வரவிருக்கும் வரவுசெலவுத் திட்டத்தில் PAYE வரியிலிருந்து நிவாரணம்? – அமைச்சர் பிமல் ரத்நாயக்க முக்கிய குறிப்பு!

வரவிருக்கும் வரவுசெலவுத் திட்டத்தில் (Budget) உழைக்கும் போது செலுத்தும் வரி (PAYE tax) தொடர்பில் மேலதிக நிவாரணங்களை வழங்குவதற்கு அரசாங்கம் உத்தேசித்துள்ளதாக அமைச்சர் பிமல் ரத்நாயக்க சுட்டிக்காட்டியுள்ளார். தொழில் வல்லுநர்கள் மீது தற்போதைக்கு சுமத்தப்பட்டுள்ள வரிச்சுமை மிக அதிகமாக காணப்படுவதாகவும் அவர் குறிப்பிட்டுள்ளார்.

தனியார் தொலைக்காட்சி ஊடகம் ஒன்றுக்கு வழங்கிய செவ்வியின் போதே அமைச்சர் பிமல் ரத்நாயக்க இதனைத் தெரிவித்துள்ளார்.

அரசாங்கத்தினால் ஏற்கனவே சில திருத்தங்கள் மேற்கொள்ளப்பட்ட போதிலும், தொழில் வல்லுநர்களுக்கு உழைக்கும் போது செலுத்தும் வரி (PAYE) தொடர்ந்தும் ஒரு பெரும் கவலையாகவே இருந்து வருவதாக அவர் ஒப்புக்கொண்டார்.

இது தொடர்பில் கருத்து தெரிவித்த அவர், "தொழில் வல்லுநர்களுக்கு உழைக்கும் போது செலுத்தும் வரி அதிகமாக உள்ளது என்பதை நாங்கள் ஏற்றுக்கொள்கிறோம். எனினும், ஒருபுறம் சர்வதேச நாணய நிதியத்துடனான (IMF) ஒப்பந்தம், மறுபுறம் நாட்டின் நிதி நிலைமை ஆகியவற்றின் காரணமாக, இவ்வரியை எந்தளவுக்கு குறைக்க முடியும் என்பதற்கு வரம்புகள் உள்ளன" எனத் தெரிவித்தார்.

இருப்பினும், PAYE வரியில் மேலும் நிவாரணம் வழங்கப்பட வேண்டும் என்பதே கொள்கை ரீதியான நிலைப்பாடு என நிதி அமைச்சு கருதுவதாக அவர் கூறினார்.

"PAYE வரிக்கு நிவாரணம் வழங்கப்பட வேண்டும் என்பதில் நிதி அமைச்சு கொள்கை ரீதியாக ஒரே நிலைப்பாட்டைக் கொண்டுள்ளது. வரவுசெலவுத் திட்டம் சமர்ப்பிக்கப்படுவதற்கு இன்னும் சில நாட்களே உள்ளன" என்று குறிப்பிட்ட அமைச்சர், மேலதிக நிவாரணங்கள் அறிவிக்கப்படலாம் என்ற குறிப்பை வெளியிட்டார்.

எனினும், புதிய வரிவிலக்கு எல்லை அல்லது முன்மொழியப்பட்ட நிவாரணத்தின் அளவு குறித்து அமைச்சர் பிமல் ரத்நாயக்க எவ்வித குறிப்பிட்ட விபரங்களையும் வெளியிடவில்லை.

அதேவேளை, தற்போதைய பெறுமதி சேர் வரி (VAT) சுமையும் அதிகமாகவே உள்ளதாக அரசாங்கம் கருதுவதாகத் தெரிவித்த அவர், வரவிருக்கும் வரவுசெலவுத் திட்டத்தில் VAT வரியைக் குறைப்பது குறித்து உறுதியளிக்க மறுத்துவிட்டார். எந்தவொரு மாற்றமும் நாட்டின் ஒட்டுமொத்த பொருளாதார மற்றும் நிதி நிலைமையைப் பொறுத்தே அமையும் என்றும் அவர் சுட்டிக்காட்டினார்.

அரசாங்கத்தின் வருவாய் திரட்டல் நடவடிக்கையை நியாயப்படுத்திப் பேசிய அவர், அரசாங்கம் புதிய வரிகள் எதையும் அறிமுகப்படுத்தவில்லை என்றும், வீண் விரையங்களைக் குறைத்து, வரி செலுத்தும் நடைமுறைகளை வலுப்படுத்தியுள்ளதாகவும் தெரிவித்தார்.

சர்வதேச நாணய நிதியத்தின் (IMF) ஆதரவுடனான திட்டத்தை இலங்கை தொடர்ந்து முன்னெடுத்து வரும் நிலையில், நிதி ஒழுக்கத்தைப் பேணுவதற்கு அரசாங்கம் முக்கியத்துவம் அளித்துள்ளமையும் குறிப்பிடத்தக்கது.