கவுதம் ராம் கார்த்திக் நடிக்கும் புதிய படம் ‘செங்குலம்’ – தலைப்பு போஸ்டர் வெளியீடு
நடிகர் கவுதம் ராம் கார்த்திக் கதாநாயகனாக நடிக்கும் புதிய திரைப்படத்துக்கு ‘செங்குலம்’ எனப் பெயரிடப்பட்டுள்ளது.
அறிமுக இயக்குநர் சின்னசாமி பொன்னையா திரைக்கதை, வசனம் எழுதி இயக்கும் இப்படத்துக்கு யுவன் சங்கர் ராஜா இசையமைக்கிறார். கிஃப்ட்சன் ராபர்ட் ஒளிப்பதிவுப் பணிகளை மேற்கொள்கிறார். கண்ணன் ரவி குழுமம் சார்பில் கண்ணன் ரவி இப்படத்தைத் தயாரிக்கிறார். தீபக் ரவி இணைத் தயாரிப்பாளராகப் பணியாற்றுகிறார்.
இப்படத்தின் படப்பிடிப்பு தூத்துக்குடி மாவட்டம் கோவில்பட்டியில் தொடங்கியுள்ளது. தொடர்ந்து தூத்துக்குடி, திருநெல்வேலி, தென்காசி, தேனி, பொள்ளாச்சி உள்ளிட்ட தமிழகப் பகுதிகளிலும் காஷ்மீரிலும் படப்பிடிப்பு நடைபெறவுள்ளது.
தமிழ், தெலுங்கு, மலையாளம், கன்னடம், இந்தி என ஐந்து மொழிகளில் உருவாகும் இப்படம் 2027ஆம் ஆண்டு திரையரங்குகளில் வெளியாகும் என அறிவிக்கப்பட்டுள்ளது.
இந்நிலையில், ‘செங்குலம்’ திரைப்படத்தின் தலைப்பு போஸ்டர் மற்றும் கிளிம்ப்ஸ் வீடியோவைப் படக்குழு வெளியிட்டுள்ளது. தலைப்பு போஸ்டரில் ரத்தம் தோய்ந்த வேல்கம்பு, அதைச் சுற்றியுள்ள சிவப்பு நிறத் துணிகள், கரிசல் மண் மற்றும் புழுதி ஆகியவை இடம்பெற்றுள்ளன. படத்தின் தலைப்புக்கு ஏற்ற வகையில் அதிரடியான தோற்றத்தில் வெளியாகியுள்ள இந்தப் போஸ்டர் ரசிகர்களின் கவனத்தை ஈர்த்துள்ளது.
