சென்னையில் ரூ.1,401 கோடி செலவில் 6,157 புதிய அடுக்குமாடிக் குடியிருப்புகள் – முதல்வர் விஜய் ஒப்புதல்

சென்னையில் 9 திட்டப் பகுதிகளில் ரூ.1,401.75 கோடி மதிப்பீட்டில் 6,157 அடுக்குமாடிக் குடியிருப்புகளைக் கட்டுவதற்கு தமிழக முதல்வர் விஜய் ஒப்புதல் அளித்துள்ளார்.

நகர்ப்புற ஏழை மற்றும் பொருளாதாரத்தில் நலிவடைந்த மக்களுக்கு பாதுகாப்பான, தரமான வீடுகளை வழங்கும் நோக்கில் இந்தத் திட்டம் முன்னெடுக்கப்படவுள்ளதாக தமிழக அரசு தெரிவித்துள்ளது.

இதுகுறித்து தமிழக அரசு வெளியிட்டுள்ள செய்திக் குறிப்பில், குடிசைகள் இல்லாத தமிழகத்தை உருவாக்கும் நோக்கில், அடிப்படை வசதிகளுடன் கூடிய தரமான குடியிருப்புகளை அமைப்பதற்குப் பல்வேறு திட்டங்கள் செயல்படுத்தப்பட்டு வருவதாகக் குறிப்பிடப்பட்டுள்ளது.

இதன் ஒரு பகுதியாக, தமிழ்நாடு நகர்ப்புற வாழ்விட மேம்பாட்டு வாரியத்தின் (TNUHDB) கீழ் உள்ள பழுதடைந்த குடியிருப்புகளை மீண்டும் கட்டமைப்பதற்கும், பொருளாதாரத்தில் நலிவடைந்த பிரிவினருக்கான புதிய வீட்டுவசதித் திட்டத்தைச் செயல்படுத்துவதற்கும் முதல்வர் விஜய் ஒப்புதல் வழங்கியுள்ளார்.

இந்தத் திட்டத்தின் கீழ், நவீன வசதிகள் மற்றும் தேவையான அடிப்படை உள்கட்டமைப்பு வசதிகளுடன் கூடிய குடியிருப்புகள் அமைக்கப்படவுள்ளன.

கட்டப்படவுள்ள குடியிருப்புகளின் விபரங்கள்:

1. அனாதைக்குப்பம் – 64 குடியிருப்புகள்
2. பழைய பிளாக், வியாசர்பாடி – 1,158 குடியிருப்புகள்
3. ஃபோர்ஷோர் எஸ்டேட் – 1,484 குடியிருப்புகள்
4. ருக்மணி நகர் – 111 குடியிருப்புகள்
5. முல்லை நகர் – 462 குடியிருப்புகள்
6. உதயசூரியன் நகர் – 850 குடியிருப்புகள்
7. பச்சைக்கல் வீராசாமி தெரு – 912 குடியிருப்புகள்
8. மேற்குக் கல்லறை சாலை – 792 குடியிருப்புகள்
9. கக்கன் காலனி – 324 குடியிருப்புகள்

இவ்வாறு சென்னையில் மொத்தம் 9 திட்டப் பகுதிகளில் ரூ.1,401.75 கோடி செலவில் 6,157 அடுக்குமாடிக் குடியிருப்புகள் கட்டப்படவுள்ளதாக தமிழக அரசின் செய்திக் குறிப்பில் தெரிவிக்கப்பட்டுள்ளது.