நீதிமன்ற உத்தரவைத் தொடர்ந்து சந்தேகநபரைக் கைது செய்ய பொதுமக்களின் உதவியைக் கோரிய அறிவிப்பைத் திரும்பப் பெற்ற பொலிஸார்

சமூக ஊடகங்களான பேஸ்புக் மற்றும் வட்ஸ்அப் ஊடாக இடம்பெற்றதாகக் கூறப்படும் பாலியல் துன்புறுத்தல் முறைப்பாடுகள் தொடர்பில் தேடப்பட்டு வந்த 47 வயதுடைய சந்தேகநபரைக் கைது செய்வதற்கு பொதுமக்களின் உதவியைக் கோரி முன்னர் வெளியிடப்பட்ட அறிவிப்பைத் தொடர்ந்து வெளியிட வேண்டாம் என பொலிஸார் ஊடக நிறுவனங்களைக் கேட்டுக்கொண்டுள்ளனர்.

குறித்த சந்தேகநபர் தம்மைக் கைது செய்வதைத் தடுக்கும் உத்தரவைக் கோரி மேன்முறையீட்டு நீதிமன்றத்தில் ரிட் மனுவொன்றைத் தாக்கல் செய்துள்ளதாகப் பொலிஸாருக்கு அறிவிக்கப்பட்டதைத் தொடர்ந்து இந்தத் தெளிவுபடுத்தல் வெளியிடப்பட்டுள்ளது.

இதன்படி, சட்டமா அதிபரிடமிருந்து அறிவுறுத்தல்கள் கிடைக்கும் வரை சந்தேகநபரைக் கைது செய்யக்கூடாது என மேன்முறையீட்டு நீதிமன்றம் உத்தரவிட்டுள்ளதாகப் பொலிஸார் தெரிவித்துள்ளனர்.

சம்மாந்துறை பொலிஸாரால் விசாரணைக்கு உட்படுத்தப்பட்டு வந்த குறித்த சந்தேகநபரைக் கண்டறிய பொதுமக்களின் உதவியைக் கோரி முன்னதாக பொலிஸார் அறிவிப்பொன்றை வெளியிட்டிருந்தனர்.

இந்நிலையில், நீதிமன்ற நடவடிக்கைகள் தொடர்பில் அம்பாறை பிரிவுக்குப் பொறுப்பான சிரேஷ்ட பொலிஸ் அத்தியட்சகர் அறிவித்துள்ளதாக பொலிஸ் ஊடகப் பிரிவு தெரிவித்துள்ளது.

நீதிமன்ற உத்தரவைக் கருத்திற்கொண்டு, சந்தேகநபரைக் கைது செய்வதற்குப் பொதுமக்களின் உதவியைக் கோரி முன்னர் வெளியிடப்பட்ட அறிவிப்பை இனிமேல் வெளியிடவோ அல்லது ஒளிபரப்பவோ வேண்டாம் என அனைத்து ஊடக நிறுவனங்களிடமும் பொலிஸார் கோரிக்கை விடுத்துள்ளனர்.

மேலும், முன்னர் வெளியிடப்பட்ட அறிவிப்புக்கு வழங்கப்பட்ட அதே முக்கியத்துவத்துடன் தற்போதைய தெளிவுபடுத்தலையும் வெளியிடுமாறு ஊடக நிறுவனங்களிடம் கேட்டுக்கொள்ளப்பட்டுள்ளது.

இதன்மூலம், சந்தேகநபர் தொடர்பான தகவல்களை வழங்குமாறு பொதுமக்களிடம் விடுக்கப்பட்ட முந்தைய கோரிக்கை உத்தியோகபூர்வமாகத் திரும்பப் பெறப்பட்டுள்ளது.