எரிவாயு தட்டுப்பாட்டுக்கு LAUGFS Gas CEO மன்னிப்பு; விலை உயர்வுக்கு விளக்கம்

LAUGFS Gas நிறுவனத்தின் 12.5 கிலோகிராம் எரிவாயு சிலிண்டரின் விலையை 1,775 ரூபாவால் அதிகரித்தமைக்கு ஆதரவாக விளக்கமளித்துள்ள அந்நிறுவனத்தின் பிரதம நிறைவேற்று அதிகாரி நளிந்த குருகுலசூரிய, அண்மையில் ஏற்பட்ட எரிவாயு தட்டுப்பாட்டுக்காக நுகர்வோரிடம் மன்னிப்புக் கோரியுள்ளார்.

பல வாரங்களாக நீடித்த எரிவாயு தட்டுப்பாட்டுக்கு சர்வதேச விநியோகத் தடைகள் மற்றும் ஹம்பாந்தோட்டை திரவமாக்கப்பட்ட பெற்றோலிய வாயு (LPG) முனையத்தின் செயற்பாடுகள் தொடர்பாக விதிக்கப்பட்ட கட்டுப்பாடுகள் ஆகியவையே காரணம் என அவர் தெரிவித்துள்ளார்.

எரிவாயு விநியோகிக்க முடியாமல் போனதால் நுகர்வோருக்கு ஏற்பட்ட அசௌகரியங்களுக்காக நிறுவனத்தின் சார்பில் மன்னிப்புக் கோருவதாகவும் அவர் குறிப்பிட்டுள்ளார்.

விலை அதிகரிப்பு தொடர்பில் விளக்கமளித்த அவர், சர்வதேச சந்தையில் LPG விலை உயர்வு, கப்பல் போக்குவரத்துச் செலவுகள், காப்புறுதிக் கட்டணங்கள், நாணய மாற்று வீதத்தில் ஏற்பட்ட ஏற்ற இறக்கங்கள் மற்றும் வரிகள் அதிகரித்தமை ஆகியவை நிறுவனத்தின் செலவுகளைப் பெருமளவில் உயர்த்தியுள்ளதாகத் தெரிவித்துள்ளார்.

இதன் காரணமாகவே 12.5 கிலோகிராம் LAUGFS எரிவாயு சிலிண்டரின் விலை 6,741 ரூபாவாக அதிகரிக்கப்பட்டுள்ளதாகவும், இந்த விலை உயர்வு மேலதிக இலாபத்தை ஈட்டுவதற்காக மேற்கொள்ளப்பட்டதல்ல எனவும் அவர் வலியுறுத்தியுள்ளார்.

"இது இலாபம் ஈட்டுவதற்கான விலை அல்ல. செலவுகளை ஈடுசெய்வதற்கான சமநிலை விலையாகும்" என அவர் தெரிவித்துள்ளார்.

முதலீட்டுச் சபையினால் (BOI) மேற்கொள்ளப்பட்ட கணக்காய்வைத் தொடர்ந்து விதிக்கப்பட்ட கட்டுப்பாடுகள், ஹம்பாந்தோட்டை முனையத்திலிருந்து உள்நாட்டுச் சந்தைக்கு எரிவாயு விநியோகிக்கும் நிறுவனத்தின் திறனைப் பாதித்துள்ளதாகவும் அவர் சுட்டிக்காட்டியுள்ளார்.

ஏற்றுமதி நடவடிக்கைகள் தொடர்பான நிபந்தனைகளின் கீழ், உள்நாட்டுச் சந்தைக்கு விநியோகிக்க அனுமதிக்கப்பட்ட எரிவாயு அளவை நிறுவனம் கடந்திருந்ததாகவும், இதனால் விநியோகத்தில் கட்டுப்பாடுகள் ஏற்பட்டதாகவும் அவர் விளக்கமளித்துள்ளார்.

சர்வதேச சந்தையிலும் எரிவாயு விநியோகம் பாதிக்கப்பட்டிருந்த சூழலில், மாற்று விநியோக ஏற்பாடுகளை மேற்கொள்ள வேண்டிய நிலை நிறுவனத்திற்கு ஏற்பட்டதாகவும் அவர் தெரிவித்துள்ளார்.

எனினும், புதிய எரிவாயுக் கப்பல் சரக்குகளைப் பெற்றுக்கொண்டுள்ளதுடன், விநியோக நடவடிக்கைகளும் மீண்டும் ஆரம்பிக்கப்பட்டுள்ளதாக அவர் குறிப்பிட்டுள்ளார்.

ஹம்பாந்தோட்டை முனையத்தின் செயற்பாடுகளைப் பாதிக்கும் கட்டுப்பாடுகளுக்குத் தீர்வு காண்பதற்காக அரசாங்கம் சம்பந்தப்பட்ட அதிகாரிகளுடன் இணைந்து நடவடிக்கை எடுத்து வருவதாகவும் அவர் தெரிவித்துள்ளார்.

மேலும், நுகர்வோர் தேவையற்ற அச்சத்தில் அதிகளவில் எரிவாயுவைக் கொள்வனவு செய்வதைத் தவிர்க்க வேண்டும் எனவும், அவ்வாறான பதற்றமான கொள்வனவு விநியோகத்தில் மேலதிக அழுத்தத்தை ஏற்படுத்துவதாகவும் அவர் கேட்டுக்கொண்டுள்ளார்.

தொடர்ச்சியான விநியோக நடவடிக்கைகள் மூலம் எதிர்வரும் நாட்களில் எரிவாயு தட்டுப்பாடு படிப்படியாகக் குறையும் என நம்பிக்கை வெளியிட்டுள்ளார்.