தெஹிவளை கைக்குண்டுத் தாக்குதல்: மேலும் இரு சந்தேகநபர்கள் கைது!

தெஹிவளை காவல் துறை பிரிவுக்குட்பட்ட பகுதியில் உள்ள வீடொன்றின் மீது கைக்குண்டுத் தாக்குதல் நடத்தி, இரண்டு சிறுவர்களைப் படுகொலை செய்த சம்பவத்திற்கு உதவி ஒத்தாசை புரிந்த குற்றச்சாட்டில் மேலும் இரு சந்தேகநபர்கள் காவல் துறையினரால் கைது செய்யப்பட்டுள்ளனர்.

இரண்டு சிறுவர்கள் உயிரிழந்ததும், அவர்களின் தந்தை பலத்த காயமடைந்ததற்குமான குறித்த கைக்குண்டு வீச்சுச் சம்பவம் தொடர்பில் மேல் மாகாணத் தெற்கு மாவட்டக் குற்றப் புலனாய்வுப் பிரிவினர் தீவிர விசாரணைகளை மேற்கொண்டு வந்தனர்.

முன்னதாக, இத்தாக்குதலின் முதன்மைச் சந்தேகநபர் மற்றும் அவருக்கு உதவிய மேலும் இருவர் ரிதிமாலியத்த, தெஹிவளை மற்றும் பொரலஸ்கமுவ ஆகிய காவல் துறைப் பிரிவுகளில் வைத்து கைது செய்யப்பட்டு, தற்போது விளக்கமறியலில் வைக்கப்பட்டுள்ளனர்.

அவ்வாறு கைது செய்யப்பட்டு விளக்கமறியலில் உள்ள சந்தேகநபர்களிடம் மேற்கொள்ளப்பட்ட தீவிர விசாரணைகளின் அடிப்படையில் பெறப்பட்ட தகவல்களுக்கமையவே, தற்போது இந்த புதிய இரு சந்தேகநபர்களும் கைது செய்யப்பட்டுள்ளதாகக் காவல் துறையினர் தெரிவித்தனர்.

கைது செய்யப்பட்ட சந்தேகநபர்களிடமிருந்து 11 கிராம் 960 மில்லிகிராம் 'ஐஸ்' (Ice) ரக போதைப்பொருள் மற்றும் குற்றச் செயலுக்குப் பயன்படுத்தப்பட்டதாகக் கருதப்படும் முச்சக்கரவண்டி ஒன்றும் காவல் துறையினரால் கைப்பற்றப்பட்டுள்ளது.

இவ்வாறு கைது செய்யப்பட்ட இருவரும் 30 மற்றும் 31 வயதுடையவர்கள் எனவும், அவர்கள் பிலியந்தலை மற்றும் கஹத்துடுவ ஆகிய பகுதிகளைச் சேர்ந்தவர்கள் என்றும் காவல் துறையினர் மேலும் தெரிவித்தனர்.