தியாக தீபம் திலீபனின் 39ஆம் ஆண்டு நினைவேந்தல்: யாழ்ப்பாணத்தில் உணர்வுப்பூர்வ நிறைவு
ஐந்து அம்சக் கோரிக்கைகளை முன்வைத்து நீராகாரமின்றி அறப்போராட்டம் நடத்தி உயிர்நீத்த தியாக தீபம் திலீபனின் 39ஆம் ஆண்டு நினைவேந்தல் நிகழ்வுகளின் இறுதிநாள் அஞ்சலி நிகழ்வு, இன்று சனிக்கிழமை யாழ்ப்பாணத்தில் உணர்வுப்பூர்வமாக இடம்பெற்றது.
யாழ்ப்பாணம் நல்லூர் பின் வீதியில் அமைந்துள்ள தியாக தீபம் திலீபனின் நினைவிடத்தில், அவர் உண்ணாநோன்பிருந்து உயிர்நீத்த நேரமான காலை 10.48 மணியளவில் அஞ்சலி நிகழ்வுகள் முறைப்படி ஆரம்பமாகின.
இதன்போது, நினைவிடத்தின் முதன்மை ஈகைச்சுடரினை மாவீரர்களான அன்புக்குமாரன் மற்றும் தம்பமணி ஆகியோரின் பெற்றோர்களான அருணாச்சலம் வல்லிபுரம் மற்றும் வல்லிபுரம் செல்வராணி ஆகியோர் ஏற்றி வைத்தனர்.
அதேநேரம், தியாக தீபம் திலீபன் உண்ணாநோன்பிருந்த நல்லூர் ஆலய வீதியில் அமைக்கப்பட்ட பகுதியில், மாவீரர்களான செல்லக்கண் மற்றும் இசைச்செல்வன் ஆகியோரின் சகோதரியும் போராளியுமான சுப்பிரமணியம் மலர்விழி ஈகைச்சுடரினை ஏற்றி வைத்தார்.
அதனைத் தொடர்ந்து, நினைவாலயத்தில் அமைக்கப்பட்டுள்ள தியாக தீபத்தின் திருவுருவச் சிலைக்கு மாவீரர் அறிவின் தந்தையான மூத்த போராளி முத்துக்குமார் மனோகர் மலர்மாலை அணிவித்து கௌரவித்தார். அதனைத் தொடர்ந்து வருகை தந்திருந்த மக்கள் மற்றும் பிரதிநிதிகள் மலர் தூவி தமது அஞ்சலிகளைச் செலுத்தினர்.
இறுதிநாள் நிகழ்வின் ஒரு அங்கமாக, இளைஞர் ஒருவர் தூக்குக்காவடி எடுத்து வந்து தியாக தீபத்தின் நினைவிடத்தில் தனது உணர்வுப்பூர்வமான அஞ்சலியைச் செலுத்தினார்.
மேலும், யாழ்ப்பாணத்தின் பல்வேறு பகுதிகளிலிருந்தும் கிளிநொச்சி மாவட்டத்திலிருந்தும் தியாக தீபத்தின் திருவுருவப் படங்கள் தாங்கிய அலங்கரிக்கப்பட்ட வாகன ஊர்திகள் அணிவகுத்து திலீபனின் நினைவாலயத்தை வந்தடைந்தமை குறிப்பிடத்தக்கது.
