சிறையில் உள்ள மதத் தலைவர்கள் மத ஆடைகளை அணிய புதிய விதிமுறைகள் வெளியீடு!

இலங்கையில் சிறைத்தண்டனை அனுபவிக்கும் பௌத்த பிக்குகள், குறிப்பிட்ட நிபந்தனைகளின் கீழ் தங்களது காவியுடைகளை அணிய அனுமதிக்கும் வகையில் அரசாங்கம் புதிய விதிமுறைகளை அறிமுகப்படுத்தியுள்ளது.

இதற்கமைய, 2026 ஒக்டோபர் 20ஆம் திகதியிடப்பட்ட விசேட வர்த்தமானி அறிவித்தல் வெளியிடப்பட்டுள்ளது. நீதி மற்றும் தேசிய ஒருமைப்பாட்டு அமைச்சரின் அங்கீகாரத்துடன், சிறைச்சாலைகள் கட்டளைச் சட்டத்தின் (அத்தியாயம் 54) கீழ், சிறைச்சாலைகள் திணைக்களத்தின் நிலையான கட்டளைகளில் திருத்தங்கள் மேற்கொள்ளப்பட்டுள்ளன.

புதிய விதிமுறைகளின்படி, பௌத்த பிக்கர் ஒருவர் சிறையில் அடைக்கப்படும்போது, அவர் காவியுடையை களைவது தொடர்பாக சிறைச்சாலைகள் ஆணையாளர், பௌத்த விவகாரங்கள் திணைக்களத்துடன் கலந்தாலோசிக்க வேண்டும்.

இதனைத் தொடர்ந்து, பௌத்த விவகாரங்கள் திணைக்களம் சம்பந்தப்பட்ட நிகாயம் அல்லது பீடத்துக்கு அறிவித்து, அதன் தீர்மானத்தை 10 நாட்களுக்குள் சிறைச்சாலைகள் ஆணையாளருக்குத் தெரிவிக்க வேண்டும்.

குறித்த காலப்பகுதிக்குள் பதில் கிடைக்காத பட்சத்தில், தொடர்புடைய சட்ட ஏற்பாடுகளுக்கு அமைய சிறைச்சாலைகள் ஆணையாளர் தேவையான நடவடிக்கைகளை மேற்கொள்ள முடியும்.

மேலும், சிறையில் தடுத்து வைக்கப்பட்டுள்ள பௌத்த பிக்கர்கள், கைதிகள் என்ற அடிப்படையில் சிறைச்சாலைக்கு வெளியே அழைத்துச் செல்லப்படும்போதும் காவியுடையை அணிவதற்கு புதிய திருத்தங்கள் அனுமதியளிக்கின்றன.

எனினும், சம்பந்தப்பட்ட நிகாயம் அல்லது பீடம் குறித்த பிக்கர் காவியுடையை அணிவதற்கு அனுமதி வழங்காத பட்சத்தில், சிறைச்சாலைகள் ஆணையாளர் அதற்கேற்ற நடவடிக்கைகளை மேற்கொள்ள வேண்டும்.

அத்துடன், பிக்கர் ஒருவர் சிறையில் அடைக்கப்பட்டு ஏழு வேலை நாட்களுக்குள், அவரது காவியுடையை அணிவதற்கான அனுமதியை சம்பந்தப்பட்ட நிகாயம் அல்லது பீடத்திடமிருந்து பெற்றுக்கொள்ளுமாறு பௌத்த விவகாரங்கள் திணைக்களத்திடம் சிறைச்சாலைகள் ஆணையாளர் கோரிக்கை விடுக்க வேண்டும் என்றும் புதிய விதிமுறைகளில் குறிப்பிடப்பட்டுள்ளது.

இந்த விதிமுறைகள் பௌத்த பிக்கர்களுக்கு மட்டுமன்றி, தேவையான மாற்றங்களுடன் ஏனைய மதங்களைச் சேர்ந்த மதகுருமார்களுக்கும் பொருந்தும் என வர்த்தமானி அறிவித்தலில் தெரிவிக்கப்பட்டுள்ளது.

சிறையில் தடுத்து வைக்கப்படும் பௌத்த பிக்கர்களின் நடத்தைகள் மற்றும் அவர்கள் காவியுடையை அணிவதற்கு அனுமதிக்கப்பட வேண்டுமா என்பது தொடர்பில் பொதுமக்கள் மத்தியில் விவாதங்கள் இடம்பெற்று வரும் நிலையில், இந்தப் புதிய விதிமுறைகள் அறிமுகப்படுத்தப்பட்டுள்ளன.