திறன் மேம்பாட்டுத் திட்டத்திற்காக ஆசிய அபிவிருத்தி வங்கியுடன் இலங்கை 100 மில்லியன் டொலர் கடன் ஒப்பந்தம்!

இலங்கையின் தொழில்நுட்ப மற்றும் தொழிற்கல்வி பயிற்சித் துறையை நவீனமயப்படுத்தும் நோக்கில், ஆசிய அபிவிருத்தி வங்கியுடன் (ADB) இலங்கை அரசாங்கம் 100 மில்லியன் அமெரிக்க டொலர் பெறுமதியான கடன் ஒப்பந்தத்தில் கைச்சாத்திட்டுள்ளது.

திறன் மேம்பாட்டு முறைமையை மறுசீரமைக்கும் திட்டத்தை நடைமுறைப்படுத்துவதற்காக இந்தக் கடன் வழங்கப்படவுள்ளது.

குறித்த ஒப்பந்தம் இன்று (06) கொழும்பிலுள்ள பொது திறைசேரியில் கைச்சாத்திடப்பட்டதாக நிதி அமைச்சு தெரிவித்துள்ளது.

இலங்கை அரசாங்கத்தின் சார்பில் நிதி, திட்டமிடல் மற்றும் பொருளாதார அபிவிருத்தி அமைச்சின் செயலாளர் ஹர்ஷன சூரியப்பெருமவும், ஆசிய அபிவிருத்தி வங்கியின் சார்பில் இலங்கைக்கான வதிவிடப் பணிப்பாளர் ஷனன் கவ்லினும் ஒப்பந்தத்தில் கைச்சாத்திட்டுள்ளனர்.

பெறுபேறுகளை அடிப்படையாகக் கொண்ட நிதி வழங்கல் முறையின் கீழ் இந்த 100 மில்லியன் டொலர் கடன் வழங்கப்படவுள்ளது.

இதன் மூலம் இடைநிலைக் கல்வி மட்டத்தில் திறன் மேம்பாட்டை வலுப்படுத்துதல், வேலைவாய்ப்பை இலக்காகக் கொண்ட பயிற்சிகளை விரிவுபடுத்துதல் மற்றும் தொழில்நுட்ப, தொழிற்கல்வி பயிற்சித் துறையில் தனியார் துறை மற்றும் கைத்தொழில் நிறுவனங்களின் பங்களிப்பை அதிகரித்தல் ஆகியவை எதிர்பார்க்கப்படுகின்றன.

2027ஆம் ஆண்டு முதல் 2031ஆம் ஆண்டு வரை இந்தத் திட்டம் நடைமுறைப்படுத்தப்படவுள்ளது.

இதன் கீழ், தற்போதுள்ள வாகனப் பொறியியல் பயிற்சி நிறுவனம், வாகனத் தொழில்நுட்பத்திற்கான சிறப்பு மையமாகத் தரமுயர்த்தப்படவுள்ளது.

மேலும், ஒன்பது தொழில்நுட்ப மற்றும் தொழிற்கல்வி பயிற்சி நிலையங்கள் பிராந்திய பயிற்சி மையங்களாக மாற்றப்படவுள்ளதுடன், மேலும் 40 பயிற்சி நிலையங்களின் உட்கட்டமைப்பு வசதிகளும் மேம்படுத்தப்படவுள்ளன.

அத்துடன், தொழிலாளர் சந்தையின் தேவைகளுக்கு ஏற்ப 200 தேசிய தொழில்திறன் தரநிலைகள், பாடத்திட்டங்கள் மற்றும் கற்றல் உபகரணங்கள் புதுப்பிக்கப்படவுள்ளதாக நிதி அமைச்சு தெரிவித்துள்ளது.

முன்னுரிமை வழங்கப்படும் கைத்தொழில் துறைகள் மற்றும் தொழில்களுக்கான புதிய பயிற்சிப் பாடநெறிகள் அறிமுகப்படுத்தப்படுவதுடன், பணியிட அடிப்படையிலான பயிற்சி தரநிலைகள் மற்றும் தொழிற்கல்வி பயிற்றுவிப்பாளர்களுக்கான தொழில்சார் மேம்பாட்டுத் திட்டங்களும் வலுப்படுத்தப்படவுள்ளன.

இதற்கு மேலதிகமாக, தனியார் பயிற்சி வழங்குநர்கள் தமது சேவைகளை விரிவுபடுத்துவதற்கு ஊக்கமளிக்கும் நிதி ஏற்பாடுகள் உள்ளிட்ட கொள்கை, நிதி மற்றும் டிஜிட்டல் மறுசீரமைப்பு நடவடிக்கைகளும் முன்னெடுக்கப்படவுள்ளன.

டிஜிட்டல் மாற்றத்தின் ஒரு பகுதியாக, இணையவழிக் கற்றல் தளம் மற்றும் பயிற்சி முகாமைத்துவத்திற்கான ஒருங்கிணைந்த தகவல் முறைமை அறிமுகப்படுத்தப்படவுள்ளது.

இந்தத் தகவல் முறைமை தொழிலாளர் சந்தை மற்றும் பாடசாலை முகாமைத்துவத் தகவல் கட்டமைப்புகளுடன் இணைக்கப்படும் எனவும் தெரிவிக்கப்பட்டுள்ளது.

மேலும், இடைநிலைப் பாடசாலை மாணவர்களுக்கான திறன் மேம்பாட்டுப் பாதைகளை வலுப்படுத்துவதுடன், தொழிற்கல்வி மற்றும் வேலைவாய்ப்புத் தெரிவுகள் தொடர்பில் சரியான தீர்மானங்களை மேற்கொள்வதற்கு உதவும் வகையில் தொழில் வழிகாட்டல் சேவைகளும் வழங்கப்படவுள்ளன.