இலங்கைக்குள் உருவாகியுள்ள ‘நிழல் அரசு’ – ஜனாதிபதி அநுரவின் உரையில் வெளியான 11 முக்கிய தகவல்கள்!

இலங்கைக்குள் போதைப்பொருள் கடத்தல்காரர்கள் மற்றும் ஒழுங்கமைக்கப்பட்ட குற்றக் கும்பல்களின் செல்வாக்கில் தனியானதொரு ‘நிழல் அரசு’ உருவாகியுள்ளதாக ஜனாதிபதி அநுரகுமார திஸாநாயக்க எச்சரிக்கை விடுத்துள்ளார்.

போதைப்பொருள் வர்த்தகத்தின் மூலம் பெரும் செல்வத்தைச் சேர்த்துள்ள குற்றக் கும்பல்கள், அரசியல்வாதிகள், பொலிஸ் அதிகாரிகள், அரச அதிகாரிகள் மற்றும் அரச நிறுவனங்களைத் தமது கட்டுப்பாட்டுக்குள் கொண்டுவர முயற்சிப்பதாகவும் அவர் குற்றஞ்சாட்டியுள்ளார்.

தேசிய போதைப்பொருள் ஒழிப்பு நடவடிக்கையின் முதலாம் ஆண்டு நிறைவையொட்டி அலரி மாளிகையில் நடைபெற்ற சர்வமதத் தலைவர்கள் மாநாட்டில் உரையாற்றியபோதே ஜனாதிபதி இதனைத் தெரிவித்துள்ளார்.

சட்டபூர்வமான அரச நிர்வாகக் கட்டமைப்புக்கு இணையாக, போதைப்பொருள் கடத்தல் மற்றும் ஒழுங்கமைக்கப்பட்ட குற்றச்செயல்களுடன் தொடர்புடைய இரகசியக் குற்ற வலையமைப்பொன்று உருவாகியுள்ளதாகவும், இது நாட்டின் எதிர்காலத்துக்கு பாரிய அச்சுறுத்தலாக அமைந்துள்ளதாகவும் அவர் சுட்டிக்காட்டியுள்ளார்.

மேலும், போதைப்பொருள் கடத்தல்காரர்களின் சொத்துக்களை முடக்குதல், வெளிநாடுகளில் தலைமறைவாகியுள்ள குற்றவாளிகளை நாட்டுக்கு அழைத்து வருதல், ஆயுதங்களைக் கைப்பற்றுதல் மற்றும் சர்ச்சைக்குரிய சட்டங்களில் திருத்தங்களை மேற்கொள்ளுதல் உள்ளிட்ட பல்வேறு விடயங்கள் தொடர்பிலும் ஜனாதிபதி விளக்கமளித்துள்ளார்.

ஜனாதிபதியின் உரையில் இடம்பெற்ற 11 முக்கிய விடயங்கள் வருமாறு:

1\. இலங்கைக்குள் இயங்கும் ‘நிழல் அரசு’

போதைப்பொருள் கடத்தல் மற்றும் ஒழுங்கமைக்கப்பட்ட குற்றச்செயல்களுடன் தொடர்புடைய சக்திவாய்ந்த வலையமைப்பொன்று நாட்டுக்குள் உருவாகியுள்ளதாக ஜனாதிபதி தெரிவித்துள்ளார்.

சுங்கத் திணைக்களம், மோட்டார் போக்குவரத்துத் திணைக்களம், குடிவரவு மற்றும் குடியகல்வுத் திணைக்களம், பொலிஸ் திணைக்களம் உள்ளிட்ட அரச நிறுவனங்களுக்குள் போதைப்பொருள் கடத்தல்காரர்கள் தமது செல்வாக்கைச் செலுத்தியுள்ளதாகவும் அவர் குற்றஞ்சாட்டியுள்ளார்.

அத்துடன், போதைப்பொருள் வர்த்தகத்தின் மூலம் கிடைக்கும் பணத்தைப் பயன்படுத்தி அரசியல் இயக்கங்களுக்கு நிதியுதவி வழங்குவதுடன், உள்ளூராட்சி மன்றங்களிலும் தமக்குச் சாதகமான பிரதிநிதித்துவத்தை ஏற்படுத்தியுள்ளதாகக் குறிப்பிட்டுள்ளார்.

இந்தக் குற்ற வலையமைப்பை முற்றாக ஒழிக்க அரசாங்கம் உறுதியாக இருப்பதாகவும், இளைஞர் தலைமுறையின் எதிர்காலத்தைப் பாதுகாக்க இந்த நடவடிக்கை அவசியமானது என்றும் ஜனாதிபதி வலியுறுத்தியுள்ளார்.

2\. 224 பில்லியன் ரூபாய் பெறுமதியான போதைப்பொருட்கள் கைப்பற்றல்

கடந்த ஓராண்டு காலப்பகுதியில் சுமார் 218 பில்லியன் ரூபாய் பெறுமதியான போதைப்பொருட்கள் கைப்பற்றப்பட்டுள்ளதாக ஜனாதிபதி தெரிவித்துள்ளார்.

கஞ்சாவையும் உள்ளடக்கியபோது கைப்பற்றப்பட்ட போதைப்பொருட்களின் மொத்தப் பெறுமதி சுமார் 224 பில்லியன் ரூபாயாக அதிகரிப்பதாகவும் அவர் குறிப்பிட்டுள்ளார்.

கைப்பற்றப்பட்ட போதைப்பொருட்களின் விபரங்கள் வருமாறு:

- ஐஸ் (Crystal Methamphetamine) – 6,528 கிலோகிராம்
- ஹெரோயின் – 4,000 கிலோகிராம்
- ஹஷிஷ் – 1,841 கிலோகிராம்
- கொக்கெய்ன் – 314 கிலோகிராம்
- ஏனைய போதைப்பொருட்கள் – 2,598 கிலோகிராம்
- போதைப்பொருள் மாத்திரைகள் மற்றும் குளிசைகள் – சுமார் 45 இலட்சம்

அத்துடன், அன்றைய தினம் காலையில்கூட சுமார் 150 கிலோகிராம் ஹெரோயின் மற்றும் ஐஸ் போதைப்பொருட்கள் கைப்பற்றப்பட்டுள்ளதாக ஜனாதிபதி தெரிவித்துள்ளார்.

இந்தக் கைப்பற்றல்கள் நாட்டில் போதைப்பொருள் வர்த்தகம் எந்தளவுக்குப் பரந்துள்ளது என்பதை வெளிப்படுத்துவதாகவும், சந்தைக்கு வந்துசேரும் போதைப்பொருட்களின் அளவு இதைவிட அதிகமாக இருக்கலாம் என்றும் அவர் எச்சரித்துள்ளார்.

3\. தடுத்து வைக்கும் காலத்தை 72 மணித்தியாலங்களிலிருந்து 48 மணித்தியாலங்களாகக் குறைக்கத் தீர்மானம்

உத்தேச ஒழுங்கமைக்கப்பட்ட குற்றங்களைத் தடுக்கும் சட்டமூலம் தொடர்பில் உயர்நீதிமன்றத்தில் முன்வைக்கப்பட்ட கவலைகளைத் தொடர்ந்து, அதில் மூன்று முக்கிய திருத்தங்களை மேற்கொள்ள அரசாங்கம் தயாராக இருப்பதாக ஜனாதிபதி அறிவித்துள்ளார்.

இதன்படி, சந்தேகநபர்களைத் தடுத்து வைக்கும் காலத்தை 72 மணித்தியாலங்களிலிருந்து 48 மணித்தியாலங்களாகக் குறைக்கத் தீர்மானிக்கப்பட்டுள்ளது.

மேலும், ஒழுங்கமைக்கப்பட்ட குற்றக் கும்பல்களை அடையாளம் காண பச்சை குத்தப்பட்ட அடையாளங்களைப் பயன்படுத்துவது தொடர்பான ஏற்பாடுகளையும், கலால் கட்டளைச் சட்டத்தின் கீழான குற்றங்களுக்கு இந்த உத்தேச சட்டத்தைப் பயன்படுத்துவது தொடர்பான ஏற்பாடுகளையும் நீக்குவதற்கும் அரசாங்கம் தயாராக இருப்பதாக அவர் தெரிவித்துள்ளார்.

ஜனநாயகம் மற்றும் அடிப்படை உரிமைகளைப் பாதுகாக்க வலியுறுத்தும் தரப்பினரால் முன்வைக்கப்படும் ஏனைய யோசனைகள் குறித்தும் கலந்துரையாடத் தயார் என ஜனாதிபதி குறிப்பிட்டுள்ளார்.

4\. அதிகாரத்தில் யாரும் நிரந்தரமாக இருக்க முடியாது

உத்தேச சட்டமூலம் தொடர்பில் எழுந்துள்ள விமர்சனங்களுக்குப் பதிலளித்த ஜனாதிபதி, தமக்கோ அல்லது தமது அரசாங்கத்துக்கோ அளவுக்கு அதிகமான அதிகாரங்கள் தேவையில்லை எனத் தெரிவித்துள்ளார்.

அரசியல் அதிகாரத்தில் இருப்பவர்கள் ஒருநாள் அந்த அதிகாரத்தை இழக்க நேரிடும் என்பதைப் புரிந்துகொண்டு செயற்பட வேண்டும் என்றும் அவர் வலியுறுத்தியுள்ளார்.

தாம் ஆட்சியில் இல்லாத காலத்திலும் நடைமுறையில் இருக்கும் வகையிலான சட்டங்களை உருவாக்குவது குறித்து ஒவ்வொரு அரசாங்கமும் சிந்திக்க வேண்டும் எனக் குறிப்பிட்ட அவர், தேர்தல்களின் மூலம் மக்களால் வழங்கப்படும் அதிகாரத்தை மீளப்பெறும் உரிமையும் மக்களுக்கு இருப்பதாகத் தெரிவித்துள்ளார்.

5\. வெளிநாடுகளிலிருந்து 67 சந்தேகநபர்கள் நாட்டுக்கு அழைத்து வரப்பட்டுள்ளனர்

ஒழுங்கமைக்கப்பட்ட குற்றச்செயல்களுடன் தொடர்புடைய 67 பேர் கடந்த ஓராண்டு காலப்பகுதியில் வெளிநாடுகளிலிருந்து இலங்கைக்கு அழைத்து வரப்பட்டுள்ளதாக ஜனாதிபதி தெரிவித்துள்ளார்.

மேலும், 112 பேருக்கு எதிராக சர்வதேசப் பிடியாணை அறிவிப்புகள் (Red Notices) பிறப்பிக்கப்பட்டுள்ளதாகவும் அவர் குறிப்பிட்டுள்ளார்.

வெளிநாடுகளில் தலைமறைவாக இருந்து இலங்கையில் போதைப்பொருள் கடத்தல் மற்றும் குற்றச் செயல்களை வழிநடத்துபவர்களுக்கும் எச்சரிக்கை விடுத்த ஜனாதிபதி, அவர்கள் எங்கிருந்தாலும் சட்டத்தின் பிடியிலிருந்து தப்ப முடியாது எனத் தெரிவித்துள்ளார்.

6\. குற்றச் செயல்கள் மூலம் ஈட்டப்பட்டதாகச் சந்தேகிக்கப்படும் 4.5 பில்லியன் ரூபாய் சொத்துக்கள் முடக்கம்

போதைப்பொருள் கடத்தல் உள்ளிட்ட குற்றச் செயல்கள் மூலம் ஈட்டப்பட்டதாகச் சந்தேகிக்கப்படும் சுமார் 4.5 பில்லியன் ரூபாய் பெறுமதியான சொத்துக்கள் முடக்கப்பட்டுள்ளதாக ஜனாதிபதி தெரிவித்துள்ளார்.

சட்டவிரோதமாகச் சம்பாதிக்கப்பட்ட சொத்துக்களை மீளப்பெறுவதற்காக 2025ஆம் ஆண்டு அறிமுகப்படுத்தப்பட்ட சட்டம், ஒழுங்கமைக்கப்பட்ட குற்றக் குழுக்களின் நிதி வலையமைப்புகளை இலக்குவைப்பதற்கு அரசாங்கத்துக்கு வலுச்சேர்த்துள்ளதாகவும் அவர் குறிப்பிட்டுள்ளார்.

போதைப்பொருள் கடத்தல்காரர்களின் நிதி ஆதாரங்களை முடக்காமல் ஒழுங்கமைக்கப்பட்ட குற்றச்செயல்களை முற்றாக ஒழிக்க முடியாது என்றும் ஜனாதிபதி வலியுறுத்தியுள்ளார்.

7\. குற்றக் கும்பல்களிடமிருந்து நூற்றுக்கணக்கான துப்பாக்கிகள் மீட்பு

ஒழுங்கமைக்கப்பட்ட குற்றக் கும்பல்களுக்கு எதிரான நடவடிக்கைகளின்போது பெருமளவிலான துப்பாக்கிகள் கைப்பற்றப்பட்டுள்ளதாக ஜனாதிபதி தெரிவித்துள்ளார்.

ஜனாதிபதி ஊடகப் பிரிவின் ஆங்கில அறிக்கையின்படி, கைப்பற்றப்பட்ட ஆயுதங்களில் 97 ரி-56 ரக துப்பாக்கிகள், 143 கைத்துப்பாக்கிகள், ஏ.கே-47 ரக துப்பாக்கிகள் மற்றும் 105 ரிவோல்வர்கள் அடங்குகின்றன.

இவற்றில் சில ஆயுதங்கள் முப்படைகளின் ஆயுதக் களஞ்சியங்களிலிருந்து குற்றக் கும்பல்களுக்குச் சென்றுள்ளதாகவும், இராணுவ ஆயுத இருப்புகளிலிருந்து துப்பாக்கிகள் காணாமல் போனமை தொடர்பில் கணக்காய்வு அறிக்கைகள் வெளிப்படுத்தியுள்ளதாகவும் ஜனாதிபதி குறிப்பிட்டுள்ளார்.

அத்துடன், சில பொலிஸ் உத்தியோகத்தர்கள் ஆயுதங்களை விற்பனை செய்த சம்பவங்களும் இடம்பெற்றுள்ளதாக அவர் தெரிவித்துள்ளார்.

குற்றக் கும்பல்களின் கைகளில் இவ்வாறான ஆயுதங்கள் இருப்பது பொதுமக்களின் பாதுகாப்புக்கு பாரிய அச்சுறுத்தலாகும் என்றும் அவர் எச்சரித்துள்ளார்.

8\. மத வழிபாட்டுத் தலங்களையும் சென்றடைந்துள்ள போதைப்பொருள் அச்சுறுத்தல்

போதைப்பொருள் பிரச்சினை சமூகத்தின் அனைத்துத் தரப்புகளிலும் பரவியுள்ளதாக ஜனாதிபதி எச்சரிக்கை விடுத்துள்ளார்.

பொலிஸ் திணைக்களம், முப்படைகள் மற்றும் அரச நிறுவனங்கள் மட்டுமன்றி, மக்கள் மிகுந்த மதிப்புடன் கருதும் மத வழிபாட்டு நிறுவனங்களையும் இந்தப் பிரச்சினை சென்றடைந்துள்ளதாக அவர் தெரிவித்துள்ளார்.

இதனால், பௌத்த பிக்குகள், கிறிஸ்தவ மதகுருமார்கள், இஸ்லாமிய மதத் தலைவர்கள் மற்றும் இந்து மதகுருமார்கள் போதைப்பொருள் ஒழிப்பு நடவடிக்கைகளில் தீவிரமாகப் பங்கேற்க வேண்டும் என அவர் அழைப்பு விடுத்துள்ளார்.

போதைப்பொருள் பாவனையால் பாதிக்கப்பட்ட குடும்பங்கள் முதலில் அணுகும் தரப்பினராக மதத் தலைவர்கள் இருப்பதால், விழிப்புணர்வு, தடுப்பு நடவடிக்கைகள் மற்றும் புனர்வாழ்வு நடவடிக்கைகளில் அவர்களால் முக்கிய பங்களிப்பை வழங்க முடியும் என்றும் ஜனாதிபதி சுட்டிக்காட்டியுள்ளார்.

9\. ஐஸ் போதைப்பொருள் தொடர்பில் கைது செய்யப்படும் சிறுவர்களின் எண்ணிக்கை அதிகரிப்பு

சிறுவர்கள் மத்தியில் போதைப்பொருள் பரவல் அதிகரித்து வருவது குறித்து ஜனாதிபதி கவலை வெளியிட்டுள்ளார்.

2022ஆம் ஆண்டில் ஐஸ் போதைப்பொருள் தொடர்பில் 18 வயதுக்குக் குறைந்த ஒருவர் மாத்திரமே கைது செய்யப்பட்டிருந்த நிலையில், 2025ஆம் ஆண்டில் அந்த எண்ணிக்கை 1,874 ஆக அதிகரித்துள்ளதாக அவர் தெரிவித்துள்ளார்.

சிறுவர்கள் மற்றும் இளைஞர்கள் மத்தியில் போதைப்பொருள் பாவனை பரவுவது நாட்டின் எதிர்காலத்துக்கு பாரிய அச்சுறுத்தலாகும் என்றும் அவர் எச்சரித்துள்ளார்.

இதனைக் கட்டுப்படுத்தும் நோக்கில், குடும்பங்களுக்குள் போதைப்பொருள் தொடர்பான பிரச்சினைகளை ஆரம்பத்திலேயே அடையாளம் காண்பது மற்றும் அவற்றைத் தடுப்பது தொடர்பில் பெற்றோருக்கான விசேட விழிப்புணர்வு நிகழ்ச்சிகளை கல்வி அமைச்சு தயாரித்து வருவதாகவும் ஜனாதிபதி அறிவித்துள்ளார்.

10\. சட்டத்திற்கு புறம்பான தண்டனைகளுக்கு அரசாங்கம் இடமளிக்காது

போதைப்பொருள் கடத்தல்காரர்கள் அல்லது ஒழுங்கமைக்கப்பட்ட குற்றக் கும்பல்களுடன் தொடர்புடையவர்கள் எனச் சந்தேகிக்கப்படுபவர்களுக்கு சட்டத்திற்கு புறம்பான வகையில் தண்டனை வழங்கும் கொள்கையை அரசாங்கம் பின்பற்றாது என ஜனாதிபதி தெரிவித்துள்ளார்.

சந்தேகநபர்கள் சட்டத்தின் அடிப்படையில் விசாரணைக்கு உட்படுத்தப்பட்டு, நீதிமன்றத்தில் வழக்குத் தொடரப்பட்டு, நீதிமன்றத் தீர்ப்பின் அடிப்படையிலேயே தண்டிக்கப்பட வேண்டும் என அவர் வலியுறுத்தியுள்ளார்.

எனினும், குற்ற விசாரணைகள் மற்றும் நீதிமன்ற நடவடிக்கைகளில் நிலவும் தாமதங்கள் பாரிய சவாலாக இருப்பதாகவும் அவர் சுட்டிக்காட்டியுள்ளார்.

இதனைத் தீர்ப்பதற்காக பொலிஸ் திணைக்களம், சட்டமா அதிபர் திணைக்களம், அரச பகுப்பாய்வாளர் திணைக்களம் மற்றும் நீதித்துறை ஆகியவற்றின் செயற்பாடுகளை வலுப்படுத்த நடவடிக்கை எடுக்கப்பட்டுள்ளதாகவும் தெரிவித்துள்ளார்.

அரச பகுப்பாய்வாளர் திணைக்களத்தில் சுமார் 36,000 அறிக்கைகள் நிலுவையில் இருப்பதாகக் குறிப்பிட்ட ஜனாதிபதி, அவற்றை விரைவாகச் சமர்ப்பிப்பதற்காக மேலதிக பணியாளர்கள், கொடுப்பனவுகள் மற்றும் உட்கட்டமைப்பு வசதிகள் வழங்கப்பட்டுள்ளதாகவும் கூறியுள்ளார்.

அத்துடன், மத நிறுவனங்கள் மற்றும் சிவில் சமூக அமைப்புகளால் முன்னெடுக்கப்படும் புனர்வாழ்வு மையங்களையும் வலுப்படுத்தத் திட்டமிடப்பட்டுள்ளதாக அவர் தெரிவித்துள்ளார்.

11\. பயங்கரவாதத் தடைச் சட்டத்தின் அதிகாரங்களைக் குறைத்து, ஒழுங்கமைக்கப்பட்ட குற்றங்களுக்கு புதிய சட்டங்கள்

பயங்கரவாதத் தடைச் சட்டத்தின் (PTA) அதிகாரங்களைப் பெருமளவில் குறைப்பதே அரசாங்கத்தின் நோக்கம் என ஜனாதிபதி தெரிவித்துள்ளார்.

தற்போதுள்ள சட்டங்களில் காணப்படும் குறைபாடுகள் காரணமாக, ஒழுங்கமைக்கப்பட்ட குற்றக் கும்பல்களுக்கு எதிராகப் பயங்கரவாதத் தடைச் சட்டம் பயன்படுத்தப்பட்டுள்ளதாகவும் அவர் ஒப்புக்கொண்டுள்ளார்.

எனினும், ஒழுங்கமைக்கப்பட்ட குற்றச்செயல்களைக் கட்டுப்படுத்துவதற்கென வலுவான புதிய சட்டங்களை அறிமுகப்படுத்துவதுடன், பயங்கரவாதத் தடைச் சட்டத்தின் மீதான தங்கியிருப்பைக் குறைக்க அரசாங்கம் எதிர்பார்ப்பதாகவும் குறிப்பிட்டுள்ளார்.

உத்தேச ஒழுங்கமைக்கப்பட்ட குற்றங்களைத் தடுக்கும் சட்டமூலம் தொடர்பில் சிவில் சமூக அமைப்புகள் முன்வைத்துள்ள கவலைகளையும் அரசாங்கம் கவனத்தில் கொள்ளும் என்றும், அடிப்படை உரிமைகளைப் பாதுகாக்கும் வகையில் தேவையான திருத்தங்களை மேற்கொள்ளத் தயாராக இருப்பதாகவும் ஜனாதிபதி தெரிவித்துள்ளார்.

இலங்கையில் அதிகரித்து வரும் போதைப்பொருள் கடத்தல் மற்றும் ஒழுங்கமைக்கப்பட்ட குற்றச்செயல்களைக் கட்டுப்படுத்த வலுவான சட்டங்கள் அவசியம் என்றும் அவர் வலியுறுத்தியுள்ளார்.

தேசிய ஒற்றுமைக்கு ஜனாதிபதி அழைப்பு

நாட்டில் தற்போது இரண்டு தரப்பினர் இருப்பதாகக் குறிப்பிட்ட ஜனாதிபதி, போதைப்பொருள் மற்றும் ஆயுதக் கும்பல்களை அடிப்படையாகக் கொண்ட குற்றவியல் அரச கட்டமைப்புக்கு ஆதரவானவர்கள் ஒரு தரப்பாகவும், அதனை எதிர்ப்பவர்கள் மற்றொரு தரப்பாகவும் உள்ளதாகத் தெரிவித்துள்ளார்.

அரசியல் மற்றும் ஏனைய வேறுபாடுகளைக் கடந்து மதத் தலைவர்களும் பொதுமக்களும் போதைப்பொருள் ஒழிப்பு நடவடிக்கையில் ஒன்றிணைந்து செயற்பட வேண்டும் என அவர் அழைப்பு விடுத்துள்ளார்.

இதன்போது, அரசாங்கத்தின் தேசிய போதைப்பொருள் ஒழிப்பு நடவடிக்கையான ‘ரட்டம ஏகட’ (Ratama Ekata) திட்டத்துக்கான உத்தியோகபூர்வ இணையத்தளமான www\.1818.gov.lk என்பதையும் ஜனாதிபதி ஆரம்பித்து வைத்துள்ளார்.

போதைப்பொருள் பிரச்சினையை ஓரிரு ஆண்டுகளுக்குள் முற்றாக ஒழித்துவிட முடியாது எனத் தெரிவித்த அவர், தொடர்ச்சியாகப் பல ஆண்டுகள் முன்னெடுக்கப்படும் நடவடிக்கைகள் மூலமே நாட்டின் இளம் தலைமுறைக்கு பாதுகாப்பான எதிர்காலத்தை உருவாக்க முடியும் என்றும் தெரிவித்துள்ளார்.