‘தத் த்வம் அஸி’ படத்தின் தலைப்பு ‘மணிகண்டா’ என மாற்றம்!
ஆன்மீகப் பின்னணியில் உருவாகியுள்ள நடிகர் வைபவின் புதிய திரைப்படமான ‘தத் த்வம் அஸி’ படத்தின் தலைப்பு ‘மணிகண்டா’ என மாற்றப்பட்டுள்ளது.
இப்படத்தில் வைபவ் கதாநாயகனாக நடித்துள்ளார். மீனாட்சி கோவிந்தராஜன், அரவிந்த் ஆகாஷ், ஆடுகளம் நரேன், ஹரீஷ் பெரேடி, அர்ஜய் உள்ளிட்ட பலர் முக்கிய கதாபாத்திரங்களில் நடித்துள்ளனர்.
தந்த்ரா ஃபிலிம்ஸ் சார்பில் ஜே.கே. சரவணா மற்றும் எம். ராஜாராம் இணைந்து தயாரிக்கும் இப்படத்தில், வெங்கட் பிரபு கிரியேட்டிவ் புரொடியூசராகப் பணியாற்றுகிறார். ‘மாளிகப்புரம்’ திரைப்படத்தை இயக்கிய விஷ்ணு சசி சங்கர் இப்படத்தை இயக்கியுள்ளார்.
படத்துக்கு பிரேம் ஜி அமரன் இசையமைத்துள்ளதுடன், யுவன் செல்வா ஒளிப்பதிவுப் பணிகளையும் மேற்கொண்டுள்ளார். இப்படத்தின் முதல் தோற்றத்தை நடிகர் ரவிமோகன் வெளியிட்டுள்ளார்.
ஐயப்ப பக்தர்களின் ஆன்மீகப் பயணத்தை மையமாகக் கொண்ட கதை
ஐயப்ப பக்தர்களின் ஆன்மீகப் பயணத்தை மையமாகக் கொண்டு இப்படத்தின் கதை உருவாக்கப்பட்டுள்ளதாகப் படக்குழு தெரிவித்துள்ளது.
குடும்ப ரசிகர்களைக் கவரும் வகையில் உருவாகியுள்ள இப்படம், ‘காந்தாரா’, ‘ஹனுமன்’ மற்றும் ‘கருப்பு’ போன்ற பக்தி மற்றும் ஆன்மீக அம்சங்கள் கலந்த திரைப்படங்களின் வரிசையில் ரசிகர்களிடம் வரவேற்பைப் பெறும் எனப் படக்குழுவினர் நம்பிக்கை வெளியிட்டுள்ளனர்.
தலைப்பு மாற்றத்தைத் தொடர்ந்து, ‘மணிகண்டா’ திரைப்படம் குறித்த எதிர்பார்ப்பு ரசிகர்கள் மத்தியில் அதிகரித்துள்ளது.
