இஸ்ரேலிய ட்ரோன் கொள்வனவு: அரசிடம் ஹக்கீம் கேள்வி

இஸ்ரேலிடம் இருந்து 4.26 பில்லியன் ரூபாய் பெறுமதியான கண்காணிப்பு ட்ரோன்களை கொள்வனவு செய்வதற்கு அரசாங்கம் எடுத்துள்ள தீர்மானம் குறித்து ஸ்ரீலங்கா முஸ்லிம் காங்கிரஸின் தலைவரும் நாடாளுமன்ற உறுப்பினருமான ரவூப் ஹக்கீம் பல்வேறு சந்தேகங்களையும் கேள்விகளையும் எழுப்பியுள்ளார்.

2027ஆம் ஆண்டுக்கான வரவு செலவுத் திட்ட விவாதத்தில் உரையாற்றிய அவர், போட்டி விலைமனுக் கோரல்கள் எதுவுமின்றி அவசரமாக இந்தக் கொள்வனவு முன்னெடுக்கப்படுவது ஏன் எனக் கேள்வி எழுப்பினார்.

நான்கு பில்லியன் ரூபாய்க்கும் அதிகமான பெறுமதியிலான ஆளில்லா விமானங்களைக் கொள்வனவு செய்வதற்கான குறைநிரப்பு மதிப்பீடு அண்மையில் நாடாளுமன்றத்தில் சமர்ப்பிக்கப்பட்டதாகக் குறிப்பிட்ட ஹக்கீம், குறித்த விமானங்கள் இஸ்ரேலிடமிருந்தே கொள்வனவு செய்யப்படுவதாகச் சுட்டிக்காட்டினார்.

எந்தவிதமான கேள்விப்பத்திரக் கோரல்களும் இன்றி நேரடியாக இந்தக் கொள்வனவு முன்னெடுக்கப்படுவதன் பின்னணி என்ன என்றும் அவர் கேள்வி எழுப்பினார்.

மேலும், இந்தக் கொடுக்கல் வாங்கலுடன் தொடர்புடைய தரகுப் பணம் அல்லது தரகு கொடுப்பனவுகள் வழங்கப்பட்டிருக்கக்கூடும் என்ற சந்தேகத்தையும் அவர் வெளியிட்டார். எனினும், இதற்கான ஆதாரங்கள் எதனையும் அவர் முன்வைக்கவில்லை.

குறித்த கண்காணிப்பு ட்ரோன்கள் ஈரானியக் கப்பல்களின் நகர்வுகளைக் கண்காணித்து, அவை தொடர்பான உளவுத் தகவல்களை அமெரிக்காவுக்கு வழங்குவதற்குப் பயன்படுத்தப்படக்கூடும் என்றும் ஹக்கீம் குற்றஞ்சாட்டினார்.

இலங்கை கடற்படையையும் விமானப்படையையும் அமெரிக்காவுக்காக உளவு பார்க்கப் பயன்படுத்தப் போகிறீர்களா என அரசாங்கத்திடம் கேள்வி எழுப்பிய அவர், இவ்வாறான நடவடிக்கைகளில் ஈடுபடுவதன் மூலம் நாட்டின் வெளிநாட்டு உறவுகளுக்குப் பாதிப்பை ஏற்படுத்த வேண்டாம் என்றும் எச்சரித்தார்.

அதேவேளை, காசா பகுதியில் பாலஸ்தீன மக்கள் கடும் துயரங்களை எதிர்கொண்டு வரும் நிலையில், இஸ்ரேலிடமிருந்து விமானங்களைக் கொள்வனவு செய்வதற்கு அரசாங்கம் எடுத்துள்ள தீர்மானத்தையும் அவர் விமர்சித்தார்.

குறிப்பாக, காசாவில் நிலவும் மனிதாபிமான நெருக்கடி மற்றும் மக்களின் அவலநிலையைக் கருத்திற்கொண்டு இந்தக் கொள்வனவு தொடர்பில் அரசாங்கம் மறுபரிசீலனை செய்ய வேண்டும் என அவர் வலியுறுத்தினார்.

அத்துடன், ஈரான் மற்றும் வெனிசுவேலா தொடர்பான சர்வதேச விவகாரங்களில் அரசாங்கம் உரிய நிலைப்பாட்டை வெளிப்படுத்தத் தவறியுள்ளதாகவும் அவர் குற்றஞ்சாட்டினார்.

இதேவேளை, இலங்கை விமானப்படைக்காக ஆளில்லா விமானக் கண்காணிப்பு கட்டமைப்பொன்றை நிறுவுவதற்கு 4.261 பில்லியன் ரூபாய் ஒதுக்கீடு செய்யும் குறைநிரப்பு மதிப்பீட்டுக்கு கடந்த நவம்பர் 5ஆம் திகதி நாடாளுமன்றம் அனுமதி வழங்கியிருந்தது.

BlueBird Aero Systems நிறுவனத்துடன் அரசாங்கங்களுக்கு இடையிலான உடன்படிக்கை ஊடாக இஸ்ரேலில் தயாரிக்கப்பட்ட நான்கு ட்ரோன்களைக் கொள்வனவு செய்ய அரசாங்கம் திட்டமிட்டுள்ளதாகப் பிரதி பாதுகாப்பு அமைச்சர் அருண ஜயசேகர முன்னதாக நாடாளுமன்றத்தில் தெரிவித்திருந்தார்.

இந்தக் கொள்வனவு அவசர அடிப்படையில் முன்னெடுக்கப்படுவதாகக் குறிப்பிட்ட அவர், கடல் கண்காணிப்பு, சந்தேகத்திற்கிடமான கப்பல்களின் நகர்வுகளைக் கண்காணித்தல், காணாமல்போகும் மீனவர்களைக் கண்டறிதல் மற்றும் அனர்த்த நிலைமைகளின்போது மீட்பு நடவடிக்கைகளுக்கு உதவுதல் உள்ளிட்ட தேவைகளுக்காக இந்த விமானங்கள் பயன்படுத்தப்படும் எனத் தெரிவித்திருந்தார்.

மேலும், விமானப்படையின் தற்போதைய ஹெலிகொப்டர் பராமரிப்புக்காக ஒதுக்கப்பட்ட நிதியில் ஏற்பட்டுள்ள சேமிப்பிலிருந்தே இந்தக் கொள்வனவுக்கான செலவு ஈடுசெய்யப்படும் என்றும், இதற்காக மேலதிக நிதி ஒதுக்கீடு தேவைப்படாது என்றும் அரசாங்கம் தெரிவித்துள்ளது.