சமயபுரம் இரட்டைக் கொலை வழக்கில் 6 பேர் கைது: தப்பியோட முயன்ற இளைஞர் மீது பொலிஸார் துப்பாக்கிச் சூடு

இந்தியாவின் தமிழகத்தில், திருச்சி மாவட்டம் சமயபுரத்தில் இரண்டு சிறார்கள் வெட்டிக் கொலை செய்யப்பட்ட சம்பவம் தொடர்பில் ஆறு பேர் கைது செய்யப்பட்டுள்ளதுடன், பொலிஸாரிடமிருந்து தப்பியோட முயன்ற சந்தேகநபர் ஒருவர் துப்பாக்கிச் சூட்டுக்கு இலக்காகிக் காயமடைந்துள்ளார்.

சமயபுரம் சுங்கச்சாவடி அருகே தீபாவளி தினத்தன்று நள்ளிரவில் இடம்பெற்ற இந்தச் சம்பவத்தில், இனாம் சமயபுரம் பகுதியைச் சேர்ந்த ராகுல் (17), விஷால் (17) ஆகிய இரு சிறார்கள் வெட்டிக் கொலை செய்யப்பட்டனர். இச்சம்பவம் அப்பகுதியில் பெரும் பரபரப்பை ஏற்படுத்தியிருந்தது.

சம்பவம் தொடர்பில் வழக்குப் பதிவு செய்த சமயபுரம் பொலிஸார், சந்தேகநபர்களைத் தேடி வந்த நிலையில், கொலைச் சம்பவத்துடன் தொடர்புடையவர்கள் எனக் கருதப்படும் கிருபாகரன் (19), ஹரிஹரன் (22), சிவனேசன் (21), சரவணன் (18), கெனி வின்ஸ் (19) மற்றும் ரெனிசன் (20) ஆகிய ஆறு பேரைக் கைது செய்து விசாரணைக்கு உட்படுத்தினர்.

பொலிஸாரின் விசாரணைகளில், கொலை செய்யப்பட்ட ராகுலுக்கும் சந்தேகநபரான கெனி வின்ஸுக்கும் இடையே சிறுமி ஒருவருடனான காதல் தொடர்பில் ஏற்பட்ட முரண்பாடே இரட்டைக் கொலைக்குக் காரணம் எனத் தெரியவந்துள்ளது.

இந்நிலையில், கொலைக்குப் பயன்படுத்தப்பட்ட ஆயுதங்களை மீட்பதற்காக சந்தேகநபர்களில் ஒருவரான சிவனேசனை இன்று அதிகாலை கரியமாணிக்கம் பிரிவு சாலைக்கு பொலிஸார் அழைத்துச் சென்றுள்ளனர்.

இதன்போது, சிவனேசன் கற்கள் மற்றும் ஆயுதங்களைக் கொண்டு பொலிஸாரைத் தாக்கியதாகவும், இதனால் பொலிஸ் ஜீப்பின் கண்ணாடி சேதமடைந்ததாகவும் தெரிவிக்கப்படுகிறது.

மேலும், அரிவாளால் காவலர் மோகனை வெட்டிவிட்டு அங்கிருந்து தப்பியோட முயன்ற சிவனேசனை, சமயபுரம் பொலிஸ் நிலையப் பொறுப்பதிகாரி குணசேகரன் துப்பாக்கியால் சுட்டுள்ளார்.

இதில் சிவனேசனின் இடது காலில் துப்பாக்கிச் சூடு பாய்ந்து அவர் காயமடைந்துள்ளார். காயமடைந்த காவலர் மோகன் மற்றும் சந்தேகநபர் சிவனேசன் ஆகிய இருவரும் திருச்சி அரசு மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

இதற்கிடையில், திருச்சி மாவட்ட பொலிஸ் கண்காணிப்பாளர் டோங்கரே பிரவீன் உமேஷ் இன்று காலை 9 மணியளவில் அரசு மருத்துவமனைக்குச் சென்று சிகிச்சை பெற்று வரும் காவலர் மோகனை நேரில் சந்தித்து நலம் விசாரித்ததுடன், அவரது பணியையும் பாராட்டியுள்ளார்.

பின்னர் ஊடகங்களிடம் கருத்துத் தெரிவித்த பொலிஸ் கண்காணிப்பாளர், ராகுலும் கெனி வின்ஸும் ஒரே சிறுமியைக் காதலித்து வந்ததாகவும், அந்தச் சிறுமியைக் காதலிக்கக் கூடாது என ராகுலை கெனி எச்சரித்திருந்ததாகவும் குறிப்பிட்டார்.

இந்த முன்விரோதம் காரணமாக கெனி வின்ஸ் உள்ளிட்ட ஆறு பேரும் இணைந்து ராகுலைக் கொலை செய்துள்ளதாகவும், சம்பவத்தின்போது அவருடன் இருந்த விஷாலும் கொலை செய்யப்பட்டுள்ளதாகவும் அவர் தெரிவித்தார்.

மேலும், ஆயுதங்களை மீட்பதற்காக அழைத்துச் செல்லப்பட்டபோது சிவனேசன் பொலிஸாரைத் தாக்கிவிட்டு தப்ப முயன்றதால், அவரைப் பொலிஸார் துப்பாக்கியால் சுட்டுப் பிடித்ததாகவும், இதன்போது காவலர் மோகனும் காயமடைந்ததாகவும் அவர் கூறினார்.

இதேவேளை, கைது செய்யப்பட்டுள்ள கெனி வின்ஸ் மீது ஏற்கெனவே ஐந்து வழக்குகளும், ரெனிசன் மீது நான்கு வழக்குகளும், சிவனேசன் மீது ஒரு அடிதடி வழக்கும் நிலுவையில் உள்ளதாகவும் பொலிஸார் தெரிவித்துள்ளனர்.