இறால் பிடிப்புத் தடையை மீறிய குற்றச்சாட்டில் இருவர் கைது!
சட்டவிரோதமாகப் பிடிக்கப்பட்டதாகச் சந்தேகிக்கப்படும் 20 கடல் இரால்களை விற்பனைக்குத் தயார்படுத்திக் கொண்டிருந்த இருவர் இலங்கை கடலோரக் காவல்படையினரால் கைது செய்யப்பட்டுள்ளனர்.
பிராமணவத்த, ஹரஸ்பொல மீன்பிடித் துறைமுகத்திற்கு அருகில் இந்தச் சம்பவம் இடம்பெற்றுள்ளதாக இலங்கை கடலோரக் காவல்படை தெரிவித்துள்ளது.
கடலோரக் காவல்படையினருக்குக் கிடைத்த புலனாய்வுத் தகவலின் அடிப்படையில் மேற்கொள்ளப்பட்ட விசேட நடவடிக்கையின்போதே சந்தேகநபர்கள் கைது செய்யப்பட்டுள்ளனர்.
1996ஆம் ஆண்டின் 2ஆம் இலக்க மீன்பிடி மற்றும் நீர்வாழ் வளங்கள் சட்டத்தின் 34ஆவது பிரிவையும், ஒக்டோபர் மாதத்தில் கடல் இரால் பிடிப்பதற்குத் தடை விதிக்கும் விதிமுறைகளையும் மீறியதாகக் குற்றஞ்சாட்டப்பட்டே இவர்கள் கைது செய்யப்பட்டுள்ளனர்.
கைது செய்யப்பட்ட இருவரும், அவர்களிடமிருந்து கைப்பற்றப்பட்ட 20 கடல் இரால்களும் மேலதிக விசாரணைகள் மற்றும் சட்ட நடவடிக்கைகளுக்காக ஒப்படைக்கப்பட்டுள்ளன.
சட்டவிரோத மீன்பிடி நடவடிக்கைகளைத் தடுத்து, நாட்டின் கடல் வளங்களைப் பாதுகாக்கும் நோக்கில் இவ்வாறான நடவடிக்கைகள் தொடர்ச்சியாக முன்னெடுக்கப்பட்டு வருவதாக இலங்கை கடலோரக் காவல்படை தெரிவித்துள்ளது.
