பயத்தின் மேலாதிக்கத்தை உடைக்க பல லசந்தாக்கள் உருவாக வேண்டும்: இலஞ்ச, ஊழல் ஆணைக்குழுவின் பணிப்பாளர் நாயகம்!
ஊடகவியலாளர் லசந்த விக்கிரமதுங்க படுகொலை செய்யப்பட்டமை, ஒரு தனிநபரை ஒழிப்பதற்காக மாத்திரம் மேற்கொள்ளப்பட்ட ஒன்றல்ல; மாறாக, அரசியல்வாதிகள், ஊழல்கள் மற்றும் சக்திவாய்ந்த சக்திகளுக்கு எதிராகக் குரல்கொடுக்கத் தயாராக இருந்த ஏனைய ஊடகவியலாளர்களுக்கும் ஏனைய துறைகளைச் சேர்ந்த நிபுணர்களுக்கும் எச்சரிக்கை விடுப்பதற்காகவே ஆகும் என இலஞ்ச அல்லது ஊழல் பற்றிய குற்றச்சாட்டுகளைப் புலனாய்வு செய்வதற்கான ஆணைக்குழுவின் (CIABOC) பணிப்பாளர் நாயகம் ரங்க திசாநாயக்க தெரிவித்தார்.
லசந்த விக்கிரமதுங்க குறித்த சிங்கள மொழிபெயர்ப்பு புத்தக வெளியீட்டு விழாவில் கலந்துகொண்டு உரையாற்றும்போதே அவர் இதனைத் தெரிவித்தார். லசந்தவின் படுகொலையானது ஊடகவியலாளர்களுக்கு ஒரு பரந்த எச்சரிக்கையை விடுத்துள்ளதாக அவர் வாதிட்டார். “அங்கீகரிக்கப்பட்ட எல்லைகளுக்குள் இருங்கள், சக்திவாய்ந்த சக்திகளுக்குச் சவால் விடுக்காமல் செய்தி சேகரியுங்கள் மற்றும் மாறுபட்ட வழியில் பயணிக்க முயலாதீர்கள்” என்பதே அந்த எச்சரிக்கையாகும் எனவும் அவர் சுட்டிக்காட்டினார்.
“லசந்தவை இல்லாமல் செய்வதற்காகவே லசந்த கொல்லப்பட்டார் என்று நினைக்கிறீர்களா? அது லசந்தவைப் போன்ற அனைவருக்கும் விடுக்கப்பட்ட ஒரு செய்தி” என திசாநாயக்க கேள்வி எழுப்பினார்.
இலங்கையின் வரலாற்று நெடுகிலும் தனிநபர்கள் ஊழல் அல்லது நிறுவப்பட்ட சக்திவாய்ந்த அமைப்புகளுக்குச் சவால் விடுத்தபோது இத்தகைய எச்சரிக்கைகள் வழங்கப்பட்டுள்ளதாக திசாநாயக்க குறிப்பிட்டார். பேராசிரியர் சேனக பிபிலே மற்றும் சுங்க அதிகாரி சுஜித் பிரசன்ன ஆகியோரின் அனுபவங்களை மேற்கோள் காட்டிய அவர், தனிநபர்கள் மீதான தாக்குதல்கள், அவர்களது சக ஊழியர்களையும் ஏனையோரையும் இதுபோன்ற பணிகளைத் தொடர்வதிலிருந்து பின்வாங்கச் செய்யும் என்றும் வாதிட்டார்.
ஒருவர் மீதான தாக்குதலின் விளைவுகள் பாதிக்கப்பட்ட நபருடன் மட்டும் முடிந்துவிடுவதில்லை எனத் தெரிவித்த அவர், தவறைச் சுட்டிக்காட்டுவதற்காகத் தமது உயிரைப் பணயம் வைப்பது மதிப்புமிக்கதா என்று அவர்களது சக ஊழியர்கள், குடும்பத்தினர் மற்றும் ஏனையோர் சிந்திக்கத் தொடங்குவதாகக் கூறினார்.
சுங்க அதிகாரி கொல்லப்பட்டதைத் தொடர்ந்து, அந்த நிறுவனத்துடன் தொடர்புடைய பலர் நாட்டிலிருந்து வெளியேறியதோடு அல்லது புலனாய்வு நடவடிக்கைகளைத் தொடர்வதற்குத் தயக்கம் காட்டியதாகவும், இந்த பயமுறுத்தும் சூழல் வெளிப்படையாகத் தெரிவதாகவும் திசாநாயக்க குறிப்பிட்டார்.
சமூகம் பெரும்பாலும் இந்த அச்சத்தின் செய்தியை உள்வாங்கியுள்ளதாகத் தெரிவித்த திசாநாயக்க, தற்போது இந்த நிலைமை மாற்றியமைக்கப்பட வேண்டும் என்றும் வலியுறுத்தினார்.
“லசந்த கொல்லப்பட்ட பிறகு மேலும் பல லசந்தாக்கள் உருவானால், அவர்களின் அச்சுறுத்தலின் நோக்கம் தோற்றுப்போகும். ஆனால் லசந்த கொல்லப்பட்ட பிறகு பலரின் குரல்கள் ஒடுக்கப்பட்டன. இதனாலேயே அவர்களின் நோக்கம் வெற்றியடைந்தது” என்றும் அவர் சுட்டிக்காட்டினார்.
லசந்த விக்கிரமதுங்கவின் முன்னாள் மனைவி ரைன் விக்கிரமதுங்க மற்றும் காணாமல் ஆக்கப்பட்ட ஊடகவியலாளர் பிரகீத் எக்னலிகொடவின் மனைவி ஆகியோரைக் குறிப்பிட்ட அவர், தங்களது பணிக்காகக் கொல்லப்பட்ட அல்லது காணாமல் ஆக்கப்பட்டவர்களின் குடும்பங்கள் இந்தச் சுமையைத் தனியாகச் சுமக்க வேண்டுமா என்றும் கேள்வி எழுப்பினார்.
தவறுகளை வெளிச்சத்திற்குக் கொண்டுவருபவர்களை அச்சுறுத்தும் முயற்சிகளைத் தோற்கடிப்பதா அல்லது மெளனமாக இருப்பதா என்பதைப் பரந்த பொதுமக்கள் தீர்மானிக்க வேண்டும் என்றும் இலஞ்ச, ஊழல் ஆணைக்குழுவின் பணிப்பாளர் நாயகம் ரங்க திசாநாயக்க மேலும் தெரிவித்தார்.
