மன்னாரில் இராணுவ வாகனம் விபத்து – சிப்பாய் உயிரிழப்பு; 11 பேர் காயம்

மன்னார் – தலைமன்னார் பிரதான வீதியில் இராணுவத்தினரின் டிஃபென்டர் (Defender) வாகனம் பனை மரத்துடன் மோதி விபத்துக்குள்ளானதில் இராணுவச் சிப்பாய் ஒருவர் உயிரிழந்துள்ளதுடன், மேலும் 11 பேர் காயமடைந்துள்ளனர்.

இந்த விபத்து நேற்று (ஒக்டோபர் 24) கிளியன்குடியிருப்பு பகுதியில் இடம்பெற்றுள்ளது.

தலைமன்னாரிலிருந்து மன்னார் நோக்கிப் பயணித்துக்கொண்டிருந்த இராணுவ வாகனம், சாரதியின் கட்டுப்பாட்டை இழந்து வீதியோரத்தில் இருந்த பனை மரத்துடன் மோதியதாகத் தெரிவிக்கப்படுகிறது.

வாகனத்தில் பயணித்த 12 இராணுவ வீரர்களும் படுகாயமடைந்த நிலையில், ஆரம்பகட்ட சிகிச்சைக்காக பேசாலை வைத்தியசாலையில் அனுமதிக்கப்பட்டுள்ளனர்.

இதன்போது, காயமடைந்தவர்களில் இராணுவச் சிப்பாய் ஒருவர் சிகிச்சை பலனின்றி உயிரிழந்துள்ளார். ஏனைய 11 பேரும் மேலதிக சிகிச்சைக்காக மன்னார் மாவட்ட பொது வைத்தியசாலைக்கு மாற்றப்பட்டுள்ளனர்.

மன்னார் பகுதிக்கு விஜயம் மேற்கொண்டிருந்த சுகாதார அமைச்சர் டொக்டர் நளிந்த ஜயதிஸ்ஸ, காயமடைந்த இராணுவ வீரர்களின் நலன் குறித்து அறிந்துகொள்வதற்காக வைத்தியசாலைகளுக்குச் சென்றதாகவும் தெரிவிக்கப்படுகிறது.

இந்த விபத்தில் இராணுவ டிஃபென்டர் வாகனம் பலத்த சேதமடைந்துள்ளது.