இலங்கை விமானப்படையின் ஆளில்லா விமானத் திட்டத்திற்கு 4.26 பில்லியன் ரூபா நிதி ஒதுக்கீட்டுக்கு நாடாளுமன்றம் அனுமதி
இலங்கை விமானப்படைக்கான ஆளில்லா விமான (UAV) கட்டமைப்பை உருவாக்குவதற்கு 4.26 பில்லியன் ரூபாவை ஒதுக்குவதற்கு நாடாளுமன்றம் அனுமதி வழங்கியுள்ளது.
இதற்கான 2026ஆம் ஆண்டின் 08ஆம் இலக்க குறைநிரப்பு மதிப்பீடு, 4,261 மில்லியன் ரூபா நிதி ஒதுக்கீட்டைக் கோரி வியாழக்கிழமை (05) நாடாளுமன்றத்தில் சமர்ப்பிக்கப்பட்டது.
காலை 11.30 மணி முதல் மாலை 5.00 மணி வரை இடம்பெற்ற விவாதத்தைத் தொடர்ந்து குறித்த நிதி ஒதுக்கீட்டுக்கு நாடாளுமன்றம் அனுமதி வழங்கியுள்ளது.
மாறிவரும் பாதுகாப்புச் சூழல் மற்றும் சுற்றுச்சூழல் சவால்களுக்கு முகங்கொடுக்கும் வகையில் இலங்கை விமானப்படையின் செயற்பாட்டுத் திறனை மேலும் வலுப்படுத்துவதே இந்தத் திட்டத்தின் முக்கிய நோக்கமாகும் என நாடாளுமன்றம் தெரிவித்துள்ளது.
குறிப்பாக, மாறிவரும் பாதுகாப்புச் சூழல், வங்காள விரிகுடா மற்றும் அதனைச் சூழவுள்ள பிராந்தியங்களில் ஏற்படக்கூடிய அனர்த்த அபாயங்கள், தொடர்ச்சியான சீரற்ற காலநிலையால் உருவாகும் புதிய அச்சுறுத்தல்கள் ஆகியவற்றைக் கருத்திற்கொண்டு இந்த ஆளில்லா விமானக் கட்டமைப்பு உருவாக்கப்படவுள்ளது.
இதற்கான நிதி, அரசின் திரட்டு நிதியம், ஏனைய அரச நிதியங்கள் அல்லது அரசாங்கத்தின் கடன் பெறுகை மூலம் பெற்றுக்கொள்ளப்படலாம் என தெரிவிக்கப்பட்டுள்ளது.
இதேவேளை, நாடாளுமன்றத்தில் இரண்டாம் மதிப்பீட்டு விவாதத்திற்கு எடுத்துக்கொள்ளப்பட்ட நம்பிக்கைப் பொறுப்புகள் (திருத்தம்) சட்டமூலமும் எவ்வித திருத்தங்களுமின்றி நிறைவேற்றப்பட்டுள்ளது.
நம்பிக்கைப் பொறுப்புகள் கட்டளைச் சட்டத்தில் திருத்தங்களை மேற்கொள்ளும் நோக்கில் கொண்டுவரப்பட்ட இந்தச் சட்டமூலத்தை, நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார நாடாளுமன்றத்தில் சமர்ப்பித்திருந்தார்.
