கிரீஸில் கோலாகலமாக நடைபெற்ற அனிருத் – காவ்யா மாறன் திருமணம்; வெளியான திருமணப் புகைப்படங்கள்

பிரபல இசையமைப்பாளர் அனிருத் ரவிச்சந்தர் மற்றும் சன் ரைசர்ஸ் ஹைதராபாத் அணியின் இணை உரிமையாளர் காவ்யா மாறன் ஆகியோரின் திருமணம் கிரீஸில் இன்று (நவம்பர் 11) நடைபெற்றுள்ளது.

நவம்பர் 10 மற்றும் 11ஆம் திகதிகளில் திருமணக் கொண்டாட்டங்கள் இடம்பெற்ற நிலையில், திருமணத்தைத் தொடர்ந்து அனிருத் தனது சமூக வலைத்தளத்தில் புகைப்படம் ஒன்றைப் பகிர்ந்திருந்தார்.

இதனைத் தொடர்ந்து, திருமண நிகழ்வில் எடுக்கப்பட்ட பல புகைப்படங்கள் சமூக வலைத்தளங்களில் வெளியாகி வருகின்றன.

அவற்றில் ஒரு புகைப்படத்தில், புதுமணத் தம்பதியினர் நடிகர் ரஜினிகாந்த் மற்றும் தமிழக முதலமைச்சர் மு.க.ஸ்டாலின் ஆகியோருடன் இணைந்து காணப்படுகின்றனர்.

மேலும், சன் குழுமத் தலைவர் கலாநிதி மாறன், அவரது மனைவி மற்றும் அனிருத்தின் பெற்றோரும் அந்தப் புகைப்படத்தில் இடம்பெற்றுள்ளனர். திருமண நிகழ்வில் கலந்துகொண்டவர்கள் ஒரே நிறத்திலான ஆடைகளை அணிந்திருந்தமையும் புகைப்படங்களில் காணப்படுகிறது.

இதற்கிடையில், சன் நியூஸ் தொலைக்காட்சியும் திருமண நிகழ்வின் மற்றுமொரு புகைப்படத்தைப் பகிர்ந்துள்ளது.

திருமண உறுதிமொழிகளைப் பரிமாறிக்கொண்ட பின்னர் மேடையில் ஒருவரையொருவர் பார்த்தபடி அனிருத்தும் காவ்யா மாறனும் அன்பைப் பரிமாறிக்கொள்ளும் அழகான தருணம் அந்தப் புகைப்படத்தில் பதிவாகியுள்ளது.