சாதனை படைத்த ‘ஜெயிலர் 2’ திரைப்படம் – நவம்பர் 12 முதல் அமேசான் பிரைம் வீடியோவில்!
இந்தியத் திரைப்பட நடிகர் ரஜினிகாந்த் நடிப்பில் வெளியாகி பெரும் வரவேற்பைப் பெற்றுள்ள ‘ஜெயிலர் 2’ திரைப்படம் எதிர்வரும் நவம்பர் 12ஆம் திகதி முதல் அமேசான் பிரைம் வீடியோவில் ஒளிபரப்பாகவுள்ளதாக அறிவிக்கப்பட்டுள்ளது.
இந்தத் தகவலை அமேசான் பிரைம் வீடியோ நிறுவனம் உத்தியோகபூர்வமாக உறுதிப்படுத்தியுள்ளது.
தமிழில் உருவான இந்த அதிரடித் திரைப்படம் உலகளாவிய ரீதியில் 820 கோடி இந்திய ரூபாய்க்கும் அதிகமான வசூலைப் பெற்றுள்ளதாகத் தெரிவிக்கப்படுகிறது. இதன் மூலம் இதுவரை வெளியான தமிழ்த் திரைப்படங்களில் அதிக வசூலைப் பெற்ற திரைப்படமாக ‘ஜெயிலர் 2’ சாதனை படைத்துள்ளதாகப் பாக்ஸ் ஆபிஸ் மதிப்பீடுகள் தெரிவிக்கின்றன.
திரையரங்குகளில் திரைப்படம் தொடர்ந்து திரையிடப்பட்டு வரும் நிலையில், அதன் டிஜிட்டல் ஒளிபரப்பு தொடர்பான அறிவிப்பு வெளியாகியுள்ளது.
நெல்சன் திலீப்குமார் இயக்கியுள்ள இந்தத் திரைப்படத்தில், ஓய்வுபெற்ற சிறை அதிகாரியான முத்துவேல் பாண்டியன் கதாபாத்திரத்தில் ரஜினிகாந்த் மீண்டும் நடித்துள்ளார். சக்திவாய்ந்த குற்றக் கும்பல் ஒன்று அவரது குடும்பத்துக்கு அச்சுறுத்தலை ஏற்படுத்துவதையடுத்து, அவர் மீண்டும் ஆபத்தான சூழலுக்குள் இழுக்கப்படுவதே திரைப்படத்தின் முக்கியக் கதைக்களமாக அமைந்துள்ளது.
இத்திரைப்படத்தில் ரஜினிகாந்துடன் மோகன்லால், ஹிருத்திக் ரோஷன் மற்றும் விஜய் சேதுபதி உள்ளிட்ட இந்தியத் திரையுலகின் முன்னணி நட்சத்திரங்களும் நடித்துள்ளனர்.
இலங்கை உட்பட உலகளாவிய ரீதியில் 240க்கும் மேற்பட்ட நாடுகள் மற்றும் பிராந்தியங்களில் இத்திரைப்படத்தைப் பார்வையிட முடியும் என அமேசான் பிரைம் வீடியோ அறிவித்துள்ளது.
தமிழ், தெலுங்கு, ஹிந்தி, மலையாளம் மற்றும் கன்னடம் ஆகிய ஐந்து மொழிகளில் இந்தத் திரைப்படம் ஒளிபரப்பாகவுள்ளது.
இதன் மூலம் ‘ஜெயிலர்’ முதல் பாகத்தையும் அதன் இரண்டாம் பாகத்தையும் ஒரே தளத்தில் ரசிகர்கள் பார்வையிடும் வாய்ப்புக் கிடைத்துள்ளது.
