‘சிங்காரம்’ திரைப்படத்தில் உரிமைக்காகப் போராடும் யோகி பாபு: அக்டோபர் 30-ல் திரைக்கு வருகிறது!
தமிழ் திரையுலகின் முன்னணி நகைச்சுவை நடிகரான யோகி பாபு கதையின் நாயகனாக முதன்மைப் பாத்திரத்தில் நடித்துள்ள புதிய திரைப்படமான ‘சிங்காரம்’ குறித்த அதிகாரப்பூர்வ அறிவிப்பு வெளியாகியுள்ளது. இத்திரைப்படம் எதிர்வரும் அக்டோபர் 30-ஆம் தேதியன்று உலகெங்கிலும் உள்ள திரையரங்குகளில் வெளியாகவுள்ளதாக படக்குழுவினர் அதிகாரப்பூர்வமாக அறிவித்துள்ளனர்.
‘ராஜவம்சம்’ திரைப்படத்தை இயக்கிய இயக்குநர் கே.வி.கதிர்வேலு இப்படத்தை இயக்கியுள்ளார். இசையமைப்பாளர் சாம் சி.எஸ். இப்படத்திற்கு இசையமைத்துள்ளார். ‘ராக் புரொடக்ஷன்’ நிறுவனத்தின் சார்பில் ஏ.எஸ்.ரமண பாலாஜி மற்றும் பத்மாவதி காந்தி ஆகியோர் இணைந்து இப்படத்தைத் தயாரித்துள்ளனர்.
இத்திரைப்படத்தில் யோகி பாபுவுடன் இணைந்து வேல ராமமூர்த்தி, எம்.எஸ்.பாஸ்கர், மரியா வின்சென்ட், சாம்ஸ் மற்றும் ஆர்த்தி கணேஷ் உள்ளிட்ட பலரும் முக்கிய கதாபாத்திரங்களில் நடித்துள்ளனர். பிரசன்னா எஸ்.குமார் ஒளிப்பதிவுப் பணியை மேற்கொண்டுள்ளார்.
படத்தின் கதைக்களம் குறித்து படக்குழுவினர் தெரிவிக்கையில்:
"தனது உரிமையையும் சுயமரியாதையையும் நிலைநாட்டப் போராடும் ஒரு எளிய மனிதனின் வாழ்வியல் பயணத்தை, நகைச்சுவையும் உணர்வுபூர்வமான தருணங்களும் இணைந்த ஒரு திரைக்கதையின் வழியாக இப்படத்தில் சொல்லியிருக்கிறோம். அன்றாட வாழ்க்கையில் நாம் எதிர்கொள்ளும் சவால்களையும், அவற்றைக் கடந்து முன்னேறுவதற்கான மன உறுதியையும் மையப்படுத்தி, முழுமையான பொழுதுபோக்குடன் கூடிய சமூகக் கருத்தை இப்படம் பேசும். குறிப்பாக, இத்திரைப்படத்தில் நரிக்குறவர் சமுதாயத்தைச் சேர்ந்தவராக யோகி பாபு நடித்துள்ளார்" என்று குறிப்பிட்டுள்ளனர்.
சமூகப் பார்வையுடன் கூடிய வாழ்வியல் படைப்பாக உருவாகியுள்ள ‘சிங்காரம்’ திரைப்படம் ரசிகர்களிடையே மிகுந்த எதிர்பார்ப்பை ஏற்படுத்தியுள்ளது.
