‘ஜெயிலர் 2’ சிறப்பு நிகழ்ச்சி அக். 9-ல் ஒளிபரப்பு: படக்குழு அறிவிப்பு

சூப்பர் ஸ்டார் ரஜினிகாந்தின் நடிப்பில் வெளியாகவுள்ள ‘ஜெயிலர் 2’ திரைப்படத்தின் நடிகர்கள் மற்றும் தொழில்நுட்பக் கலைஞர்கள் பங்கேற்ற சிறப்பு நிகழ்ச்சி, எதிர்வரும் அக்டோபர் மாதம் 9 ஆம் திகதி சன் நெக்ஸ்ட் (Sun NXT) இணையவழித் தளத்தில் (OTT) ஒளிபரப்பப்படவுள்ளதாக படக்குழுவினர் உத்தியோகபூர்வமாக அறிவித்துள்ளனர்.

இயக்குநர் நெல்சன் திலீப்குமார் இயக்கத்தில் உருவாகியுள்ள இத்திரைப்படம் எதிர்வரும் அக்டோபர் மாதம் 15 ஆம் திகதி திரையரங்குகளில் உலகளாவிய ரீதியில் திரையிடப்படவுள்ளது. இந்நிலையில், படத்தின் விளம்பர நடவடிக்கைகளின் ஒரு பகுதியாக, இச்சிறப்பு நிகழ்ச்சி இணையவழித் தளத்தில் வெளியாகவுள்ளது.

இச்சிறப்பு நிகழ்ச்சியில் நடிகர் ரஜினிகாந்துடன் இணைந்து படத்தில் நடித்த எஸ்.ஜே.சூர்யா, வித்யா பாலன், சுராஜ் வெஞ்சரமூடு, ரம்யா கிருஷ்ணன் உள்ளிட்ட பல பிரபல நடிகர்கள் பங்கேற்றுள்ளனர்.

இது தொடர்பில் தயாரிப்பு நிறுவனமான சன் பிக்சர்ஸ் (Sun Pictures) நிறுவனம் தனது எக்ஸ் (X - Twitter) சமூக வலைத்தளப் பக்கத்தில் வெளியிட்டுள்ள பதிவில், "சூப்பர் ஸ்டாரின் சிறப்பு நிகழ்ச்சிக்குத் தயாராகுங்கள். ‘ஜெயிலர் 2’ சிறப்பு நிகழ்ச்சி அக்டோபர் 9 ஆம் திகதி முதல் சன் நெக்ஸ்ட் தளத்தில் மாத்திரம் பிரத்தியேகமாக ஒளிபரப்பாகும்" எனக் குறிப்பிட்டுள்ளது.

இதனிடையே, இத்திரைப்படத்தின் முன்னோட்டக் காட்சி (Trailer) கடந்த திங்கட்கிழமை வெளியிடப்பட்டது. 2023 ஆம் ஆண்டு வெளியாகி பெரும் வரவேற்பைப் பெற்ற ‘ஜெயிலர்’ திரைப்படத்தின் தொடர்ச்சியாக இப்பாகம் உருவாகியுள்ளது. தனது மகனின் மறைவுக்குப் பிறகு, சுய அடையாளத்தை மறைத்து ஓட்டுநராக (Driver) வாழும் ‘டைகர்’ முத்துவேல் பாண்டியன், ‘கல்பக்ஸ்’ எனும் கடத்தல் கும்பலைத் தேடிக் கண்டுபிடித்து வேட்டையாடும் விறுவிறுப்பான கதைக் களம் முன்னோட்டக் காட்சியில் காண்பிக்கப்பட்டுள்ளது.

சன் பிக்சர்ஸ் நிறுவனத்தின் தயாரிப்பில் உருவாகியுள்ள இத்திரைப்படத்தில் ரஜினிகாந்துடன் எஸ்.ஜே. சூர்யா, சுராஜ் வெஞ்சரமூடு, வித்யா பாலன், மிதுன் சக்ரவர்த்தி, ரம்யா கிருஷ்ணன், யோகி பாபு உள்ளிட்ட பலர் முக்கிய கதாபாத்திரங்களில் நடித்துள்ளனர். அத்துடன் சிவராஜ்குமார், மோகன்லால் மற்றும் ஹ்ரித்திக் ரோஷன் ஆகியோர் சிறப்புத் தோற்றங்களில் நடித்துள்ளமை குறிப்பிடத்தக்கது.