‘வாஸ் கவி’ தொடர்பில் இளைஞரிடம் விசாரணை நடத்தப்பட்டதாகக் கூறப்படும் குற்றச்சாட்டு – பொலிஸார் மறுப்பு!
இலங்கையில் பாரம்பரிய சிங்களச் சாபப் பாடல்களான ‘வாஸ் கவி’ தொடர்பில் இளைஞர் ஒருவரிடம் தெமட்டகொட பொலிஸார் விசாரணை நடத்தியதாக சமூக ஊடகங்களில் பரவி வரும் தகவல்களை பொலிஸார் மறுத்துள்ளனர். அத்துடன், குறித்த குற்றச்சாட்டுகள் தொடர்பில் விசாரணைகள் ஆரம்பிக்கப்பட்டுள்ளதாகவும் பொலிஸார் அறிவித்துள்ளனர்.
கடந்த ஒக்டோபர் 22ஆம் திகதியளவில், பாரம்பரிய சிங்களச் சாபப் பாடல்கள் தொடர்பாக ஒருவரிடம் பொலிஸார் வாக்குமூலம் பதிவு செய்ததாகக் கூறும் காணொளியொன்று சமூக ஊடகங்களில் பரவியதைத் தொடர்ந்து, தெமட்டகொட பொலிஸ் நிலையத்திடம் அறிக்கையொன்று கோரப்பட்டதாக பொலிஸ் ஊடகப் பிரிவு தெரிவித்துள்ளது.
எனினும், இவ்வாறான பாடல்கள் தொடர்பில் எந்தவொரு முறைப்பாடும் கிடைக்கவில்லை எனவும், அது தொடர்பாக எவரிடமிருந்தும் வாக்குமூலம் பதிவு செய்யப்படவில்லை எனவும் தெமட்டகொட பொலிஸார் உறுதிப்படுத்தியுள்ளனர்.
இந்த விவகாரம் தொடர்பில் சட்டத்தரணி சுதத் குமாரரத்ன சமூக ஊடகங்களில் வெளியிட்ட கருத்துகள் உண்மைக்குப் புறம்பானவை என்றும் பொலிஸ் ஊடகப் பிரிவு குறிப்பிட்டுள்ளது.
இதனையடுத்து, பொலிஸ் மா அதிபரின் அறிவுறுத்தலுக்கு அமைய, மத்திய குற்றப் புலனாய்வுப் பணியகம் குறித்த குற்றச்சாட்டுகள் தொடர்பில் விசாரணைகளை ஆரம்பித்துள்ளது.
எதிர்க்கட்சியான ஐக்கிய மக்கள் சக்தியுடன் தொடர்புடைய சட்டத்தரணியான சுதத் குமாரரத்ன, அண்மையில் பௌத்த பிக்குகள் முன்னெடுத்த போராட்டத்தின்போது சமூக ஊடகங்களில் பரவலாகப் பகிரப்பட்ட சிங்களச் சாபப் பாடல்கள் தொடர்பில், தமது கட்சிக்காரர் ஒருவரை தெமட்டகொட பொலிஸார் அழைத்து விசாரணை நடத்தியதாக முன்னதாகக் குற்றஞ்சாட்டியிருந்தார்.
வஜ்ரபாணி தெய்வத்தை வேண்டி ஆரம்பிக்கும் வகையிலான அந்தப் பாடல்களைத் தமது கட்சிக்காரரே எழுதியாரா எனப் பொலிஸார் விசாரித்ததாகவும் அவர் தெரிவித்திருந்தார்.
எனினும், இந்தக் குற்றச்சாட்டுகளை பொலிஸார் மறுத்துள்ளதுடன், அவை தொடர்பில் தற்போது விசாரணைகள் முன்னெடுக்கப்பட்டு வருகின்றன.
