வங்காள விரிகுடாவில் புயல் உருவாகும் அபாயம் – மீனவர்கள், கடற்படையினருக்கு சிவப்பு எச்சரிக்கை

வங்காள விரிகுடாவில் நிலவும் குறைந்த காற்றழுத்தப் பகுதி எதிர்வரும் திங்கட்கிழமை (16) புயலாக வலுப்பெறக்கூடும் என எதிர்பார்க்கப்படுவதால், இலங்கை வளிமண்டலவியல் திணைக்களம் கடும் காற்று மற்றும் கொந்தளிப்பான கடல் நிலைமை தொடர்பில் சிவப்பு எச்சரிக்கை விடுத்துள்ளது.

சனிக்கிழமை மாலை வெளியிடப்பட்ட வானிலை அறிக்கையின்படி, குறித்த குறைந்த காற்றழுத்தப் பகுதி மட்டக்களப்பிலிருந்து கிழக்கே சுமார் 650 கிலோமீற்றர் தொலைவில் நிலைகொண்டுள்ளது.

இந்தக் காற்றழுத்தப் பகுதி இலங்கையின் கிழக்குக் கரையிலிருந்து விலகி வடமேற்கு திசையை நோக்கி நகரும் எனவும், ஞாயிற்றுக்கிழமை (15) காற்றழுத்தத் தாழ்வு மண்டலமாக வலுப்பெறும் எனவும் எதிர்பார்க்கப்படுகிறது.

இதனைத் தொடர்ந்து, திங்கட்கிழமை (16) தெற்கு மற்றும் அதனை அண்மித்த மத்திய மேற்கு வங்காள விரிகுடா கடற்பகுதியில் புயலாக வலுப்பெறக்கூடும் என வளிமண்டலவியல் திணைக்களம் தெரிவித்துள்ளது.

மேலும், எதிர்வரும் புதன்கிழமை (18) இந்தப் புயல் தீவிர புயலாக வலுப்பெறுவதற்கான சாத்தியக்கூறுகள் காணப்படுவதாகவும் முன்னறிவிக்கப்பட்டுள்ளது.

இதனையடுத்து, காங்கேசன்துறையிலிருந்து திருகோணமலை, பொத்துவில் ஊடாக அம்பாந்தோட்டை வரையிலான இலங்கைக் கடற்பரப்பிலும், தென்கிழக்கு வங்காள விரிகுடாவின் ஆழ்கடல் பகுதிகளிலும் மீன்பிடி மற்றும் கடற்படை நடவடிக்கைகளில் ஈடுபடுவோர் கடலுக்குச் செல்ல வேண்டாம் என எச்சரிக்கப்பட்டுள்ளனர்.

ஏற்கனவே குறித்த கடற்பகுதிகளில் மீன்பிடி மற்றும் கடல்சார் நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான இடங்களுக்குச் செல்லுமாறும் அறிவுறுத்தப்பட்டுள்ளனர்.

வானிலை நிலைமைகளில் ஏற்படும் மாற்றங்கள் தொடர்பில் தொடர்ந்து அவதானத்துடன் இருக்குமாறும், வளிமண்டலவியல் திணைக்களத்தின் எதிர்கால வானிலை அறிக்கைகள் மற்றும் எச்சரிக்கைகளைப் பின்பற்றுமாறும் மீனவர்கள் மற்றும் கடற்படையினரிடம் கோரிக்கை விடுக்கப்பட்டுள்ளது.

இந்த நிலைமை தொடர்பான அடுத்த உத்தியோகபூர்வ வானிலை அறிக்கை ஞாயிற்றுக்கிழமை மாலை வெளியிடப்படவுள்ளது.