தாராபுரம், மதுராந்தகத்தில் தவெக அபார வெற்றி!

தமிழகத்தில் மிகுந்த எதிர்பார்ப்பை ஏற்படுத்திய தாராபுரம் மற்றும் மதுராந்தகம் சட்டமன்றத் தொகுதிகளுக்கான இடைத்தேர்தல் முடிவுகள் வெளியாகியுள்ளன. இதில் இரு தொகுதிகளிலும் தமிழக வெற்றிக் கழகம் (தவெக) அமோக வெற்றி பெற்று தனது கணக்கைத் தொடங்கியுள்ளது.

மதுராந்தகம் மற்றும் தாராபுரம் தொகுதிகளில் பதிவான வாக்குகளை எண்ணும் பணி இன்று காலை 8:00 மணிக்குத் தொடங்கியது. ஆரம்பம் முதலே விறுவிறுப்பாக நடைபெற்ற வாக்கு எண்ணிக்கையின் முடிவில், ஆளும் கட்சியான திமுக இரண்டாம் இடத்தையும், பிரதான எதிர்க்கட்சியான அதிமுக மூன்றாவது இடத்தையும் பிடித்துள்ளன.

தாராபுரத்தில் திருப்பங்களுக்கு மத்தியில் தவெக வெற்றி

தாராபுரம் சட்டமன்றத் தொகுதியில் வாக்கு எண்ணிக்கை தொடங்கியது முதலே கடும் போட்டி நிலவியது. தொடக்கத்தில் தவெக முன்னணி வகிக்க, அதைத் தொடர்ந்து அதிமுக முன்னிலைக்கு வந்து சுவாரஸ்யத்தை ஏற்படுத்தியது. எனினும், வாக்கு எண்ணிக்கையின் அடுத்தடுத்த சுற்றுகளில் திமுக இரண்டாம் இடத்திற்கு முன்னேறியது.

பல்வேறு கட்டத் திருப்பங்களுக்குப் பிறகு, 23 சுற்றுகள் நிறைவடைந்த நிலையில் தவெக வேட்பாளர் சத்யபாமா 9,471 வாக்குகள் வித்தியாசத்தில் வெற்றி பெற்றதாக உத்தியோகபூர்வமாக அறிவிக்கப்பட்டது.

தாராபுரம் - இறுதி வாக்கு நிலவரம் (23 சுற்றுகள்):

சத்யபாமா (தவெக) - 66,841 (வெற்றி)

சுகன்யா (திமுக) - 57,370

பானுமதி (அதிமுக) - 45,280

கார்த்திகா (நாம் தமிழர் கட்சி) - 5,268

ப.லட்சுமணன் (இந்திய கம்யூனிஸ்ட் கட்சி) - 1,157

கடந்த ஏப்ரல் மாதம் நடைபெற்ற தமிழக சட்டமன்றப் பொதுத்தேர்தலில் தாராபுரம் தொகுதியில் 46,438 வாக்குகளை மட்டுமே பெற்றிருந்த தவெக, தற்போது நடைபெற்று முடிந்த இடைத்தேர்தலில் 66,841 வாக்குகளைப் பெற்று தனது வாக்கு வங்கியை கணிசமாக உயர்த்தியுள்ளது. இத்தொகுதியில் கடந்த முறை வெற்றி பெற்ற அதிமுக இந்த முறை மூன்றாவது இடத்திற்குத் தள்ளப்பட்டுள்ளது குறிப்பிடத்தக்கது.

தாராபுரம் தொகுதியில் மொத்தம் 22 வேட்பாளர்கள் போட்டியிட்ட நிலையில், 80.25 சதவீதம் வாக்குகள் பதிவாகியிருந்தன. 320 வாக்குச்சாவடிகளில் பதிவான வாக்குகள், 14 மேசைகளில் (Tables) 23 சுற்றுகளாக எண்ணப்பட்டு முடிவுகள் வெளியிடப்பட்டன.

மதுராந்தகத்தில் 20,040 வாக்குகள் வித்தியாசத்தில் தவெக அபார வெற்றி
இதேபோன்று, மதுராந்தகம் சட்டமன்றத் தொகுதியிலும் தவெக தனது ஆதிக்கத்தை நிலைநாட்டியுள்ளது. 27 சுற்றுகளாக நடைபெற்ற வாக்கு எண்ணிக்கையின் முடிவில், தவெக வேட்பாளர் மரகதம் குமரவேல் 20,040 வாக்குகள் வித்தியாசத்தில் வெற்றி வேட்பாளராக உருவெடுத்துள்ளார்.

இத்தொகுதியிலும் திமுக இரண்டாம் இடத்தையும், அதிமுக மூன்றாவது இடத்தையும் பெற்றுள்ளன.

மதுராந்தகம் - வாக்கு நிலவரம்:

மரகதம் குமரவேல் (தவெக) - 74,048 (வெற்றி)

பரந்தாமன் (திமுக) - 54,008

கனிதா சம்பத் (அதிமுக) - 47,450

ஜானகிராமன் (நாம் தமிழர் கட்சி) - 2,709

பி.சுகந்தி (மார்க்சிஸ்ட் கம்யூனிஸ்ட் கட்சி) - 1,986

மதுராந்தகம் தொகுதியில் மரகதம் குமரவேல் (தவெக), பரந்தாமன் (திமுக), கணிதா சம்பத் (அதிமுக), பி.சுகந்தி (மார்க்சிஸ்ட் கம்யூனிஸ்ட்), ஜானகிராமன் (நாம் தமிழர்) மற்றும் சுயேச்சை வேட்பாளர்கள் உட்பட மொத்தம் 28 போட்டியாளர்கள் களத்திலிருந்தனர். இத்தொகுதியில் 86.26 சதவீத வாக்குகள் பதிவாகியிருந்த நிலையில், 27 சுற்றுகளாக வாக்குகள் எண்ணப்பட்டு முடிவுகள் அறிவிக்கப்பட்டன.

நடைபெற்று முடிந்த இரு தொகுதி இடைத்தேர்தலிலும் வெற்றி பெற்றதன் மூலம், தமிழக அரசியல் களத்தில் தமிழக வெற்றிக் கழகம் முக்கிய காரணியாக உருவெடுத்துள்ளதாக அரசியல் விமர்சகர்கள் கருத்துத் தெரிவித்து வருகின்றனர்.