவர் வெளியிட்டுள்ள விரிவான அறிக்கையிலேயே இந்த நிலைப்பாட்டைத் தெரிவித்துள்ளார்.

பயங்கரவாதத்தைத் தடுப்பதற்கான சட்டங்களுக்கு கட்சி எதிரானது அல்ல என்றும், மாறாக அத்தகைய சட்டங்கள் தவறாகப் பயன்படுத்தப்படுவதைத் தடுக்கும் வகையில் வலுவான சட்டப் பாதுகாப்புகள் உறுதிப்படுத்தப்பட வேண்டும் என்பதே கட்சியின் நிலைப்பாடு என்றும் அவர் குறிப்பிட்டுள்ளார்.

1979ஆம் ஆண்டு அறிமுகப்படுத்தப்பட்ட பயங்கரவாதத் தடுப்புச் சட்டத்திற்குப் (PTA) பதிலாகக் கொண்டுவர உத்தேசிக்கப்பட்டுள்ள புதிய சட்டமூலம், ஏற்கனவே நடைமுறையில் உள்ள சட்டத்தின் குறைபாடுகளைத் தீர்ப்பதாக அமைய வேண்டும் என்றும், பெயரை மாத்திரம் மாற்றிவிட்டு அதே குறைபாடுகளைத் தொடரக்கூடாது என்றும் அவர் தெரிவித்துள்ளார்.

குறிப்பாக, பயங்கரவாதம் என்பதற்கான வரைவிலக்கணம், கைது மற்றும் தடுப்புக்காவல் அதிகாரங்கள், நிறைவேற்று அதிகாரத்தின் வரம்புகள் மற்றும் நீதித்துறை மேற்பார்வையின் போதுமான தன்மை ஆகியவை தொடர்பில் அவர் கவலை வெளியிட்டுள்ளார்.

உண்மையான பயங்கரவாதச் செயற்பாடுகளுக்கும் அமைதியான போராட்டங்கள், தொழிற்சங்க நடவடிக்கைகள், அரசியல் கருத்து வெளிப்பாடுகள் மற்றும் அரசாங்கத்திற்கு எதிரான நியாயமான விமர்சனங்களுக்கும் இடையில் புதிய சட்டம் தெளிவான வேறுபாட்டை ஏற்படுத்த வேண்டும் என்றும் அவர் வலியுறுத்தியுள்ளார்.

மேலும், இந்தச் சட்டமூலம் நாடாளுமன்றத்தில் முன்னெடுக்கப்படுவதற்கு முன்னர் சட்டத்தரணிகள், அரசியலமைப்பு நிபுணர்கள், மனித உரிமை அமைப்புகள் மற்றும் கடந்த காலங்களில் பயங்கரவாத எதிர்ப்புச் சட்டங்களால் பாதிக்கப்பட்ட சமூகத்தினருடன் அர்த்தமுள்ள கலந்துரையாடல்கள் நடத்தப்பட வேண்டும் என்றும் அவர் கோரிக்கை விடுத்துள்ளார்.

இலங்கையின் கடந்தகால அரசியல் வரலாற்றைச் சுட்டிக்காட்டிய அவர், ஸ்ரீலங்கா சுதந்திரக் கட்சி தலைமையிலான அரசாங்கங்கள் உட்பட அடுத்தடுத்து ஆட்சிக்கு வந்த அரசாங்கங்களின் காலத்திலும் பயங்கரவாதத் தடுப்புச் சட்டம் நடைமுறையில் இருந்ததை ஏற்றுக்கொண்டுள்ளார்.

எனினும், கடந்தகால பாதுகாப்புச் சவால்களைக் காரணமாகக் கொண்டு தற்போதைய சட்டத்தின் குறைபாடுகளை அங்கீகரிக்காமல் இருக்க முடியாது என்றும், அரச அதிகாரங்கள் தவறாகப் பயன்படுத்தப்படுவதைத் தடுப்பதற்கான பாதுகாப்பு ஏற்பாடுகள் வலுப்படுத்தப்பட வேண்டும் என்றும் அவர் தெரிவித்துள்ளார்.

முன்னாள் நாடாளுமன்ற உறுப்பினர், பாதுகாப்பு மற்றும் நகர அபிவிருத்தி அமைச்சின் கண்காணிப்பு நாடாளுமன்ற உறுப்பினர் மற்றும் முன்னாள் ஜனாதிபதி மஹிந்த ராஜபக்ஷவின் பிரதான பணியாளர் ஆகிய பொறுப்புகளை வகித்த அனுபவத்தைச் சுட்டிக்காட்டிய அவர், எந்தவொரு அரசியல் கட்சி ஆட்சியில் இருந்தாலும் அரச அதிகாரங்களைப் பயன்படுத்துவதில் பொறுப்புக்கூறல் அவசியம் எனக் குறிப்பிட்டுள்ளார்.

அதேவேளை, உத்தேச சட்டமூலம் ஐரோப்பிய ஒன்றியத்தின் GSP+ வர்த்தகச் சலுகைகள் தொடர்பான கடப்பாடுகள் உள்ளிட்ட இலங்கையின் சர்வதேச பொறுப்புகளிலும் தாக்கத்தை ஏற்படுத்தக்கூடும் என்றும் அவர் எச்சரித்துள்ளார்.

எனவே, சர்ச்சைக்குரிய சட்டப் பிரிவுகளை அரசாங்கமும் நாடாளுமன்றமும் கவனமாக ஆராய்ந்து, பயங்கரவாதத் தடுப்புச் சட்டத்திற்குப் பதிலாகக் கொண்டுவரப்படும் புதிய சட்டம் தனிநபர் சுதந்திரங்களைப் பாதுகாப்பதில் உண்மையான முன்னேற்றத்தை ஏற்படுத்துவதை உறுதிப்படுத்த வேண்டும் என்றும் உதித் லொக்குபண்டார வலியுறுத்தியுள்ளார்.

“தேசிய பாதுகாப்புக்கும் ஜனநாயக சுதந்திரத்திற்கும் இடையில் ஒன்றைத் தெரிவு செய்ய வேண்டிய அவசியம் இலங்கைக்கு இல்லை” எனத் தெரிவித்துள்ள அவர், பயங்கரவாதத்திலிருந்து நாட்டைப் பாதுகாப்பதும் ஜனநாயக உரிமைகளைப் பாதுகாப்பதும் ஒன்றுக்கொன்று முரணான நோக்கங்கள் அல்ல என்றும் சுட்டிக்காட்டியுள்ளார்.

தேசிய பாதுகாப்புச் சட்டங்களின் இறுதி நோக்கம் நாட்டின் மக்களையும் அவர்களின் சுதந்திரங்களையும் ஜனநாயகக் கோட்பாடுகளையும் பாதுகாப்பதாகவே இருக்க வேண்டும் என்றும் அவர் மேலும் தெரிவித்துள்ளார்.