“திரைப்படங்கள் மூலம் சமூகத்தில் நல்ல மாற்றம் உருவாக வேண்டும்” – இயக்குநர் கார்த்திக் சுப்புராஜ்
திரைப்படங்கள் மூலம் சமூகத்தில் நல்ல உரையாடல்களும், நேர்மறையான மாற்றங்களும் உருவாக வேண்டும் எனத் திரைப்பட இயக்குநர் கார்த்திக் சுப்புராஜ் தெரிவித்துள்ளார்.
கார்த்திக் சுப்புராஜ் இயக்கத்தில் வெளியாகி ரசிகர்களிடையே வரவேற்பைப் பெற்ற ‘டோரதி’ திரைப்படக் குழுவினருக்குப் பாராட்டு விழா புதுச்சேரியில் நடைபெற்றது.
புதுச்சேரி முற்போக்கு எழுத்தாளர் கலைஞர்கள் சங்கம், புதுச்சேரி திரைப்பட இயக்கம் மற்றும் சகோதரன் சமூக நல மேம்பாட்டு நிறுவனம் ஆகியவை இணைந்து இந்த விழாவை ஏற்பாடு செய்திருந்தன.
புதுச்சேரியில் உள்ள அலையன்ஸ் பிரான்சேஸ் அரங்கில் நடைபெற்ற இவ்விழாவுக்குச் சகோதரன் சமூக நல மேம்பாட்டு நிறுவனத்தின் தலைவர் சீத்தல் நாயக் தலைமை தாங்கினார்.
விழாவில் உரையாற்றிய இயக்குநர் கார்த்திக் சுப்புராஜ், சமூகத்தில் திருநங்கைகள் எதிர்கொள்ளும் பாகுபாடுகளும், அவர்களைப் பற்றிய தவறான புரிதல்களும் மாற வேண்டும் என வலியுறுத்தினார்.
“கலை என்பது ஒரு ஆயுதம். அதன் மூலம் சமூகத்தில் மாற்றத்தை உருவாக்க வேண்டும். ஒரு திரைப்படத்தை உருவாக்குவதுடன் நமது பணி முடிந்துவிடக் கூடாது. அந்தத் திரைப்படத்தின் மூலம் சமூகத்தில் நல்ல உரையாடல்களும், நேர்மறையான மாற்றங்களும் ஏற்பட வேண்டும்.
‘டோரதி’ திரைப்படத்துக்குக் கிடைத்த வெற்றி வெறும் வசூல் வெற்றி மட்டுமல்ல. பல்வேறு தரப்புகளைச் சேர்ந்த மக்கள் இந்தப் படத்தைப் பார்த்து, அதுகுறித்து உரையாடத் தொடங்கியிருப்பதே மிகப்பெரிய வெற்றி” என அவர் தெரிவித்தார்.
இந்நிகழ்வில் நடிகர்கள் ரிஷிகாந்த், சனந்து உள்ளிட்டோர் கலந்துகொண்டனர். விழாவில் பங்கேற்ற நடிகர்களுடன் புகைப்படங்கள் மற்றும் செல்ஃபிகள் எடுத்துக்கொள்வதற்கு ரசிகர்கள் ஆர்வம் காட்டினர்
