‘சாதி’ எனும் சவாலை எதிர்கொள்ளும் ‘தி கிராண்ட் மாஸ்டர்’ : திரைப்பட அறிமுகம்
எழுத்தாளர் பெருமாள் முருகனின் ‘வரகரிசி’ சிறுகதையைத் தழுவி உருவான ‘சேத்துமான்’ (2022) திரைப்படத்தின் மூலம் தமிழ் சினிமா உலகில் கவனம் ஈர்த்த சிறுவன் அஸ்வின், மீண்டும் முதன்மைப் பாத்திரத்தில் நடித்துள்ள ‘தி கிராண்ட் மாஸ்டர்’ திரைப்படத்தின் வெளியீட்டுத் தகவல்கள் வெளியாகியுள்ளன.
பிரபல திரைப்பட இயக்குநர்களான எஸ்.பி.ஜனநாதன், ஹெச்.வினோத் மற்றும் சீனு ராமசாமி ஆகியோரிடம் உதவி இயக்குநராகப் பணியாற்றிய வெற்றிச்செழியன், இத்திரைப்படத்தின் மூலம் இயக்குநராக அறிமுகமாகிறார்.
திரைக்கதை அமைப்பு:
தூய்மைப் பணியாளராகப் பணியாற்றும் தாய் ஒருவர், சமூகப் புறக்கணிப்புகளுக்கு மத்தியிலும் தனது மகனைச் சதுரங்கப் போட்டியில் சாம்பியனாக உருவாக்கப் போராடும் லட்சியப் பயணமே இப்படத்தின் மையக்கதையாகும். சமுதாயத்தில் நிலவும் சாதியக் தடைகளைக் கடந்து, தாயும் மகனும் தங்கள் இலக்கை எவ்வாறு அடைகிறார்கள் என்பதை உணர்வுப்பூர்வமாகத் திரைக்கதையில் இயக்குநர் காட்சிப்படுத்தியுள்ளார்.
இப்படத்தில் அஸ்வினின் தாயாராக நடிகை அபர்ணதி முதன்மைப் பாத்திரமேற்று நடித்துள்ளார். இவர்களுடன் லிங்கேஷ், சுரேஷ் மேனன், தமிழரசி மற்றும் அன்பு உள்ளிட்ட பலர் முக்கியக் கதாபாத்திரங்களில் நடித்துள்ளனர்.
சமீபத்தில் வெளியான ‘மண்டாடி’ திரைப்படத்தைத் தொடர்ந்து, விளையாட்டு மையக் கருவைக் கொண்ட திரைப்படங்களுக்குத் தமிழ் ரசிகர்களிடையே நிலவும் வரவேற்பை ‘தி கிராண்ட் மாஸ்டர்’ திரைப்படமும் தொடரும் என எதிர்பார்க்கப்படுகிறது.
