பொதுமக்களுக்கு கூடுதல் வரிச்சுமை விதிக்கப்படவில்லை – 8 வரி மாற்றங்கள் குறித்து அரசாங்கம் விளக்கம்

இலங்கையில் அரசாங்கத்தினால் அறிமுகப்படுத்தப்பட்டுள்ள வரி மாற்றங்கள் பொதுமக்களுக்கு மேலதிக வரிச்சுமையை ஏற்படுத்தவில்லை என நிதி மற்றும் திட்டமிடல் பிரதி அமைச்சர் கலாநிதி அனில் ஜயந்த பெர்னாண்டோ தெரிவித்துள்ளார்.

அரசாங்கத்தின் வரி மறுசீரமைப்பு நடவடிக்கைகள் தொடர்பாக எழுந்துள்ள விமர்சனங்களுக்குப் பதிலளிக்கும் வகையில், நிதி அமைச்சு வெளியிட்டுள்ள அறிக்கையிலேயே அவர் இதனைத் தெரிவித்துள்ளார்.

இதன்போது, மதுபானம் மற்றும் சிகரெட்டுக்கான வரி அதிகரிப்பு, வாகன இறக்குமதிக்கான வரிகள், வங்கி வட்டி வருமானத்திற்கான முற்பிடிப்பு வரி, சேவை ஏற்றுமதிக்கான வரி, டிஜிட்டல் சேவைகளுக்கான பெறுமதி சேர் வரி உள்ளிட்ட எட்டு முக்கிய வரி மாற்றங்கள் குறித்து அவர் விளக்கமளித்துள்ளார்.

வாகன இறக்குமதிக்கு 50 வீத மேலதிக வரி

தனியார் வாகன இறக்குமதிக்கான சுங்க வரியில் 50 வீத மேலதிக வரி அறிமுகப்படுத்தப்பட்டமை, மத்திய கிழக்கில் நிலவும் மோதல்களால் ஏற்பட்ட பொருளாதார அழுத்தங்களுக்கு மத்தியில் வெளிநாட்டு நாணய வெளியேற்றத்தைக் கட்டுப்படுத்தும் தற்காலிக நடவடிக்கை என பிரதி அமைச்சர் குறிப்பிட்டுள்ளார்.

இதன் நோக்கம் அரசாங்கத்தின் வருமானத்தை அதிகரிப்பதல்ல என்றும், நாட்டின் வெளிநாட்டு நாணயக் கையிருப்பைப் பாதுகாத்து அத்தியாவசியப் பொருட்களின் இறக்குமதியில் பாதிப்புகள் ஏற்படுவதைத் தடுப்பதே என்றும் அவர் தெரிவித்துள்ளார்.

மின்சார வாகனங்களுக்கான வரி அதிகரிப்பு

மின்சார வாகனங்களுக்கான சுங்க வரிகளில் மேற்கொள்ளப்பட்ட மாற்றங்கள், தற்போதைய வரி கட்டமைப்பில் காணப்படும் குறைபாடுகளைச் சீரமைப்பதற்கான நடவடிக்கையாகும் என அவர் விளக்கமளித்துள்ளார்.

அனைத்துத் துறைகளுக்கும் இடையில் வரி விதிப்பில் நியாயமான நிலையை ஏற்படுத்துவதுடன், அரசாங்கத்திற்கு ஏற்படும் வருமான இழப்புகளைக் குறைப்பதும் இதன் நோக்கமாகும் எனக் குறிப்பிட்டுள்ளார்.

வங்கி வட்டி வருமானத்திற்கான வரி 10 வீதமாக அதிகரிப்பு

வங்கி வைப்புகளிலிருந்து கிடைக்கும் வட்டி வருமானத்திற்கான முற்பிடிப்பு வரி 5 வீதத்திலிருந்து 10 வீதமாக அதிகரிக்கப்பட்டமை தொடர்பிலும் அவர் விளக்கமளித்துள்ளார்.

வருமான வரி செலுத்த வேண்டிய பொறுப்பற்ற நபர்கள், தாங்கள் வரி விலக்குக்குத் தகுதியானவர்கள் என்பதை உறுதிப்படுத்தும் உரிய அறிவிப்பு அல்லது சத்தியக்கடதாசியைச் சமர்ப்பிப்பதன் மூலம் இந்த வரி அறவீட்டிலிருந்து விலக்களிப்பைப் பெற்றுக்கொள்ள முடியும் எனத் தெரிவித்துள்ளார்.

அதேவேளை, வருமான வரி செலுத்த வேண்டியவர்களிடமிருந்து வட்டி வருமானத்தில் அறவிடப்படும் 10 வீத வரியானது, அவர்களின் வருடாந்த வருமான வரிப் பொறுப்பைக் கணக்கிடும்போது வரவாகக் கருதப்படும் என்றும் குறிப்பிட்டுள்ளார்.

மதுபானம் மற்றும் சிகரெட்டுக்கான வரி அதிகரிப்பு

2025 ஜனவரி மாதம் மதுபானம் மற்றும் சிகரெட் உள்ளிட்ட தெரிவுசெய்யப்பட்ட பொருட்களுக்கான கலால் வரி 6 வீதத்தால் அதிகரிக்கப்பட்டமை, ஏற்கனவே நடைமுறையிலுள்ள பணவீக்கத்துடன் தொடர்புடைய வரி திருத்த முறைக்கு அமைவானது என பிரதி அமைச்சர் தெரிவித்துள்ளார்.

இதற்கு முன்னர் ஆட்சியிலிருந்த அரசாங்கமும் இதே முறையின் கீழ் 2024ஆம் ஆண்டு 14 வீத வரி அதிகரிப்பை மேற்கொண்டிருந்ததாக அவர் சுட்டிக்காட்டியுள்ளார்.

எனினும், டிட்வா (Ditwah) சூறாவளியால் ஏற்பட்ட பொருளாதாரப் பாதிப்புகளைக் கருத்திற்கொண்டு, 2026ஆம் ஆண்டில் மேற்கொள்ளப்படவிருந்த மேலதிக வரி அதிகரிப்பை அரசாங்கம் கைவிட்டதாகவும் தெரிவித்துள்ளார்.

மதுபானம் மற்றும் புகையிலை நிறுவனங்களுக்கான வரி 45 வீதமாக அதிகரிப்பு

மதுபானம் மற்றும் புகையிலை நிறுவனங்களின் இலாபத்திற்கு விதிக்கப்படும் வரி 40 வீதத்திலிருந்து 45 வீதமாக அதிகரிக்கப்பட்டமைக்கும் பிரதி அமைச்சர் நியாயம் தெரிவித்துள்ளார்.

அதிக இலாபம் ஈட்டும் திறனைக் கொண்டுள்ள இந்தத் தொழில்துறைகள், அரசாங்க வருமானத்திற்கு அதிக பங்களிப்பை வழங்க வேண்டும் என்பதற்காகவே இந்தத் தீர்மானம் எடுக்கப்பட்டதாகக் குறிப்பிட்டுள்ளார்.

இதன் மூலம் பொதுமக்களுக்கு தேவையற்ற வரிச்சுமையை ஏற்படுத்தாமல், அதிக இலாபம் ஈட்டும் நிறுவனங்களிடமிருந்து உரிய வரிப் பங்களிப்பைப் பெற்றுக்கொள்ள முடியும் எனவும் அவர் தெரிவித்துள்ளார்.

சேவை ஏற்றுமதிக்கு 15 வீத வரி

சேவை ஏற்றுமதித் துறையில் முன்னர் நிலவிய வரி விலக்குகள் காரணமாக, வெவ்வேறு வர்த்தகத் துறைகளுக்கு இடையில் சமமற்ற வரி விதிப்பு காணப்பட்டதாக பிரதி அமைச்சர் தெரிவித்துள்ளார்.

இதனைச் சீரமைக்கும் வகையில் சேவை ஏற்றுமதியாளர்கள் வருமான வரி கட்டமைப்பிற்குள் கொண்டுவரப்பட்டுள்ளதாகவும், முந்தைய அரசாங்கம் முன்மொழிந்த 30 வீத வரிக்குப் பதிலாக நிறுவனங்களுக்கு 15 வீத வரி விதிக்கப்பட்டுள்ளதாகவும் குறிப்பிட்டுள்ளார்.

அதேபோன்று, சேவை ஏற்றுமதி மூலம் வருமானம் பெறும் தனிநபர்களுக்கான அதிகபட்ச வரி வீதமும் 15 வீதமாக மட்டுப்படுத்தப்பட்டுள்ளதாகத் தெரிவித்துள்ளார்.

டிஜிட்டல் சேவைகளுக்கும் பெறுமதி சேர் வரி

டிஜிட்டல் தளங்கள் ஊடாக வழங்கப்படும் சேவைகளுக்கு பெறுமதி சேர் வரி (VAT) அறிமுகப்படுத்தப்பட்டமை, பாரம்பரிய வர்த்தக நிறுவனங்களுக்கும் டிஜிட்டல் தளங்கள் ஊடாகச் செயற்படும் நிறுவனங்களுக்கும் இடையில் சமமான வரி விதிப்பை உறுதிப்படுத்துவதற்கான நடவடிக்கை என அவர் தெரிவித்துள்ளார்.

போக்குவரத்து மற்றும் உணவு விநியோகச் சேவைகளை வழங்கும் செயலிகள் இதற்கு உதாரணமாகக் குறிப்பிடப்பட்டுள்ளன.

சேவைகள் டிஜிட்டல் முறையில் வழங்கப்படுகின்றன என்பதற்காக அவை வரி விதிப்பு கட்டமைப்பிலிருந்து விலக்கப்படக்கூடாது என்றும் அவர் வலியுறுத்தியுள்ளார்.

நிதிச் சேவைகளுக்கான வரி 20.5 வீதமாக மாற்றம்

நிதிச் சேவைகளுக்கான பெறுமதி சேர் வரி 20.5 வீதமாக அதிகரிக்கப்பட்டுள்ளதாக முன்வைக்கப்படும் குற்றச்சாட்டுகளுக்கும் பிரதி அமைச்சர் பதிலளித்துள்ளார்.

இதன்படி, முன்னர் நிதிச் சேவைகளுக்கு 18 வீத பெறுமதி சேர் வரியும், 2.5 வீத சமூகப் பாதுகாப்பு பங்களிப்பு வரியும் தனித்தனியாக அறவிடப்பட்டதாக அவர் தெரிவித்துள்ளார்.

தற்போது இந்த இரண்டு வரிகளும் ஒன்றிணைக்கப்பட்டு 20.5 வீதமாக ஒரே முறையின் கீழ் அறவிடப்படுவதாகவும், இதன் மூலம் வரி நிர்வாகத்தை எளிமைப்படுத்த முடியும் என்றும் அவர் விளக்கமளித்துள்ளார்.

வரி வருமானம் எதிர்பார்ப்பை விட அதிகரிப்பு

வரி நிர்வாகம், வரி இணக்கம் மற்றும் வரி வசூலிக்கும் திறன் ஆகியவற்றில் மேற்கொள்ளப்பட்ட முன்னேற்றங்கள் காரணமாக, 2025ஆம் ஆண்டில் ஆரம்பத்தில் எதிர்பார்க்கப்பட்டதை விட அதிக வருமானத்தை அரசாங்கத்தினால் பெற்றுக்கொள்ள முடிந்ததாகவும் பிரதி அமைச்சர் தெரிவித்துள்ளார்.

ஒட்டுமொத்த வரிச்சுமையை மதிப்பிடும்போது, தனித்தனியான வரி வீதங்களில் ஏற்பட்ட மாற்றங்களை மட்டும் அடிப்படையாகக் கொண்டு முடிவெடுக்கக்கூடாது என்றும் அவர் சுட்டிக்காட்டியுள்ளார்.

மேலும், மத்திய கிழக்கு மோதல்களால் ஏற்பட்ட பொருளாதார அழுத்தங்களுக்கு மத்தியிலும் எரிபொருள், உரம் மற்றும் மருந்துப் பொருட்கள் உள்ளிட்ட அத்தியாவசியப் பொருட்களின் விநியோகத்தில் தடங்கல்கள் ஏற்படாமல் அரசாங்கம் நடவடிக்கை எடுத்துள்ளதாகவும் தெரிவித்துள்ளார்.

அத்தியாவசிய பொதுச் சேவைகளைத் தொடர்ந்து முன்னெடுத்தல், நாட்டின் அபிவிருத்தியை ஆதரித்தல் மற்றும் பொதுமக்களின் நிதி வீண் விரயம், மோசடி மற்றும் ஊழலின்றி பயன்படுத்தப்படுவதை உறுதிப்படுத்துதல் ஆகியவற்றில் அரசாங்கம் தொடர்ந்து அர்ப்பணிப்புடன் செயற்படும் என்றும் பிரதி அமைச்சர் கலாநிதி அனில் ஜயந்த பெர்னாண்டோ மேலும் தெரிவித்துள்ளார்.